ສະຫຼອງວັນປະຊາກອນໂລກ ໜູນສິດທິ ແລະ ທາງເລືອກສຳລັບທຸກຄົນ

     ໃນວັນທີ 11 ກໍລະກົດ 2022 ທີ່ນະຄອນຫລວງວຽງຈັນ ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດກອງທຶນປະຊາກອນ(UNFPA), ພ້ອມດ້ວຍບັນດາພາກສ່ວນກ່ຽວຂ້ອງສຳຄັນໃນ ສປປ ລາວ ໄດ້ຈັດພິທີສະເຫລີມສະຫລອງວັນປະຊາກອນໂລກ ດ້ວຍຫົວຂໍ້ “ຫົນທາງສູ່ຄວາມໝັ້ນຄົງ ດ້ານປະຊາກອນ: ສະໜັບສະໜູນສິດທິ ແລະ ທາງເລືອກສຳລັບທຸກຄົນ”. ໂດຍການເຂົ້າຮ່ວມຂອງທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນ ການ ແລະ ການລົງທຶນ, ທ່ານນາງ ມາຣຽມ ເອ ຄານ ຜູ້ຕາງໜ້າອົງການ UNFPA ປະຈຳ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

     ທ່ານ ດຣ. ສະຖາບັນດິດ ອິນສີຊຽງໃໝ່ ໃຫ້ຮູ້ວ່າ: ອີງຕາມບົດລາຍງານສະຖານະພາບປະປະຊາກອນໂລກ ປີ 2022, ສປປ ລາວ ພວມມີຄວາມຄືບໜ້າຢ່າງຕໍ່ເນື່ອງ ໃນການຈັດຕັ້ງປະຕິບັດຕາມເປົ້າໝາຍ ແລະ ຕົວຊີ້ວັດຂອງ ICPD. ສປປ ລາວ ມີອັດຕາສ່ວນ ເຖິງ 96% ທີ່ມີກົດໝາຍ, ນະໂຍບາຍ ແລະ ຍຸດທະສາດ ທີ່ຮັບປະກັນສິດທິ ແລະ ທາງເລືອກຕ່າງໆຂອງແມ່ຍິງ, ເດັກຍິງ ແລະ ໄວໜຸ່ມ ໃນການເຂົ້າເຖິງຂໍ້ມູນຂ່າວສານ ແລະ ການບໍລິການດ້ານສຸຂະພາບທາງເພດ ແລະ ສຸ ຂະພາບຈະເລີນພັນ ລວມທັງການວາງແຜນຄອບຄົວ. ສປປ ລາວ ໄດ້ສ້າງກົດໝາຍ ແລະ ນະໂຍ ບາຍອື່ນໆ ເພື່ອສົ່ງເສີມຄວາມສະເໝີພາບຍິງ-ຊາຍ, ການປ້ອງກັນ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ທັງຢຸດຕິການກະທຳທີ່ເປັນອັນຕະລາຍ ເຊັ່ນ: ການແຕ່ງງານກ່ອນໄວອັນຄວນໃນບັນດາໄວໜຸ່ມຍິງ.

      ທ່ານນາງ ມາຣຽມ ເອ ຄານ ກ່າວວ່າ: ການພັດທະນາແບບຍືນຍົງຈະບັນລຸຜົນໄດ້ ກໍຕໍ່ເມື່ອແມ່ຍິງ ແລະ ເດັກຍິງ ມີສິດເສລີພາບຕໍ່ຮ່າງກາຍຂອງຕົນເອງ. ສິດທິໃນສຸຂະພາບຈະເລີນພັນ, ທາງເລືອກ ແລະ ຄວາມສະເໝີພາບລະຫວ່າງຍິງ-ຊາຍ ເປັນຫລັກການທີ່ສຳຄັນໃນການຈັດຕັ້ງປະຕິບັດແຜນປະຕິບັດງານຂອງ ກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ(ICPD) ໃຫ້ມີປະສິດທິພາບ. ວິທີທາງທີ່ດີທີ່ສຸດ ເພື່ອຮັບປະກັນຄວາມໝັ້ນຄົງຂອງປະຊາກອນ ແມ່ນການສະໜັບສະໜູນສິດທິມະນຸດ, ລວມທັງສິດທິໃນການຈະເລີນພັນ ແລະ ສິດທິ ໃນທາງເລືອກຕ່າງໆຂອງບຸກຄົນ ເປັນຫົນທາງໄປສູ່ຄວາມໝັ້ນຄົງທາງດ້ານປະຊາກອນ.

     ຫົວຂໍ້ຂອງວັນປະຊາກອນໂລກປີນີ້ ສະທ້ອນໃຫ້ເຫັນເຖິງຄວາມມຸ່ງໝັ້ນຂອງ ລັດຖະບານແຫ່ງ ສປປ ລາວ ໃນການລົງທຶນໃສ່ມະນຸດໂດຍອີງໃສ່ຂໍ້ມູນ ແລະ ຫລັກຖານ ກະຊວງແຜນການແລະການລົງທຶນ ແລະ ອົງການ UNFPA ທີ່ກຳລັງກະກຽມເພື່ອຈັດຕັ້ງປະຕິບັດການສຳຫລວດ ພົນລະເມືອງໃນປີ 2025. ການສໍາຫລວດດ້ານປະຊາກອນໃນທົ່ວປະເທດ ຄັ້ງຫລ້າສຸດທີ່ໄດ້ດຳເນີນແມ່ນໃນປີ 2015 ຈະເຫັນໄດ້ຢ່າງຈະແຈ້ງເຖິງສະພາບການຂອງສະມາຊິກ ໃນສັງຄົມທີ່ມີຄວາມສ່ຽງທີ່ສຸດ ເຊັ່ນ: ເຍົາວະຊົນ, ໄວໜຸ່ມ, ແມ່ຍິງໃນຊົນນະບົດ, ຄົນທຸກຍາກ ແລະ ບັນດາຊົນເຜົ່າ. ດ້ວຍຂໍ້ມູນຫລັກຖານນີ້ຈະຊ່ວຍເປັນຂໍ້ມູນໃຫ້ແກ່ການແກ້ໄຂແບບຮອບດ້ານ ເພື່ອໃຫ້ປະຊາຊົນທຸກຄົນສາມາດນໍາໃຊ້ສິດທິຂອງຕົນຢ່າງເຕັມສ່ວນ ລວມທັງສິດທິຕ່າງໆໃນການຈະເລີນພັນ.

แชร์