ປັດຈຸບັນແຕ່ລະເມືອງແຂວງຫຼວງພະບາງມີລົດຮັບ-ສົ່ງຄົນເຈັບຄົບທຸກເມືອງແລ້ວ

ພິທີມອບ-ຮັບພາຫະນະລົດໃຫຍ່ຮັບ-ສົ່ງຄົນເຈັບ ຊຶ່ງເປັນງວດທີ 2 ທີ່ທາງພະແນກສາທາລະນະສຸກແຂວງໄດ້ມອບຕໍ່ໃຫ້ບັນດາຫ້ອງການສາທາລະນະສຸກແຕ່ລະເມືອງໃນຄັ້ງນີ້ມີ 6 ເມືອງ 1 ນະຄອນ ຈັດຂື້ນໃນ ວັນທີ 12 ກໍລະກົດ 2022 ທີ່ພະແນສາທາລະນະສຸກແຂວງໂດຍການເຂົ້າຮ່ວມຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫຼວງພະບາງ, ທ່ານ ດຣ ຄໍາສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງຫຼວງພະບາງ, ມີຮອງພະແນກສາທາລະນະສຸກ, ຫົວໜ້າຫ້ອງການສາທາ ບັນດາເຈົ້າເມືອງ, ເຈົ້ານະຄອນ, ຫົວໜ້າໂຮງໝໍນ້ອຍປະຈຳ 6 ເມືອງ ແລະນະຄອນເຂົ້າຮ່ວມ.

ພາຫະນະທີ່ໄດ້ນຳມາມອບຄັ້ງນີ້ແມ່ນປະເພດລົດກະບະ 4 ປະຕູ, ຍີ່ຫໍ້ນິສັນ ສໍາລັບຮັບ-ສົ່ງຄົນເຈັບທີ່ ລັດຖະບານຍີປຸ່ນໄດ້ຊ່ວຍເຫຼືອລັດຖະບານລາວ ແລະແຈກຢາຍໃຫ້ກັບບັນດາແຂວງໃນຂອບເຂດທົ່ວປະເທດໃນນີ້ແຂວງຫຼວງພະບາງກໍ່ເປັນແຂວງໜື່ງທີ່ໄດ້ຮັບການແບ່ງປັນຈາກລັດຖະບານລາວກໍ່ຄືກະຊວງສາທາລະນະສຸກ 7 ຄັນ ເຊິ່ງຖືເປັນງວດທີ2 ເພື່ອມາແຈກຢ້າຍໃຫ້ກັບໂຮງໝໍເມືອງ 6 ເມືອງ ແລະ ນະຄອນ ເພື່ອນນໍາໃຊ້ເຂົ້າໃນວຽກງານການບໍລິການຮັບ-ສົ່ງຄົນເຈັບຈາກສະຖານທີ່ຕ່າງໆໄປຫາສະຖານທີ່ບໍລິການປິ່ນປົວຄົນເຈັບໃຫ້ທວງທັນກັບເວລາ ແລະມີຄວາມປອດໄພ, ເປັນຕົ້ນແມ່ນມອບໃຫ້ໂຮງໝໍເມືອງຊຽງເງີນ, ເມືອງນານ, ໂພນໄຊ, ປາກອູ, ເມືອງງອຍ, ວຽງຄຳ ແລະນະຄອນຫຼວງພະບາງ, ເມືອງລະ 1 ຄັນ. ມາຮອດປັດຈຸບັນແຕ່ລະເມືອງແມ່ນມີລົດຮັບ-ສົ່ງຄົນເຈັບທຸກເມືອງແລ້ວ.

ໂອກາດດັ່ງກ່າວ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ໄດ້ມີຄຳເຫັນຊີ້ນຳໃຫ້ຂະແໜງການກ່ຽວຂອງຢູ່ຂັ້ນເມືອງ, ນະຄອນທີ່ໄດ້ຮັບພາຫະນະຄັ້ງນີ້ຈົ່ງນຳເອົາໄປນຳໃຊ້ເຂົ້າໃນການຈັດປະຕິບັດໜ້າທີ່ຂອງວິຊາສະເພາະຢູ່ຂອບເຂດການບໍລິການຂອງຕົນດ້ວຍຄວາມຮັບຜິດຊອບສູງ, ເລັ່ງໃສ່ບໍລິການຮັບ-ສົ່ງຄົນເຈັບທີ່ຕ້ອງການຄວາມຊ່ວຍເຫຼືອໄປຮອດສະຖານທີ່ປິນປົ່ວໃຫ້ໄດ້ທັນເວລາ ແລະປອດໄພ.
ຂ່າວ: ສີສຸວັນ

แชร์