ການນໍາແຂວງຫຼວງພະບາງ ວາງກະຕ່າດອກໄມ້ວັນຄ້າຍວັນເກີດປະທານ ສຸພານຸວົງ

ໃນວັນທີ 13 ກໍລະກົດນີ້, ທີ່ອະນຸສາວະລີ ປະທານ ສຸພານຸວົງ ບ້ານນາວຽງຄໍາ ນະຄອນ-ຫຼວງພະບາງ ແຂວງຫຼວງພະບາງ, ທ່ານ ຄໍາຂັນ ຈັນທະວີສຸກ ກໍາມະການສູນກາງພັກເລຂາພັກແຂວງເຈົ້າແຂວງຫຼວງພະບາງ ໄດ້ນໍາພາຄະນະພັກ-ລັດ ແລະການນໍາຫຼັກແຫຼ່ງຂອງແຂວງຫຼວງພະບາງ ເຂົ້າວາງກະຕ່າດອກໄມ້ຢູ່ຕໍ່ໜ້າຮູບຫຼໍ່ ປະທານ ສຸພານຸວົງ ຜູ້ນໍາທີ່ເຄົາລົບຮັກຂອງປະຊາຊົນລາວເນື່ອງໃນໂອກາດວັນຄ້າຍວັນເກີດຂອງ ປະທານ ສຸພານຸ ວົງຄົບຮອບ113 ປີ (13/7/1909-13/7/2022).

ປະທານ ສຸພານຸວົງ ເກີດເມື່ອວັນທີ 13 ກໍລະກົດ 1909 ທີ່ນະຄອນ-ຫຼວງພະບາງ ຊຶ່ງປັດຈຸບັນຮັບສັນຍານາມວ່າເມືອງມໍລະດົກໂລກ ແລະເປັນເມືອງແຫຼ່ງທ່ອງທ່ຽວ ຍອດນິຍົມຂອງໂລກ, ປະທານ ສຸພານຸວົງ ກໍາເນີດໃນເຊື້ອລາດຊະວົງ ຫຼັງຈາກຮຽນຈົບປະຖົມສົມບູນແລ້ວໃນປີ 1920 ເພິ່ນກໍໄດ້ໄປຮຽນຕໍ່ມັດທະຍົມ “ອານແບກຊາໂຣ” ທີ່ຮ່າໂນ້ຍ ປະເທດຫວຽດນາມ, ເພິ່ນໄດ້ຕັ້ງໃຈຮໍ່າຮຽນຫຼາຍວິຊາ ແລະຫຼາຍພາສາອີກດ້ວຍ, ເມື່ອມາຮອດປີ 1930 ເພິ່ນໄດ້ໄປສຶກສາຕໍ່ທີ່ປະເທດຝຣັ່ງ, ເພິ່ນຮຽນຢູ່ມະຫາວິທະຍາໄລຂົວທາງແຫ່ງຊາດສາຂາວິຊາວິສະວະກອນພົນລະເຮືອນຢູ່ປາຣີ, ເພິ່ນຮຽນໄດ້ດີ ແລະມີຄະແນນດີເລີດ, ສາມາດເວົ້າໄດ້ດີເຖິງ 10 ພາສາທີ່ໃຊ້ຫຼາຍໃນສາກົນ, ພາຍຫຼັງສິ້ນສຸດການສຶກສາກໍປະກອບໜ້າທີ່ການງານຕາມຄວາມຮູ້-ຄວາມສາມາດ, ແຕ່ໃນເງື່ອນໄຂ ແລະ ສິ່ງແວດລ້ອມທີ່ເອື້ອອຳນວຍຄວາມສະດວກຄືແນວນັ້ນຄວນຈະເປັນເສັ້ນທາງໃຫ້ເພິ່ນກາຍເປັນຂຸນນາງ ແລະດຳລົງຕໍາແໜ່ງໃດໜຶ່ງຂອງກົງຈັກປົກຄອງສັກດີນາ, ແຕ່ຊີວິດ ແລະການເຄື່ອນໄຫວຕົວຈິງຂອງເພິ່ນໄດ້ປ່ຽນປີ້ນຖານະຊົນຊັ້ນ,ຫັນປ່ຽນແນວຄິດກໍຄືແບບແຜນດໍາລົງຊີວິດແບບບໍ່ໜ້າເຊື່ອ,ເວົ້າໄດ້ວ່າເພິ່ນແມ່ນເຊື້ອເຈົ້າກະສັດອົງດຽວຂອງອານາຈັກລ້ານຊ້າງທີ່ໄດ້ປ່ຽນແປງຕຳນານແຫ່ງວິຖີຊີວິດແບບສັກດີນາມາເປັນສາມັນຊົນຜູ້ຮ່ວມສຸກ,ຮ່ວມທຸກ,ຮ່ວມຕໍ່ສູ້ກັບປະຊາຊົນບັນດາເຜົ່າເພື່ອເອກະລາດແຫ່ງຊາດຈົນກາຍເປັນຕົ້ນແບບຂອງນັກຮົບຕໍ່ສູ້ປະຕິວັດຮັກຊາດທີ່ຍິ່ງໃຫຍ່. ເປັນຜູ້ນໍາທີ່ຄົບລົບຮັກຂອງປະຊາຊົນລາວທັງຊາດ ແລະຄົງຢູ່ໃນໃຈໂດຍສະເພາະແມ່ນຜູ້ເປັນລູກຫຼານ ແລະຊາວຫຼວງພະບາງຕະຫຼອດໄປ.

ຂ່າວ-ພາບ: ເພັດສາຄອນ ສິມມະວົງ

แชร์