ລັດ ຫາຊ່ອງທາງແກ້ໄຂລາຄາສິນຄ້າ ບາງລາຍການທີ່ຈໍາເປັນ

ໃນວັນທີ 12 ກໍລະກົດ ທີ່ຜ່ານມາກົມການຄ້າພາຍໃນ, ກະຊວງອຸດສາຫະກໍາ ແລະການຄ້າໄດ້ຈັດກອງປະຊຸມປຶກສາຫາລື, ແລກປ່ຽນຄວາມຄິດເຫັນ ແລະຄວາມເປັນເອກະພາບ ກ່ຽວກັບວິທີທາງແກ້ໄຂບັນຫາລາຄາສິນຄ້າ ແລະຄ່າບໍລິການບາງລາຍການສິນຄ້າທີ່ຈໍາເປັນທີ່ມີລາຄາເພີ່ມຂຶ້ນສູງໃນປັດຈຸບັນຜ່ານລະບົບທາງໄກໂດຍການເປັນປະທານຂອງ ທ່ານ ພູວຽງ ພົງສາ ຫົວໜ້າກົມການຄ້າພາຍໃນ, ມີບັນດາພະແນກອຸດສາຫະກຳ ແລະການຄ້າແຂວງ/ນະຄອນຫລວງວຽງຈັນ ໃນຂອບເຂດທົ່ວປະເທດ.

ກອງປະຊຸມຄັ້ງນີ້ໄດ້ຮັບຟັງການລາຍງານກ່ຽວກັບສະພາບເສດຖະກິດ, ການສະໜອງຄວາມຕ້ອງການ ແລະສະພາບການເໜັງຕີງຂອງລາຄາສິນຄ້າບາງລາຍການທີ່ຈຳເປັນຕໍ່ຊີວິດການເປັນຢູ່ຂອງປະຊາຊົນ. ພ້ອມກັນນີ້ ຜູ້ເຂົ້າຮ່ວມຍັງໄດ້ຮັບຟັງກ່ຽວກັບ ສະພາບເສດຖະກິດລວມ ແລະລາຄາສິນຄ້າຕິດພັນກັບອັດຕາເງິນເຟີ້ຂອງໂລກ ທີ່ມີແນວໂນ້ມເພີ່ມຂຶ້ນເຊັ່ນດຽວກັນ ເປັນຕົ້ນ ການແຜ່ລະບາດຂອງເຊື້ອພະຍາດໂຄວິດ-19, ສະຖານະການຂອງໂລກຍັງພົບບັນຫາຂໍ້ຂັດແຍ່ງທາງການເມືອງຂອງບັນດາປະເທດໃນເອີຣົບ. ຕໍ່ບັນຫາດັ່ງກ່າວໄດ້ສ້າງແຮງກົດດັນເຮັດໃຫ້ເກີດວິກິດການທາງດ້ານພະລັງງານ ແລະສະບຽນອາຫານທີ່ຮຸນແຮງຂຶ້ນການຢຸດສົ່ງພະລັງງານນໍ້າມັນເຊື້ອໄຟຂອງລັດເຊຍໃຫ້ບັນດາປະເທດສະມາຊິກເອີຣົບ ບວກກັບການບໍ່ເພີ່ມກໍາລັງການຜະລິດຂອງບັນດາປະເທດຜູ້ສະໜອງນໍ້າມັນເຊື້ອໄຟໃນຕ່ອງໂສ້ການສະໜອງຂອງໂລກເຮັດໃຫ້ການຊອກຫາແຫລ່ງພະລັງງານເຊື້ອໄຟດັ່ງກ່າວ ມີຄວາມຈໍາກັດ ຊຶ່ງໃນເດືອນ ພຶດສະພາ 2022 ເຮັດໃຫ້ມີຫຼາຍກວ່າ 30 ປະເທດທົ່ວໂລກ ນໍາໃຊ້ມາດຕະການຈໍາກັດການສົ່ງອອກສະບຽນອາຫານ ແລະທັງໝົດທັງມວນນັ້ນກໍໄດ້ສົ່ງຜົນກະທົບຕໍ່ ສປປ ລາວ ທັງທາງກົງ ແລະທາງອ້ອມ ໂດຍສະເພາະອັດຕາເງິນເຟີ້ແມ່ນມີທ່າອ່ຽງເພີ່ມຂຶ້ນສູງຢູ່ໃນລະດັບ 9% ໃນໄຕມາດ 1 ປີ 2022, ເມື່ອທຽບໄລຍະດຽວກັນ ປີ 2021 ເຫັນວ່າເພີ່ມຂຶ້ນ 5.25% ແລະ ເພີ່ມຂຶ້ນສູງ ແລະກະໂດດ, ເມື່ອທຽບໃນຫລາຍປີຜ່ານມາ ສົ່ງຜົນເຮັດໃຫ້ສະ ພາບການຜະລິດ, ດຸນການຄ້າ, ການສະໜອງ ແລະ ລາຄາສິນຄ້າພາຍໃນປະເທດບໍ່ມີສະຖຽນລະພາບ ແລະມີຄວາມຫຍຸ້ງຍາກຊຶ່ງສິ່ງທ້າທາຍໃນຫລາຍໆດ້ານທີ່ຕ້ອງໄດ້ຮັບການແກ້ໄຂໂດຍສະເພາະການແກ້ໄຂບັນຫາລາຄາສິນຄ້າ ແລະຄ່າບໍລິການສູງທີ່ຕິດພັນກັບຂະແໜງອຸດສາຫະກຳ ແລະການຄ້າ.

ໃນກອງປະຊຸມໄດ້ຕົກລົງວິທີແກ້ໄຂທີ່ຕິດພັນກັບພາ ລະບົດບາດຂອງຂະແໜງອຸດສາຫະກໍາ ແລະການຄ້າ ໃນຮູບແບບໄລຍະສັ້ນ ແລະ ໄລຍະຍາວເປັນຕົ້ນ ໄລຍະສັ້ນ: ຄິດໄລ່ໂຄງປະກອບລາຄາສິນຄ້າປະເພດຄວບຄຸມທີ່ຍັງບໍ່ທັນໄດ້ກຳນົດໂຄງປະກອບລາຄາລວມໄປເຖິງບາງລາຍ ການສິນຄ້າທີ່ບໍ່ນອນຢູ່ໃນບັນຊີຄວບຄຸມແຕ່ມີການເໜັງຕີງເພີ່ມຂຶ້ນສູງ ແລະຕໍ່ເນື່ອງຫລາຍເດືອນທີ່ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ; ສືບຕໍ່ລົງຕິດຕາມ, ກວດກາການຈໍລະຈອນນໍ້າມັນເຊື້ອໄຟ ແລະ ການແຈກຢາຍສິນຄ້າອຸປະໂພກ-ບໍລິໂພກ. ພ້ອມກັນນີ້,ສືບຕໍ່ການຈັດຕັ້ງປະຕິບັດກົນໄກ, ມາດຕະການ ແລະລະບຽບການຕ່າງໆຂອງຄະນະຄຸ້ມຄອງລາຄາສິນຄ້າ ແລະຄ່າບໍລິການ ເພື່ອຄຸ້ມຄອງລາຄາສິນຄ້າ ແລະຄ່າບໍລິການ; ຄຸ້ມຄອງການນຳເຂົ້າ-ສົ່ງອອກ ເພື່ອແກ້ໄຂການສະໜອງສິນຄ້າທີ່ຜະລິດໄດ້ພາຍໃນທົດແທນສິນຄ້ານຳເຂົ້າໃຫ້ນັບມື້ຫລາຍຂຶ້ນ ໃນລາຄາ ແລະ ຄຸນນະພາບໃກ້ຄຽງກັນ; ຊຸກຍູ້ ແລະ ສົ່ງເສີມການສົ່ງອອກຢ່າງແຂງແຮງ ສໍາລັບສິນຄ້າທີ່ປະເທດມີທ່າແຮງ ແລະ ສິນຄ້າໃໝ່ທີ່ມີຕະຫລາດຮອງຮັບ ໂດຍການແກ້ໄຂຂັ້ນຂອດທີ່ສ້າງຕົ້ນທຶນທີ່ບໍ່ຈໍາເປັນຕໍ່ພາກທຸລະກິດ; ນອກນັ້ນ, ກຳນົດນະໂຍບາຍທາງດ້ານອາກອນທີ່ເໝາະສົມ, ສ້າງ ແລະອໍານວຍຄວາມສະດວກໃຫ້ແກ່ລະບົບຂົນສົ່ງ ແລະຄ່ຽນຖ່າຍສິນຄ້າໃຫ້ມີປະສິດທິພາບສາມາດຫລຸດຜ່ອນຕົ້ນທຶນຂົນສົ່ງທັງພາຍໃນ ແລະຕ່າງປະເທດ; ການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ໂດຍສະເພາະການຊີ້ແຈງ ແລະ ແກ້ໄຂຄຳຮ້ອງທຸກຜ່ານສາຍດ່ວນ 1510 ໃນຂອບເຂດທົ່ວປະເທດໃຫ້ສອດຄ່ອງກັບສະພາບຕົວຈິງ.

ສໍາລັບໄລຍະຍາວ: ຕ້ອງປັບປຸງ ແລະສ້າງຄວາມເຂັ້ມແຂງໃຫ້ລັດວິສາຫະກິດໃຫ້ກາຍເປັນຫົວໜ່ວຍວິສາຫະກິດນໍາໜ້າທີ່ສາມາດຂຸດຄົ້ນແຫຼ່ງລາຍຮັບເປັນເງິນຕາຕ່າງປະເທດຢ່າງແທ້ຈິງ; ຊຸກຍູ້, ສົ່ງເສີມ ແລະຄຸ້ມຄອງການຜະລິດພາຍໃນໃຫ້ເຂັ້ມແຂງ ສາມາດຜະລິດ ແລະສະໜອງສິນຄ້າໃຫ້ນັບມື້ນັບກວ້າງຂວາງ, ຫຼາກຫຼາຍ ແລະ ທົ່ວເຖິງສັງຄົມທີ່ມີການແຂ່ງຂັນທີ່ເປັນທໍາ.

ຂໍ້ມູນ: ກະຊວງອຸດສາຫະກຳ ແລະ ການຄ້າ

แชร์