ພົນເອກ ຈັນສະໝອນ ຈັນຍາລາດ ຕ້ອນຮັບຜູ້ບັນຊາການທະຫານ ສູງສຸດ ກອງທັບໄທ ເຂົ້າຢ້ຽມຂໍ່ານັບ

ໃນວັນທີ 12 ກໍລະກົດ 2022 ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ຕ້ອນການເຂົ້າຢ້ຽມຂໍ່ານັບ ຂອງ ພົນເອກ ສະເຫຼີມພົນ ສີສະຫວັດ ຜູ້ບັນຊາການທະຫານສູງສຸດ ກອງທັບ ແຫ່ງ ຣາຊະອານາຈັກໄທ ພ້ອມດ້ວຍຄະນະເນື່ອງໃນໂອກາດຄະນະເດີນທາງມາ ຢ້ຽມຢາມ ແລະເຮັດວຽກຢູ່ ສປປ ລາວ.

ພົນເອກ ຈັນສະໝອນ ຈັນຍາລາດ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ຂອງພົນເອກ ສະເຫຼີມພົນ ສີສະຫວັດ ພ້ອມດ້ວຍຄະນະໃນຄັ້ງນີ້ເຊິ່ງເປັນການເພີ່ມພູນຄູນສ້າງການພົວພັນຮ່ວມມືລະຫວ່າງ ສອງກອງທັບ ລາວ-ໄທ, ໄທ-ລາວ ເວົ້າລວມເວົ້າສະເພາະເພື່ອສືບຕໍ່ເພີ່ມທະວີໃນຂົງເຂດວຽກງານ ຮັກສາຄວາມສະຫງົບຮຽບຮ້ອຍຕາມ ຊາຍແດນລາວ-ໄທ -ໄທ-ລາວ ເປັນຕົ້ນ ການແກ້ໄຂບັນຫາຢາເສບຕິດ, ບັນຫາການລັກລອບເຂົ້າເມືອງຜິດກົດໝາຍ ແລະບັນຫາອື່ນໆທີ່ເປັນໜໍ່ແໜງໃນການກໍ່ຄວາມບໍ່ສະຫງົບ, ສ້າງກົນໄກເຂົ້າໃນຂົງເຂດວຽກງານກະສິກຳປູກຟັງ-ລ້ຽງສັດ ລະຫວ່າງສອງກອງທັບ ໃຫ້ເກີດດອກອອກຜົນ ແລະພ້ອມດຽວກັນນັ້ນກໍຕ້ອງຮັກສາມູນເຊື້ອ ການໄປ-ມາ ຫາສູ່ຢ່າງເປັນປົກະຕິບົນພື້ນຖານຄວາມໄວ້ເນື້ອເຊື່ອໃຈເຊິ່ງກັນ ແລະກັນ.

ໂອກາດດັ່ງກ່າວ, ທ່ານຮອງນາຍົກລັດຖະມົນຕີຍັງໄດ້ຕາງໜ້າໃຫ້ການນໍາ ພັກ-ລັດ ແຫ່ງ ສປປ ລາວ ຂອບໃຈຕໍ່ລັດຖະບານ ແລະປະຊາຊົນ ຊາວໄທ ທີ່ໄດ້ໃຫ້ການຊ່ວຍເຫລືອດ້ານອຸປະກອນການແພດ ແກ່ ສປປ ລາວ ເພື່ອຕອບຕ້ານກັບພະຍາດໂຄວິດ-19, ແລະ ການຊ່ວຍເຫລືອດ້ານກໍາລັງ ເຂົ້າໃນເຫດການ ເຂື່ອນເຊປຽນ-ເຊນໍ້ານ້ອຍແຕກໃນໄລຍະຜ່ານມາເຊິ່ງເປັນການປະກອບສ່ວນເສີມສ້າງສາຍພົວພັນໃຫ້ແໜ້ນແຟ້ນຍິ່ງໆຂຶ້ນ.

ພົນເອກ ສະເຫຼີມພົນ ສີສະຫວັດ ໄດ້ສະແດງຄວາມຂອບໃຈ ຕໍ່ພົນເອກ ຈັນສະໝອນ ຈັນຍາລາດ ທີ່ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບທີ່ດີຕໍ່ກັນ ທັງເປັນການເສີມຂະຫຍາຍສາຍພົວພັນຮ່ວມມືລະຫວ່າງສອງກອງທັບໃຫ້ມີຄວາມແໜ້ນແຟ້ນຍິ່ງຂຶ້ນ, ພ້ອມທັງໄດ້ລາຍງານການພົບປະ ກັບ ພົນຕີ ຄຳລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດຫົວໜ້າກົມໃຫຍ່ເສນາທິການກອງທັບ ປະຊາຊົນລາວ ເຊິ່ງໄດ້ປຶກສາຫາລືບັນດາວຽກງານທີ່ສໍາຄັນທີ່ສອງຝ່າຍໃຫ້ຄວາມສົນໃຈ ແລະບັນຫາອື່ນໆ ຊຶ່ງມີຜົນສຳເລັດຢ່າງຈົບງາມ.

ໂດຍ: ໂຊເລ້ ບຸນເຮືອງ

แชร์