ບັນດາການນຳຂັ້ນສູງຂອງ ສປປ ລາວ ເຂົ້າຮ່ວມພິທີເຊັນປຶ້ມໄຫວ້ອາໄລຕໍ່ການເສຍຊີວິດຂອງອະດີດນາຍົກລັດຖະມົນຕີ ແຫ່ງ ປະເທດຍີ່ປຸ່ນ

ໃນວັນທີ 12 ກໍລະກົດ 2022 ທີ່ ສະຖານທູດ ຍີ່ປຸ່ນ ປະຈຳ ສປປ ລາວ, ບັນດາການນຳຂັ້ນສູງຂອງ ສປປ ລາວ ໄດ້ເດີນ ທາງໄປເຂົ້າຮ່ວມພິທີວາງພວງມາລາ ແລະ ເຊັນປຶ້ມໄຫວ້ອາໄລຕໍ່ການເສຍຊີວິດຂອງພະນະ ທ່ານ ອາເບະ ຊິນໂຊ, ອະດີດນາຍົກລັດຖະມົນຕີ ແຫ່ງ ປະເທດຍີ່ປຸ່ນ, ເຂົ້າຮ່ວມພິທີໃນຄັ້ງນີ້ ມີ: ພະນະ ທ່ານ ນາງ ປານີ ຢາທໍ່ຕູ້, ຮອງປະທານປະເທດ; ພະນະທ່ານ ພັນຄຳ ວິພາວັນ, ນາຍົກລັດຖະມົນຕີ ແລະ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຕາມລຳດັບ, ເຊິ່ງເນື້ອໃນການເຊັນປຶ້ມໄຫວ້ອາໄລ ມີຄືດັ່ງນີ້:

1. ຄະນະນໍາໂດຍ ພະນະທ່ານ ນ. ປານີ ຢາທໍ່ຕູ້, ຮອງປະທານປະເທດ ແຫ່ງ ສປປ ລາວ ມີຄື:
   ຕາງໜ້າປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ກໍຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈເປັນຢ່າງຍິ່ງຕໍ່ການຈາກໄປຢ່າງກະທັນຫັນຂອງ ພະນະທ່ານ ອາເບະ ຊິນໂຊ, ອະດີດນາຍົກລັດຖະມົນຕີ ແຫ່ງ ປະເທດຍີ່ປຸ່ນ.
   ພະນະທ່ານ ອາເບະ ຊິນໂຊ ເປັນນັກການເມືອງທີ່ເຕັມໄປດ້ວຍປະສົບການການເຄື່ອນໄຫວວຽກງານທັງຢູ່ພາຍໃນ ແລະຕ່າງປະເທດ, ເປັນອະດີດການນໍາທີ່ປະກອບສ່ວນຢ່າງໃຫຍ່ຫຼວງໃນການສ້າງ ແລະຍົກສູງບົດບາດຂອງຍີ່ປຸ່ນໃນເວທີພາກພື້ນ ແລະສາກົນຕະຫຼອດຊີວິດການເຄື່ອນໄຫວປະຕິບັດໜ້າທີ່ຂອງຕົນ,ລວມທັງໄດ້ປະກອບສ່ວນອັນສຳຄັນເຂົ້າໃນການສົ່ງເສີມ ແລະຮັດແໜ້ນສາຍພົວພັນມິດຕະພາບ ແລະການຮ່ວມມື, ໂດຍສະເພາະການຍົກລະດັບສາຍພົວພັນ ແລະເສີມຂະຫຍາຍການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນຕະຫຼອດມາ.
   ການສູນເສຍອະດີດການນໍາທີ່ສໍາຄັນຂອງລັດຖະບານ ແລະ ປະຊາຊົນ ຍີ່ປຸ່ນ ໃນຄັ້ງນີ້ ຖືເປັນການສູນເສຍບຸກຄະລາກອນ ແລະການນໍາທີ່ສໍາຄັນຂອງຍີ່ປຸ່ນ ແລະທັງເປັນການສູນເສຍເພື່ອນມິດທີ່ສໍາຄັນຂອງ ສປປ ລາວ. ໃນຊ່ວງເວລາໂສກເສົ້າອາໄລຢ່າງສຸດຊຶ້ງນີ້, ຕາງໜ້າປະຊາຊົນລາວທຸກຖ້ວນໜ້າຂໍສະແດງຄວາມອາໄລອາວອນຢ່າງສຸດຊຶ້ງ ແລະຂໍແບ່ງເບົາຄວາມເສົ້າໂສກເສຍໃຈມາຍັງລັດຖະບານ ແລະປະຊາຊົນຍີ່ປຸ່ນ ເພື່ອນມິດໂດຍສະເພາະຄອບຄົວ, ຍາດຕິພີ່ນ້ອງ ແລະເພື່ອນມິດຂອງພະນະທ່ານ ອາເບະ ຊິນໂຊ ມານະໂອກາດນີ້ດ້ວຍ.
   ຂໍສະແດງຄວາມອາໄລຮັກຢ່າງສຸດຊຶ້ງເຖິງດວງວິນຍານຂອງພະນະທ່ານ ອາເບະ ຊິນໂຊ ຈົ່ງໄປສູ່ສຸຂະຕິດ້ວຍເຖິ້ນ.
   ນະຄອນຫຼວງວຽງຈັນ, ວັນທີ 12 ກໍລະກົດ 2022
   ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ

2. ຄະນະນໍາໂດຍພະນະທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ມີຄື:

ຕາງໜ້າລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ກໍຄືໃນນາມສ່ວນຕົວ, ຂ້າພະເຈົ້າຂໍສະແດງຄວາມເສົ້າສະຫຼົດໃຈເປັນຢ່າງຍິ່ງຕໍ່ການຈາກໄປຢ່າງກະທັນຫັນຂອງພະນະທ່ານ ອາເບະ ຊິນໂຊ, ອະດີດນາຍົກລັດຖະມົນຕີ ແຫ່ງ ປະເທດຍີ່ປຸ່ນ. ການຈາກໄປຂອງພະນະທ່ານ ອາເບະ ຊິນໂຊ ບໍ່ພຽງແຕ່ເປັນການສູນເສຍອະດີດການນຳທີ່ເຄົາລົບຮັກຂອງລັດຖະບານ ແລະປະຊາຊົນຍີ່ປຸ່ນ, ແຕ່ຍັງເປັນການສູນເສຍເພື່ອນມິດທີ່ໃກ້ຊິດ ແລະສະໜິດສະໜົມຂອງລັດຖະບານ ແລະ ປະຊາຊົນລາວ ພວກຂ້າພະເຈົ້າອີກດ້ວຍ.

ຕະຫຼອດຊີວິດການເຄື່ອນໄຫວປະຕິບັດໜ້າທີ່ຂອງຕົນ, ພະນະທ່ານ ອາເບະ ຊິນໂຊ ໄດ້ປະກອບສ່ວນຢ່າງໃຫຍ່ຫຼວງ ໃນພາລະກິດຮັບໃຊ້ຊາດກໍຄືການຍົກສູງບົດບາດຂອງຍີ່ປຸ່ນ ໃນເວທີພາກພື້ນ ແລະສາກົນ, ລວມທັງໄດ້ປະກອບສ່ວນອັນສຳຄັນ ເຂົ້າໃນການສົ່ງເສີມ ແລະຮັດແໜ້ນສາຍພົວພັນມິດຕະພາບ ແລະ ການຮ່ວມມື, ໂດຍສະເພາະການຍົກລະດັບສາຍພົວພັນ ແລະເສີມຂະຫຍາຍການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ຕະຫຼອດມາ.
ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍສະແດງຄວາມອາໄລອາວອນຢ່າງສຸດຊຶ້ງ ແລະຂໍແບ່ງເບົາຄວາມເສົ້າໂສກເສຍໃຈມາຍັງລັດຖະບານ ແລະປະຊາຊົນຍີ່ປຸ່ນເພື່ອນມິດໂດຍສະເພາະຄອບຄົວ, ຍາດຕິພີ່ນ້ອງ ແລະເພື່ອນມິດຂອງພະນະທ່ານ ອາເບະ ຊິນໂຊ ມານະໂອກາດນີ້ດ້ວຍ.
ຂໍສະແດງຄວາມອາໄລຮັກຢ່າງສຸດຊຶ້ງເຖິງດວງວິນຍານຂອງ ພະນະທ່ານ ອາເບະ ຊິນໂຊ ຈົ່ງໄປສູ່ສຸຂະຕິດ້ວຍເຖິ້ນ.
ນະຄອນຫຼວງວຽງຈັນ, ວັນທີ 12 ກໍລະກົດ 2022

ພັນຄໍາ ວິພາວັນນາຍົກລັດຖະມົນຕີ ແຫ່ງ ສປປ ລາວ

3. ຄະນະນໍາໂດຍພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ມີຄື:
ຕາງໜ້າຄະນະນໍາ ແລະ ພະນັກງານກະຊວງການຕ່າງປະເທດ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າຂໍສະແດງຄວາມເສົ້າສະຫຼົດໃຈເປັນຢ່າງຍິ່ງຕໍ່ການຈາກໄປຢ່າງກະທັນຫັນຂອງ ພະນະທ່ານ ອາເບະ ຊິນໂຊ, ອະດີດນາຍົກລັດຖະມົນຕີ ແຫ່ງ ປະເທດຍີ່ປຸ່ນ.
ພະນະທ່ານ ອາເບະ ຊິນໂຊ ເປັນຜູ້ນໍາທີ່ມີວິໄສທັດກວ້າງໄກ ແລະປະກອບສ່ວນຢ່າງໃຫຍ່ຫຼວງ ເຂົ້າໃນການຍົກບົດບາດຂອງຍີ່ປຸ່ນໃນເວທີພາກພື້ນ ແລະສາກົນ, ພ້ອມນັ້ນ ພາຍໃຕ້ການຊີ້ນໍາຂອງ ພະນະທ່ານ ອາເບະ ຊິນໂຊ, ການພົວພັນ ແລະການຮ່ວມມືທີ່ດີ ລະຫວ່າງ ລາວ - ຍີ່ປຸ່ນ ໄດ້ຮັບການຮັດແໜ້ນ ແລະຍົກລະດັບຂຶ້ນໃຫ້ເປັນ ຄູ່ຮ່ວມຍຸດທະສາດ ທີ່ນໍາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ - ຍີ່ປຸ່ນ.

ໃນບັນຍາກາດອັນໂສກເສົ້າສະຫຼົດໃຈນີ້, ຂ້າພະເຈົ້າຂໍສະແດງຄວາມອາໄລອາວອນຢ່າງສຸດຊຶ້ງ ແລະ ຂໍແບ່ງເບົາຄວາມເສົ້າໂສກເສຍໃຈມາຍັງລັດຖະບານຍີ່ປຸ່ນ, ຄະນະນໍາ ແລະພະນັກງານສະຖານເອກອັກຄະຣາຊະທູດ ແຫ່ງ ປະເທດຍີ່ປຸ່ນ ກໍຄືຄອບຄົວ, ຍາດຕິພີ່ນ້ອງ ແລະເພື່ອນມິດຂອງ ພະນະທ່ານ ອາເບະ ຊິນໂຊ ມານະໂອກາດນີ້ດ້ວຍ.
ຂໍສະແດງຄວາມອາໄລຮັກຢ່າງສຸດຊຶ້ງເຖິງດວງວິນຍານຂອງ ພະນະທ່ານ ອາເບະ ຊິນໂຊ ຈົ່ງໄປສູ່ສຸຂະຕິດ້ວຍເຖິ້ນ.

ນະຄອນຫຼວງວຽງຈັນ, ວັນທີ 12 ກໍລະກົດ 2022
ສະເຫຼີມໄຊ ກົມມະສິດ
ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.
ຂ່າວ-ພາບ: ກົມການຂ່າວ ກະຊວງການຕ່າງປະເທດ

• 12/07/2022