ເລັ່ງແກ້ໄຂບັນຫາແຮງງານ ນອກລະບົບໃຫ້ຖືກຕ້ອງຕາມລະບຽບກົດໝາຍ

ກະຊວງແຮງງານ ແລະ ສະຫວັດດີການສັງຄົມ ແລະ ຜູ້ພັດທະນາເຂດເສດຖະກິດພິເສດບໍ່ເຕ່ນແດນງາມ ໄດ້ຕົກລົງເພີ່ມທະວີການຮ່ວມມື ກ່ຽວກັບວຽກງານແຮງງານ ແລະ ການປະກັນສັງຄົມ ເພື່ອຊຸກ ຍູ້-ສົ່ງເສີມການຮ່ວມມືດ້ານວຽກງານແຮງງານ ແລະ ການປະກັນສັງຄົມແບບມີຈຸດສຸມ, ເປັນລະບົບ, ສອດຄ່ອງກັບກົດໝາຍ ແລະ ລະບຽບການ ຂອງສອງຝ່າຍ, ແນໃສ່ຜັນຂະຫຍາຍ ແລະ ຈັດຕັ້ງປະຕິບັດແນວ ທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ກໍຄືແຜນພັດທະນາແຮງງານ ແລະ ສະຫວັດດີການສັງຄົມ 5 ປີຄັ້ງທີ 5 (2021-2025) ໃຫ້ເກີດດອກອອກຜົນ.

ການລົງນາມໃນບົດບັນທຶກການຮ່ວມມື ຄັ້ງນີ້ ໄດ້ມີຂຶ້ນໃນວັນທີ 12 ກໍລະກົດ 2022 ນີ້ ໂດຍທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ ແລະ ທ່ານ Lan Jia Wei ຫົວໜ້າສູນດຳເນີນການບໍລິການ, ເຂດເສດຖະກິດພິເສດບໍ່ເຕ່ນແດນງາມ ແລະ ເຂົ້າຮ່ວມເປັນສັກຂີພິຍານຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ ຄໍາໄຫລ ສີປະເສີດ ເຈົ້າແຂວງຫລວງນໍ້າທາ ພ້ອມດ້ວຍພະນັກງານທີ່ກ່ຽວຂອງທັງສອງຝ່າຍ.

ສຳລັບຂອບຂອງການຮ່ວມມືໃນ ຄັ້ງນີ້ ປະກອບມີ ການສົ່ງເສີມການປະຊາສຳພັນ ແລະ ເຜີຍແຜ່ບັນດານິຕິກໍາ ທີ່ກ່ຽວຂ້ອງກັບວຽກງານແຮງງານ ແລະ ການປະກັນສັງຄົມ ໃຫ້ແກ່ຫົວໜ່ວຍວິສາຫະກິດ ແລະ ຜູ້ອອກແຮງງານຢູ່ເຂດເສດຖະກິດພິເສດບໍ່ເຕ່ນແດນງາມ; ຊຸກຍູ້, ສົ່ງເສີມ ແລະ ອໍານວຍຄວາມສະ ດວກໃນການຂຶ້ນທະບຽນແຮງງານລາວ ແລະ ແຮງງານຕ່າງປະເທດ ທີ່ເຮັດວຽກຢູ່ເຂດດັ່ງກ່າວ ໃນລະບົບຂໍ້ມູນຂ່າວສານແຮງງານທີ່ທັນສະໄໝ, ເກັບກໍາຂໍ້ມູນກ່ຽວກັບຕໍາແໜ່ງງານວ່າງ, ຄວາມຕ້ອງການນຳໃຊ້ແຮງງານ ເພື່ອດັດສົມລະຫວ່າງຄວາມຕ້ອງການ ແລະ ຄວາມອາດສາມາດສະໜອງແຮງງານໃນຕະ ຫລາດແຮງງານຂອງເຂດ. ພ້ອມນັ້ນ ຍັງອຳນວຍຄວາມສະດວກໃຫ້ທັງສອງຝ່າຍ ໃນການເຂົ້າເຖິງຂໍ້ມູນຂ່າວສານຕະຫລາດແຮງງານ ໂດຍຮ່ວມກັນສ້າງຂອດປະສານງານໃນການຈັດຕັ້ງປະຕິບັດ ກົນໄກການສະໜອງຂໍ້ມູນໃຫ້ມີປະສິດທິພາບ; ຮ່ວມມືກັນຊຸກຍູ້ ແລະ ສົ່ງເສີມ ການພັດທະນາສີມືແຮງງານ ຕາມທ່າແຮງທີ່ມີ ແລະ ສົມທົບກັບບັນດາຫົວໜ່ວຍແຮງງານ ແລະ ພາກສ່ວນກ່ຽວຂ້ອງຢູ່ເຂດເສດຖະກິດພິເສດ ໃນການຝຶກ ແລະ ທົດສອບສີມືແຮງງານຕາມສາຂາອາຊີບຕ່າງໆ ເພື່ອສະໜອງແຮງງານທີ່ມີສີມື ແລະ ຍົກສູງຜະລິດຕະພາບຂອງຫົວໜ່ວຍແຮງງານໃຫ້ສູງຂຶ້ນ. ພ້ອມນີ້ ຕ້ອງສົ່ງເສີມໃຫ້ແກ່ຜູ້ອອກແຮງງານລາວ ທີ່ມີໃບນຳສົ່ງຈາກກົມການຈັດຫາງານ, ຈຸດບໍລິການຈັດຫາງານ, ບັນດາບໍລິສັດຈັດຫາງານ ທີ່ໄດ້ຮັບອະນຸ ຍາດຈາກອົງການຄຸ້ມຄອງແຮງງານ ໄດ້ເຂົ້າສູ່ຕຳແໜ່ງງານວ່າງຢູ່ເຂດເສດຖະກິດພິເສດບໍ່ເຕ່ນແດນງາມ; ສົ່ງເສີມວຽກງານຄຸ້ມຄອງແຮງງານ ໂດຍການອຳນວຍຄວາມສະດວກໃຫ້ແກ່ເຈົ້າໜ້າທີ່ ລົງກວດກາແຮງງານ ໃນການຈັດຕັ້ງປະຕິບັດກົດໝາຍວ່າດ້ວຍແຮງງານ ແລະ ລະບຽບການ; ການປົກປ້ອງສິດຜົນປະ ໂຫຍດຂອງແຮງງານລາວ ແລະ ຕ່າງປະເທດ ທີ່ເຮັດວຽກຢູ່ໃນເຂດນີ້ ດ້ວຍການຊຸກຍູ້ ແລະ ສົ່ງເສີມໃຫ້ຜູ້ອອກແຮງງານປະຈຳຢູ່ພາຍໃນເຂດ ໄດ້ເຂົ້າຮ່ວມໃນລະບົບປະກັນສັງຄົມຕາມກົດໝາຍ ວ່າດ້ວຍການປະ ກັນສັງຄົມ; ປັບປຸງກົນໄກ ເພື່ອອຳນວຍຄວາມສະດວກໃນການອະນຸຍາດການນໍາໃຊ້ແຮງງານຕ່າງປະເທດ ຢູ່ເຂດໃຫ້ມີຄວາມວ່ອງໄວຂຶ້ນ ໂດຍໃຫ້ມີຜູ້ຕາງໜ້າຂອງອົງການຄຸ້ມຄອງແຮງງານ ມາປະຈຳຢູ່ສູນບໍລິການປະຕູດຽວຂອງເຂດ ແລະ ສຸມໃສພັດທະນາລະບົບການຂໍອະນຸມັດໂກຕາ ແລະ ອອກບັດແຮງງານຕ່າງ ປະເທດແບບອອນລາຍ ແລະ ສົມທົບກັບພາກສ່ວນທີ່ກ່ຽວຂ້ອງໃນການເຊື່ອມບັດແຮງງານ ແລະ ບັດພັກເຊົາເຂົ້າເປັນບັດດຽວ ທັງນີ້ກໍເພື່ອຊຸກຍູ້ການພັດທະນາ ແລະ ການດຶງດູດການລົງທຶນຢູ່ພາຍໃນເຂດພິເສດ ແລະ ເຂດຮ່ວມມືລາວ-ຈີນ.

ນອກຈາກນີ້, ກະຊວງແຮງງານ ແລະ ສະຫວັດດີການສັງຄົມ ພິຈາລະນາອະນຸມັດການສະເໜີນໍາໃຊ້ແຮງງານຕ່າງປະເທດ ບົນພື້ນຖານການດັດສົມຄວາມຈໍາເປັນ ໃນການນໍາໃຊ້ແຮງງານຕ່າງປະເທດ ຢູ່ໃນເຂດເສດຖະກິດພິເສດບໍ່ເຕ່ນແດນງາມ, ເຊິ່ງເຂດດັ່ງກ່າວ ຕ້ອງກຳນົດແຜນຄວາມຕ້ອງການນໍາໃຊ້ແຮງງານເປັນແຕ່ລະງວດ ຫລື 6 ເດືອນ ເພື່ອສະເໜີຕໍ່ອົງການຄຸ້ມຄອງແຮງງານ ໃນການດັດສົມລະຫວ່າງຄວາມອາດສາມາດໃນການສະໜອງແຮງງານລາວ ແລະ ການອະນຸຍາດນໍາໃຊ້ແຮງງານຕ່າງປະເທດ ຕາມນະໂຍບາຍເຂດຮ່ວມມືລາວ-ຈີນ ແລະ ຈະທົດລອງປະຕິບັດກ່ອນ.

แชร์