ລັດຖະມົນຕີ ກະຊວງກະສິກຳ ຊຸກຍູ້ງານວາງສະແດງເຄື່ອງເຮືອນລາວ

ວັນທີ 11  ກໍລະກົດ 2022 ທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫລວງວຽງຈັນ ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະປ່າໄມ້ພ້ອມດ້ວຍຄະນະໄດ້ໃຫ້ກຽດລົງຢ້ຽມຊົມ ແລະຊຸກຍູ້ງານວາງສະແດງສິນຄ້າເຄື່ອງເຮືອນລາວ ຄັ້ງທີ 5 ປະຈໍາປີ 2022 ໂດຍມີ ທ່ານ ທອງດໍາ ສີຫາມາຍາ ຮັກສາການປະທານສະມາຄົມເຟີນິເຈີລາວພ້ອມດ້ວຍຄະນະໄດ້ໃຫ້ການຕ້ອນຮັບ.

ໃນໂອກາດລົງຢ້ຽມຊົມຄັ້ງນີ້ຄະນະສະມາຄົມເຟີນິເຈີລາວ ໄດ້ນໍາພາທ່ານລັດຖະມົນຕີ ພ້ອມດ້ວຍຄະນະເລາະທ່ຽວຊົມບັນດາສິນຄ້າເຟີນິເຈີສວຍງາມທີ່ເປັນສີໄມ້ລາຍມືຂອງຄົນລາວເຮົາຜະລິດນຳມາເຂົ້າຮ່ວມວາງສະແດງໂດຍສະເພາະແມ່ນຜະລິດຕະພັນເຄື່ອງເຟີນິເຈີທີ່ຜະລິດດ້ວຍໄມ້, ຫວາຍ, ໄມ້ປ່ອງ ແລະຈາກວັດສະດຸເສດເຫລືອຕ່າງໆ ທີ່ເຮັດເປັນເຄື່ອງເຟີນິເຈີ; ຜະລິດຕະພັນຫັດຖະກຳ, ເຄື່ອງແກະສະຫລັກ, ເຄື່ອງປະດັບແຕ່ງເອ້ຢ້ອງພາຍໃນເຮືອນຕະຫລອດຮອດອຸປະກອນ, ເຄື່ອງມື, ເຄື່ອງຈັກຕ່າງໆທີ່ກ່ຽວຂ້ອງກັບຂະບວນການຜະລິດເຄື່ອງເຟີນິເຈີໄມ້, ເຄື່ອງນຸ່ງຫົ່ມ ແລະ ເຄື່ອງຮັບໃຊ້ໃນຄົວເຮືອນຕ່າງໆ. ຫລັງຈາກສຳເລັດການຊົມສິນຄ້າທາງຄະນະສະມາຄົມກໍໄດ້ລາຍງານຕໍ່ທ່ານລັດຖະມົນຕີຊາບກ່ຽວກັບຈຸດປະສົງການຈັດງານຄັ້ງນີ້ເພື່ອເພື່ອຊຸກຍູ້ ແລະສົ່ງເສີມຜະລິດຕະພັນພາຍໃນ, ໃຫ້ຄົນລາວຫັນມານຳໃຊ້ຜະລິດຕະພັນເຟີນິເຈີລາວຫລາຍຂື້ນຄຽງຄູ່ກັບການຟື້ນຟູເສດຖະກິດ ກໍຄືຫົວໜ່ວຍທຸລະກິດພາຍຫລັງທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໃນຜ່ານມາເພື່ອພ້ອມກັນຜ່ານຜ່າຄວາມຫຍຸ້ງດ້ານເສດຖະກິດ-ການເງິນຂອງປະເທດທີ່ພວມຜະເຊີນໃນເວລານີ້. ພ້ອມກັນນັ້ນຄະນະສະມາຄົມຍັງໄດ້ສະເໜີຕໍ່ທ່ານລັດຖະມົນຕີຊ່ວຍແກ້ໄຂບາງບັນຫານຳອີກ.

ໂອກາດນີ້, ທ່ານລັດຖະມົນຕີກະຊວງກະສິກຳ ແລະປ່າໄມ້ກໍໄດ້ມີຄວາມເຫັນຍ້ອງຍໍຊົມເຊີຍຕໍ່ຄະນະສະມາຄົມທີ່ສາມາດເຕົ້າໂຮມເອົາບັນດາສິນຄ້າພາຍໃນທີ່ເປັນສືມີຂອງຄົນລາວເຮົາເອງເຂົ້າມາຮ່ວມວາງສະແດງໃນຄັ້ງນີ້. ທັງນີ້ທ່ານລັດຖະມົນຕີຍັງໄດ້ແນະນຳຕື່ມເລື່ອງການຜະລິດສິນຄ້າພາຍໃນໃຫ້ຮັກສາໄດ້ສີໄມ້ລາຍມືທີ່ເປັນເອກະລັກລາວເຮົາ, ໃຫ້ຍົກສູງຄຸນນະພາບຫລາຍຂຶ້ນເພື່ອໃຫ້ສາມາດສົ່ງອອກຂາຍພາຍໃນ ແລະຕ່າງປະເທດໄດ້ຫລາຍຂຶ້ນກວ່າເກົ່າ.

ງານວາງສະແດງສິນຄ້າເຄື່ອງເຮືອນລາວ ຄັ້ງທີ 5 ໄດ້ເລີ່ມມາແຕ່ວັນທີ 9 ກໍລະກົດ ແລະຈະດຳເນີນໄປຈົນເຖິງວັນທີ 17 ກໍລະກົດ 2022 ນີ້ ໂດຍມີຜູ້ປະກອບການນັບແຕ່ຂະໜາດນ້ອຍຫາໃຫຍ່ໃນຂອບເຂດທົ່ວປະເທດ 50 ຫົວໜ່ວຍເຂົ້າຮ່ວມວາງສະແດງ 120 ຫ້ອງເຊິ່ງຄາດວ່າຕະຫລອດງານຈະມີການຈໍລະຈອນຊື້-ຂາຍສິນຄ້າ ປະມານ 5 ຕື້ກີບ ແລະຈະມີຜູ້ເຂົ້າທ່ຽວຊົມປະມານ 1 ແສນຄົນ. ນອກນີ້ພາຍໃນງານຍັງຈະມີການສາທິດຜະລິດເຟີນິເຈີໄມ້,ແຂ່ງຂັນຫລິ້ນເກມ,ການສະແດງສິລະປະດົນຕີລາວ, ມິນິຄອນເສີດ ແລະອື່ນໆ ອີກຫລາກຫລາຍກິດຈະກຳທີ່ຈະສ້າງຄວາມເບີກບານມ່ວນຊື່ນໃນຕະຫລອດງານ.

แชร์