ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ອັດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນມາແຕ່ວັນທີ 13 ມິຖຸນາ ຫາ ວັນທີ 8 ກໍລະກົດ 2022 ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ເປັນກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ປະທານປະເທດ, ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ, ມີບັນດາການນຳຂັ້ນສູງ ພັກ, ລັດ, ຄະນະລັດຖະບານ, ສະມາຊິກສະພາແຫ່ງຊາດ, ພະນັກງານອາວຸໂສບຳນານ ພ້ອມແຂກ ຖືກເຊີນ ເຂົ້າຮ່ວມ.

ທ່ານ ໄຊສົມພອນ ພົມວິຫານ ໄດ້ຂຶ້ນກ່າວສູນທອນພົດ ປິດກອງປະຊຸມ ໂດຍທ່ານໄດ້ຍົກໃຫ້ເຫັນຜົນສຳເລັດ ຂອງການກຳເນີນກອງປະຊຸມສະໄໝສາມັນ ໃນຄັ້ງນີ້, ເຊິ່ງຕະຫລອດໄລຍະຂອງການນຳເນີນກອງປະຊຸມ ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນຢ່າງກົງໄປກົງມາ ໃສ່ເນື້ອໃນຂອງບົດລາຍງານຕ່າງໆຂອງລັດຖະບານ ທີ່ນຳມາສະເໜີ ແລະ ພິຈາລະນາ, ຜ່ານການດຳເນີນກອງປະຊຸມ ໄດ້ພິຈາລະນາຮັບຮອງເອົາບົດລາຍງານລັດຖະບານກ່ຽວກັບການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022 ເຊິ່ງໄດ້ຕີລາຄາສູງຕໍ່ຄວາມພະຍາມຍາມຂອງລັດຖະບານ ໃນການສູ້ຊົນເຮັດໃຫ້ອັດຕາການເຕີບໂຕທາງດ້ານເສດຖະກິດສາມາດບັນລຸໄດ້ 4,3%, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສາມາດປະຄັບປະຄອງເສດ ຖະກິດບໍ່ໃຫ້ເຂົ້າສູ່ວິກິດການທີ່ໜັກໜ່ວງໄປກວ່ານີ້, ມີການແຕ່ງຕັ້ງຄະນະຮັບຜິດຊອບເພື່ອແກ້ໄຂບັນການເໜັງຕີງແຮງຂອງລາຄາສິນຄ້າ, ອັດຕາແລກປ່ຽນ, ຄວາມຫຍຸ້ງຍາກທາງດ້ານນໍ້າມັນເຊື້ອໄຟ ເຊິ່ງກອງປະຊຸມມອບໃຫ້ລັດຖະບານ ນຳເອົາຄວາມຄິດເຫັນ ໃນກອງປະຊຸມ ໄປພິຈາລະນາເພື່ອສືບຕໍ່ປັບປຸງ, ແກ້ໄຂບັນດາບັນຫາທີ່ຫຍຸ້ງຍາກທາງດ້ານເສດຖະກິດ-ການເງິນ ໃຫ້ກັບສູ່ສະພາບປົກກະຕິໂດຍໄວ.

ກອງປະຊຸມ ໄດ້ຟັງການລາຍງານຂອງລັດຖະບານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະ ກິດ-ການເງິນ ແລະ ການແກ້ໄຂບັນຫາຢາເສບຕິດ. ຕະຫລອດໄລຍະເກືອບໜຶ່ງປີທີ່ຜ່ານມາ ລັດຖະບານ ໄດ້ສົມທົບກັບສະພາແຫ່ງຊາດ ຊີ້ນຳ-ບັນຊາການຈັດຕັ້ງຜັນຂະ ຫຍາຍມະຕິຂອງສູນກາງພັກ ເປັນອັນລະອຽດເຂົ້າໃນນິຕິກໍາຂອງລັດ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານດັ່ງກ່າວ ຢ່າງເປັນຂະບວນກວ້າງຂວາງທັງຢູ່ສູນກາງ ແລະ ທ້ອງຖິ່ນ ເຊິ່ງໄດ້ຮັບຜົນສໍາເລັດຫລາຍດ້ານ, ຄຽງຄູ່ກັນນັ້ນ, ກອງປະຊຸມສະເໜີໃຫ້ລັດຖະບານເພີ່ມທະວີການໂຄສະນາເຜີຍແຜ່ ປຸກລະດົມໃຫ້ພໍ່ແມ່ປະຊາຊົນລາວບັນ ດາເຜົ່າໄດ້ຮັບຮູ້ເຂົ້າໃຈ ແລະ ເຫັນໄດ້ຄວາມຈໍາເປັນຂອງ ການຈັດຕັ້ງປະຕິບັດວາລະແຫ່ງຊາດ, ມີການເຂົ້າຮ່ວມຢ່າງຕັ້ງໜ້າ ສູ້ຊົນຜ່ານຜ່າເຮັດໃຫ້ປະເທດຊາດຫລຸດພົ້ນອອກຈາກສະພາວະຫຍຸ້ງຍາກທາງດ້ານເສດຖະກິດ-ການເງິນ ກໍຄື ບັນຫາຢາເສບຕິດໃຫ້ລຸດໜ້ອຍຖອຍລົງເລື້ອຍໆ, ມອບໃຫ້ລັດຖະບານ ຮີບຮ້ອນສືບຕໍ່ຊີ້ນຳບັນດາກະຊວງ, ອົງການ ແລະ ອົງການປົກຄອງທ້ອງຖິ່ນ ຈົ່ງຍົກສູງຄວາມຮັບຜິດຊອບຂອງຕົນຕັ້ງໜ້າເຂົ້າຮ່ວມໃນການຈັດຕັ້ງປະຕິບັດວາລະແຫ່ງຊາດ ໃຫ້ມີປະສິດທິພາບ, ປະສິດທິຜົນ ແລະ ເປັນຮູບປະທຳຕົວຈິງ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງ ລັດຖະບານ ກ່ຽວກັບການປະເມີນຜົນການຈັດຕັ້ງປະຕິບັດກົດໝາຍ 4 ສະບັບ ຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ ເຊິ່ງເປັນຄັ້ງທໍາອິດ ທີ່ໄດ້ມີການປະເມີນການຈັດຕັ້ງປະ ຕິບັດກົດໝາຍ ແລະ ນຳເຂົ້າມາພິຈາລະນາ ໃນກອງປະຊຸມສະພາແຫ່ງຊາດ ນັບແຕ່ໄດ້ປະກາດໃຊ້ລັດຖະທຳມະນູນ ແລະ ກົດໝາຍ ເປັນຕົ້ນມາ. ກອງປະຊຸມສະແດງຄວາມເປັນຫວ່ງຕໍ່ການປະຕິບັດ 4 ກົດໝາຍດັ່ງກ່າວ ເປັນຕົ້ນ ການຄຸ້ມຄອງ, ການໃຫ້ເຊົ່າ, ການສໍາປະທານທີ່ດິນ, ການຈັບຈອງ ແລະ ຊື້-ຂາຍສິດນໍາໃຊ້ທີ່ດິນ, ການຫັນທີ່ດິນເປັນກຳມະສິດອື່ນ ທີ່ບໍ່ສອດຄ່ອງກັບກົດໝາຍມີທ່າອ່ຽງນັບມື້ເພີ່ມຂຶ້ນ; ການຫັນແຜນແມ່ບົດພັດທະນາທີ່ດິນແຫ່ງຊາດ ເປັນແຜນຈັດສັນທີ່ດິນຂັ້ນທ້ອງຖິ່ນ, ການຂຶ້ນທະບຽນ-ອອກໃບຕາດິນ ແລະ ການວາງແຜນຍຸດທະສາດພັດທະນາທີ່ດິນຕາມຂະແໜງການຍັງຊັກຊ້າ ແລະ ເຮັດໄດ້ໜ້ອຍ; ສະເໜີເພີ່ມທະວີການຄຸ້ມຄອງບັນດາໂຄງການລົງທຶນດ້ານແຮ່ທາດໃຫ້ເຂັ້ມງວດ, ແກ້ໄຂຢ່າງທັນການຕໍ່ບັນດາໂຄງການ ແລະ ກິດຈະການລົງທຶນແຮ່ທາດ ທີ່ບໍ່ມີປະສິດທິພາບ ບໍ່ມີມືອາຊີບ ຫລື ບໍ່ປະຕິບັດຕາມກົດໝາຍ, ບໍ່ປະຕິບັດຕາມສັນຍາ, ມີຜົນກະທົບຕໍ່ສິ່ງແວດລ້ອມທຳມະຊາດ ແລະ ສັງຄົມ; ໃຫ້ເອົາໃຈໃສ່ຄຸ້ມຄອງໂຄງການລົງທຶນໃຫ້ປະຕິບັດຕາມກົດໝາຍ ແລະ ສັນຍາ, ການແບ່ງຂັ້ນຄຸ້ມຄອງການສົ່ງເສີມການລົງທຶນລະຫວ່າງຂະແໜງການສູນກາງ ແລະ ທ້ອງຖິ່ນ ໃຫ້ມີຄວາມລະອຽດຈະແຈ້ງຕື່ມ; ສະເໜີໃຫ້ມີກົນໄກການພິຈາລະນາອະນຸມັດການລົງທຶນ ໃຫ້ໄປຕາມກຳນົດເວລາຂອງກົດໝາຍ ແລະ ມີທິດທາງຫັນເປັນດິຈີຕອນ ໃນການຄຸ້ມຄອງ ແລະ ສ້າງຄວາມສະດວກໃຫ້ແກ່ການລົງທຶນ ທັງຕອບສະໜອງຂໍ້ມູນທີ່ຈໍາເປັນໃຫ້ແກ່ນັກລົງທຶນ, ເອົາໃຈໃສ່ກວດກາ ແລະ ຄຸ້ມຄອງບັນດາໂຄງການສໍາຫລວດ, ຂຸດຄົ້ນແຮ່ທາດໃຫ້ຖືກຕ້ອງຕາມກົດໝາຍ, ເດັດດ່ຽວແກ້ໄຂໂຄງການທີ່ບໍ່ມີປະສິດທິພາບທີ່ລະເມີດກົດໝາຍ ແລະ ສັນຍາ; ເພີ່ມທະວີການຄຸ້ມຄອງຊັບສິນຂອງລັດໃຫ້ຮັດກຸມ, ຈະແຈ້ງ ແລະ ຄົບຖ້ວນ.

ກອງປະຊຸມໄດ້ພິຈາລະນາ ແລະ ຮັບຮອງເອົາ ບົດລາຍງານຂອງລັດຖະບານ ກ່ຽວກັບທິດທາງການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາ ຄານທຸລະກິດລັດ ເຊິ່ງກອງປະຊຸມເຫັນວ່າລັດຖະບານ ໄດ້ມີຄວາມພະຍາມຍາມ ປັບປຸງການເຄື່ອນໄຫວຂອງລັດວິສາຫະກິດ ໃຫ້ມີປະສິດທິຜົນ, ບໍ່ສ້າງໜີ້ສິນເພີ່ມແກ່ລັດຖະ ບານ ເຊິ່ງກອງປະຊຸມໄດ້ສະເໜີໃຫ້ລັດຖະບານ ມີການຄົ້ນຄວ້າກຳນົດກົນໄກ, ຂັ້ນຕ້ອນການພິຈາລະນາຕົກລົງຢ່າງລະອຽດ, ເລິກເຊິ່ງ ເພື່ອຮັບປະກັນຜົນປະໂຫຍດ ລວມຂອງປະເທດຊາດ ກໍຄື ປະຊາຊົນລາວບັນດາເຜົ່າ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງ ລັດຖະບານ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແພ່ລະບາດຂອງພະຍາດໂຄວິດ-19 ເຊິ່ງກອງປະຊຸມ ເຫັນໄດ້ຄວາມຈຳເປັນ ແລະ ຄວາມສໍາຄັນຂອງການສົ່ງເສີມການທ່ອງທ່ຽວສີຂຽວ ຂອງປະເທດເຮົາ ເພື່ອແນໃສ່ກະຕຸກຊຸກຍູ້ການຜະລິດ, ການຄ້າ ແລະ ການບໍລິການຂອງຂະແໜງການປິ່ນອອ້ມ ໃຫ້ສາມາດດຶງດູດນັກທ່ອງທ່ຽວພາຍໃນ ແລະ ຕ່າງປະເທດ, ສາມາດສ້າງລາຍຮັບເງິນຕາຕ່າງປະເທດ ເຂົ້າສູ່ງົບປະມານ, ປະກອບສ່ວນຕອບສະ ໜອງເງິນຕາໃຫ້ແກ່ປະເທດ. ກອງປະຊຸມ ໄດ້ສະເໜີໃຫ້ລັດຖະບານ ມີມາດຕະການແກ້ໄຂ ໃນການພັດທະນາໂຄງລ່າງພຶ້ນຖານ, ການໂຄສະນາ, ການຄຸ້ມຄອງ ແລະ ສ້າງຄວາມເຂັ້ມແຂງບຸກຄະລາກອນ, ການເອື້ອອຳນວຍການທ່ອງທ່ຽວ ເພື່ອໃຫ້ການທ່ອງ ທ່ຽວສີຂຽວສາມາດ ປະກອບສ່ວນສ້າງຄວາມເຂັ້ມແຂງໃຫ້ແກ່ເສດຖະກິດຂອງຊາດ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ບັນດາຄາດໝາຍໃນຂົງເຂດສຶກສາທິການ ແລະ ກິລາ ໂດຍສະເພາະ ການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍະກຳ ເຊິ່ງກອງປະຊຸມໄດ້ຕີລາຄາສູງຕໍ່ຄວາມພະຍາຍາມ ຂອງຂະແໜງການທີ່ກ່ຽວຂ້ອງທີ່ໄດ້ສຸມສະຕິປັນຍາ ເຂົ້າໃນການ ຈັດຕັ້ງປະຕິບັດບັນດາຄາດໝາຍຂົງເຂດສຶກສາທິການ-ກິລາ ໂດຍສະເພາະ ຟື້ນຟູການຮຽນ-ການສອນທຸກຊັ້ນ-ທຸກສາຍ ຫລັງຈາກການແພ່ລະບາດຂອງພະຍາດໂຄວິດ-19 ດ້ວຍລະບົບທາງໄກ (Online) ໃຫ້ສາມາດກັບຄືນເຂົ້າມາສູ່ການຮຽນໃນຫ້ອງຮຽນ ໃນສະພາບປົກກະຕິ ແລະ ເອົາໃຈໃສ່ປັບປຸງຄຸນນະພາບລະບົບການຮຽນ-ການສອນໃນໄລ ຍະໃໝ່ ແລະ ການຄຸ້ມຄອງວຽກງານກິລາ-ກາຍະກຳ ຮັບປະກັນເງື່ອນໄຂໃຫ້ນັກກິລາໄດ້ເຂົ້າຮ່ວມການແຂ່ງຂັນກິລາໃນລະດັບຕ່າງໆ ທັງພາຍໃນ ແລະ ຕ່າງປະເທດ ເຊິ່ງກອງປະຊຸມສະເໜີໃຫ້ລັດຖະບານ ສືບຕໍ່ຊີ້ນຳການຈັດຕັ້ງປະຕິບັດ 8 ຄາດໝາຍທີ່ບໍ່ທັນບັນລຸ ເປັນຕົ້ນ ອັດຕາປະລະການຮຽນ, ຄຸນນະພາບຂອງຄູສອນ, ການສົ່ງເສີມລູກຫລານເຂົ້າຮຽນຂອງຜູ້ປົກຄອງ, ເອົາໃຈໃສ່ຍົກສູງຄຸນນະພາບການສຶກສາໃນເຂດຊົນນະ ບົດຫ່າງໄກສອກຫລີກ ໃຫ້ໄດ້ຕາມມາດຕະຖານການສຶກສາແຫ່ງຊາດ; ພ້ອມກັນນັ້ນ, ກໍຕ້ອງເພີ່ມທະວີໃນການສ້າງຄວາມເຂັ້ມແຂງໃຫ້ແກ່ວຽກງານກິລາ-ກາຍະກຳ ໃນທຸກດ້ານ ໂດຍຕິດພັນກັບຫລັກສູດການຮຽນ-ການສອນ ໃນບັນດາສະຖາບັນການສຶກສາ, ຍູ້ແຮງຂະບວນການກິລາມະຫາຊົນ, ກິລາອາຊີບປະເພດຕ່າງໆ ທັງປັບປຸງການຈັດຕັ້ງສະມາ ຄົມ, ສະຫະພັນໃຫ້ມີຄຸນນະພາບ ເພື່ອຕອບສະໜອງກັບຄວາມຕ້ອງການກັບການພັດ ທະນາໃນຂົງເຂດດັ່ງກ່າວໃຫ້ມີການຫັນປ່ຽນດີຂຶ້ນ.

ກອງປະຊຸມໄດ້ຟັງການລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ການຕິດຕາມກວດກາການນຳໃຊ້ 7 ມາດຕະການສະກັດກັ້ນ ຂອງອົງການສືບ ສວນ-ສອບສວນ ຕາມທີ່ກຳນົດໄວ້ໃນມາດຕາ 136 ຂອງກົດໝາຍວ່າດ້ວຍການດໍາເນີນຄະດີອາຍາ ໂດຍສະເພາະ ການແກ້ໄຂການລະເມີດກົດໝາຍ ໃນການພາຕົວ, ກັກຕົວ, ຈັບຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ. ກອງປະຊຸມເຫັນດີຕໍ່ເນື້ອໃນຂອງບົດລາຍງານ ຂອງອົງການໄອຍະການປະຊາຊົນສູງສຸດ ແລະ ສະແດງຄວາມຊົມເຊີຍຕໍ່ອົງການໄອຍະການປະຊາຊົນສູງສຸດ ທີ່ໄດ້ມີຄວາມພະຍາຍາມຈັດຕັ້ງປະຕິບັດວາລະແຫ່ງຊາດ ເປັນແຜນງານ, ໂຄງການລະອຽດຂອງຕົນ ແລະ ຕິດຕາມ, ຊຸກຍູ້ການຈັດຕັ້ງປະຕິບັດ ໂດຍສົມທົບກັບກະຊວງປ້ອງກັນຄວາມສະຫງົບ ຢ່າງແໜ້ນແຟ້ນກົມກຽວ; ເອົາໃຈໃສ່ການຄົ້ນຄວ້າສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ ກ່ຽວກັບວຽກງານດັ່ງກ່າວໃຫ້ລະອຽດຕື່ມ; ເພີ່ມທະວີການຕິດຕາມກວດກາ ສະຖານທີ່ກັກຂັງ, ສະຖານທີ່ບຳບັດ-ປິ່ນປົວ, ການຝຶກສີມືແຮງງານ ໃຫ້ແກ່ຜູ້ຢູ່ໃນສະຖານທີ່ກັກຂັງ, ເພີ່ມທະວີການປະສານສົມທົບ ລະຫວ່າງ ອົງການໄອຍະການປະຊາຊົນ ກັບອົງ ການສືບສວນ, ສອບສວນ ໃນການດໍາເນີນຄະດີໃຫ້ມີຄວາມເປັນເອກະພາບ ແລະ ສອດຄ່ອງຕາມກົດໝາຍ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງ ຄະນະປະຈຳສະພາແຫ່ງຊາດ ກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາກອງປະຊຸມສະໄໝສາມັນ ເທື່ອທີ 3 ແລະ ແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ບົດລາຍງານຂອງຄະນະປະຈຳສະພາແຫ່ງຊາດ ກ່ຽວກັບຜົນການຕິດຕາມກວດກາວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດໃນຕໍ່ໜ້າ ເຊິ່ງກອງປະຊຸມເຫັນວ່າ ຕະຫລອດໄລຍະ 6 ເດືອນທີ່ຜ່ານມາ ສະພາແຫ່ງຊາດ ຊຸດທີ IX ໄດ້ມີຄວາມເປັນເຈົ້າການ, ຫ້າວຫັນໃນການຈັດ ຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ, ກົດໝາຍ ເຮັດໃຫ້ບົດບາດຂອງສະພາແຫ່ງຊາດ ໄດ້ຮັບການເຊີດຊູນັບມື້ສູງຂຶ້ນ, ໄດ້ຮັບຄວາມເຊື່ອໝັ້ນຈາກອົງການຈັດຕັ້ງລັດຂັ້ນຕ່າງໆນັບມື້ກວ້າງຂວາງ ແລະ ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນຜູ້ມີສິດເລືອກຕັ້ງ, ກອງປະຊຸມສະເໜີໃຫ້ເອົາ ໃຈໃສ່ປັບປຸງກົນໄກ, ວິທີການທາບທາມຮ່າງກົດໝາຍ, ການປະເມີນການປະຕິບັດກົດ ໝາຍ ໃຫ້ສອດຄ່ອງຕາມຄວາມຮຽກຮ້ອງໃນແຕ່ລະໄລຍະ ແລະ ທັນເວລາຂຶ້ນມີລັກສະ ນະລວມສູນຕື່ມ ແລະ ສະເໜີໃຫ້ເອົາໃຈໃສ່ປະຕິບັດກົນໄກ ການຕິດຕາມກວດກາຢ່າງມີຈຸດສຸມ, ຮ່ວມກັບລັດຖະບານແກ້ໄຂບັນຫາຕ່າງໆຢ່າງທັນການ.

ກອງປະຊຸມ ໄດ້ພິຈາລະນາ ແລະ ຮັບຮອງເອົາກົດໝາຍສ້າງໃໝ່ ແລະ ປັບປຸງທັງໝົດ 9 ສະບັບໃນນັ້ນ, ກົດໝາຍສ້າງໃໝ່ 3 ສະບັບ ຄື: ກົດໝາຍວ່າດ້ວຍວິຈິດສິນ; ກົດໝາຍວ່າດ້ວຍຄວາມປອດໄພຂອງເຂື່ອນ, ກົດໝາຍວ່າດ້ວຍການຄຸ້ມຄອງອາ ວຸດ ແລະ ວັດຖຸລະເບີດ ແລະ ກົດໝາຍປັບປຸງ 6 ສະບັບ ຄື: ກົດໝາຍວ່າດ້ວຍຊັບສິນຂອງລັດ, ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ, ກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ; ກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສານປະຊາຊົນ; ກົດໝາຍວ່າດ້ວຍການແກ້ໄຂຄຳຮ້ອງທຸກ ແລະ ກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ເຊິ່ງເປັນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍໄລຍະ 5 ປີຂອງສະພາແຫ່ງຊາດ ຊຸດທີ IX ທັງເປັນການປະ ກອບສ່ວນສຳຄັນ ໃນການປັບປຸງ ແລະ ເພີ່ມທະວີພາຫະນະ, ເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງປະເທດເຮົາ ໃຫ້ເປັນລະບົບຄົບຊຸດ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງຊາດ, ຂອງລັດ, ລວມໝູ່, ນິຕິບຸກຄົນ ແລະ ປະ ຊາຊົນລາວບັນດາເຜົ່າ, ຮັບປະກັນໃຫ້ແກ່ສ້າງລັດ ປະຊາທິປະໄຕ ປະຊາຊົນ ຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ ເທື່ອລະກ້າວ.

ກອງປະຊຸມຍັງໄດ້ຮັບຟັງການລາຍງານຂອງ ຄະນະປະຈຳສະພາແຫ່ງຊາດ ກ່ຽວກັບການຍົກຍ້າຍ, ແຕ່ງຕັ້ງຮອງປະທານກຳມາທິການຈຳນວນໜຶ່ງ ຂອງສະພາແຫ່ງຊາດ ແລະ ການເລືອກຕັ້ງແທນສະມາຊິກສະພາແຫ່ງຊາດທີ່ວ່າງລົງ ເຊິ່ງກອງປະຊຸມໄດ້ຄົ້ນຄວ້າພິຈາລະນາ ແລະ ເລືອກຕັ້ງເອົາ ທ່ານ ວຽງທະວີສອນ ເທບພະຈັນ ເປັນປະທານອົງການກວດສອບແຫ່ງລັດຄົນໃໝ່ ຕາມຄຳສະເໜີຂອງທ່ານປະທານປະເທດ; ພິຈາລະນາຮັບຮອງເອົາການແຕ່ງຕັ້ງຮອງນາຍົກລັດຖະມົນຕີຄື: ທ່ານ ພົນເອກ ວິໄລ ຫລ້າຄຳຟອງ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນຄວາມສະຫງົບ, ທ່ານ ສະເຫລີມໄຊ ກົມມະສິດ ເປັນຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດ; ຮັບຮອງເອົາການຍົກຍ້າຍ ແລະ ແຕ່ງຕັ້ງ ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄປຮັບໜ້າທີ່ໃໝ່ເປັນລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄປຮັບໜ້າທີ່ໃໝ່ເປັນລັດຖະມົນຕີ ປະຈຳສຳນັກ ງານນາຍົກລັດຖະມົນຕີ, ແຕ່ງຕັ້ງ ທ່ານ ມະໄລທອງ ກົມມະສິດ ເປັນລັດຖະມົນຕີກະ ຊວງອຸດສາຫະກຳ ແລະ ການຄ້າ, ຍົກຍ້າຍ ແລະ ແຕ່ງຕັ້ງ ທ່ານ ບຸນເຫລືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໄປຮັບໜ້າທີ່ໃໝ່ເປັນຜູ້ວ່າການທະນາຄານແຫ່ງ ສປປ ລາວ ຕາມຄຳສະເໜີຂອງທ່ານນາຍົກລັດຖະມົນຕີ.

ຂ່າວ: ທະນູທອງ

ພາບ: ອ່າຍຄຳ