ຄະນະຜູ້ແທນຂັ້ນສູງ ແຂວງສະຫວັນນະເຂດ ແລະນະຄອນດານັງ ພົບປະແລກປ່ຽນບົດຮຽນຮ່ວມກັນ

ກອງປະຊຸມພົບປະລະຫວ່າງຄະນະຜູ້ແທນຂັ້ນສູງຂອງແຂວງສະຫວັນນະເຂດ ສປປ ລາວ ແລະ ຄະນະຜູ້ແທນຂັ້ນສູງນະຄອນດານັງ ສສ ຫວຽດນາມ ໄດ້ຈັດຂຶ້ນໃນຄັ້ງວັນທີ 7 ກໍລະກົດ 2022 ທີ່ຫ້ອງປະຊຸມຫ້ອງວ່າການປົກຄອງແຂວງສະຫວັນນະເຂດຝ່າຍແຂວງສະຫວັນນະເຂດ ນຳໂດຍທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ,ຝ່າຍນະຄອນດານັງ ນຳໂດຍທ່ານ ຫງວຽນ ວັນ ກວ່າງ, ກໍາມະການສູນກາງພັກ, ເລຂາຄະນະພັກນະຄອນດານັງ,ຫົວໜ້າຄະນະຜູ້ແທນສະມາຊິກສະພາແຫ່ງຊາດນະຄອນດານັງ.

ໂອກາດດັ່ງກ່າວ ທ່ານ ສັນຕິພາບ ພົມວິຫານ ກໍ່ໄດ້ກ່າວຕ້ອນຮັບຄະນະຜູ້ແທນຂັ້ນສູງນະຄອນດານັງ ສສ ຫວຽດນາມ ໂດຍບາງຕອນທ່ານໄດ້ກ່າວວ່າ: ປີ 2022 ເປັນປີທີ່ມີຄວາມໝາຍສຳຄັນ ຂອງສອງຊາດລາວ - ຫວຽດນາມ,ລັດຖະບານສອງປະເທດໄດ້ປະກາດເປັນປີສາມັກຄີມິດຕະພາບລາວ - ຫວຽດນາມ, ຫວຽດນາມ - ລາວ 2022, ການນໍາຂັ້ນສູງຂອງສອງພັກ, ສອງລັດໄດ້ມີການຢ້ຽມຢາມສັນຖະວະໄມຕີ - ມິດຕະພາບເຊິ່ງກັນ ແລະ ກັນ ເພື່ອເສີມສ້າງບັນຍາກາດແຫ່ງການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ - ຫວຽດນາມ,ຫວຽດນາມ - ລາວ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບການຮ່ວມມືລະຫວ່າງລາວ - ຫວຽດນາມ, ຫວຽດນາມ - ລາວ ຄົບຮອບ 45 ປີໃຫ້ມີເນື້ອໃນເລິກເຊິ່ງ ແລະ ເປັນຂະບວນການຟົດຟື້ນຍິ່ງຂຶ້ນ. ພ້ອມນີ້ທ່ານເຈົ້າແຂວງສະຫວັນນະເຂດ ກໍ່ຍັງໄດ້ຕີລາຄາສູງຕໍ່ຜົນສຳເລັດໃນການພົວພັນຮ່ວມມື ລະຫວ່າງ ແຂວງສະຫວັນນະເຂດ ກັບ ນະຄອນດານັງ ເປັນຕົ້ນແມ່ນ: ດ້ານການເມືອງ, ວັດທະນະທຳ - ສັງຄົມ ໄດ້ຮັບການສົ່ງເສີມຢ່າງເປັນຮູບປະທຳດີພໍສົມຄວນສຳລັບການຮ່ວມມືທາງດ້ານເສດຖະກິດຍັງມີສິ່ງທ້າຍທາຍຫຼາຍດ້ານ ແລະຄວນຈະໄດ້ຮັບການຊຸກຍູ້ສົ່ງເສີມຢ່າງແຂງແຮງເພື່ອໃຫ້ເກີດເປັນຮູບປະທຳທັງເປັນສັນຍາລັກແຫ່ງການຮ່ວມມືໃນໄລຍະໃໝ່.

ຈາກນັ້ນທ່ານ ຫວງຽນ ວັນ ກວ່າງ ກໍ່ໄດ້ຕາງໜ້າໃຫ້ຄະນະຜູ້ແທນນະຄອນດານັງ ມີຄຳເຫັນກ່ຽວກັບການພົບປະແລກປ່ຽນ ຂອງຄະນະຜູ້ແທນຄັ້ງນີ້ ຈຸດປະສົງກໍ່ເພື່ອໃຫ້ສອງທ້ອງຖິນພວກເຮົ ຊຸກຍູ້, ສ້າງເງື່ອນໄຂອໍານວຍຄວາມສະດວກໃຫ້ແກ່ບັນດາອົງການຈັດຕັ້ງພັກ-ລັດ ພະແນກການ, ຂະແໜງການ, ອົງການຈັດຕັ້ງການເມືອງ-ສັງຄົມ-ມະຫາຊົນ ໃຫ້ມີການພົບປະແລກປ່ຽນເຊິ່ງກັນແລະກັນສຳລັບວຽກງານການຄ້າ-ການລົງທຶນແມ່ນສາມາດຊ່ວຍກັນຍູ້ແຮງເພີ່ມຕື່ມການພົວພັນ, ເຊື່ອມໂຍງທາງເສດຖະກິດ, ສ້າງເງື່ອນໄຂອຳນວຍຄວາມສະດວກໃຫ້ ນັກທຸລະກິດຂອງສອງຝ່າຍ ໄດ້ມີໂອກາດຊອກຮູ້ກະລະໂອກາດໃນການລົງທຶນ, ຜັນຂະຫຍາຍກິດຈະກໍາສົ່ງເສີມການຄ້າ, ນໍາເອົາບັນດາສິນຄ້າຂອງທ້ອງຖິ່ນ ໃຫ້ເຂົ້າເຖິງຕະຫຼາດຂອງກັນແລະກັນ ພ້ອມນີ້ ທ່ານ ຫວງຽນ ວັນ ກວ່າງ ກໍ່ຍັງໄດ້ເຊີນຊວນນັກທຸລະກິດຝ່າຍແຂວງສະຫວັນນະເຂດ ທີ່ມີຈຸດປະສົງຢາກຈະໄປລົງທຶນ ດຳເນີນທຸລະກິດຢູ່ທີ່ນະຄອນດານັງ ກໍ່ສາມາດໄປລົງທຶນໄດ້ ແລະ ທາງຝ່າຍນະຄອນດານັງກໍ່ຈະອຳນວຍຄວາມສະດວກໃຫ້ຕາມຄວາມເໝາະສົມ.

ຈາກນັ້ນໃນພິທີກໍ່ໄດ້ມີການລົງນາມເຊັນບົດບັນທຶກຊ່ວຍຈຳການຮ່ວມມືໄລຍະ 2023 – 2027 ໃຫ້ກຽດລົງນາມເຊັນບົດບັນທຶກຝ່າຍແຂວງສະຫວັນນະເຂດໂດຍແມ່ນ ທ່ານ ນາງ ຫຼິງທອງ ແສງຕາວັນ ກຳມະການປະຈຳພັກແຂວງ ຮອງເຈົ້າແຂວງສະຫວັນນະເຂດ, ຝ່າຍນະຄອນດານັງໂດຍແມ່ນທ່ານ ໂຮ່ ກີ່ ມິງ ກຳມະການປະຈຳພັກນະຄອນ ຮອງປະທານຜູ້ປະຈຳການຄະນະກຳມະການປະຊາຊົນນະຄອນໂດຍຊ່ອງໜ້າຄະນະຜູ້ແທນຂັ້ນສູງທັງສອງຝ່າຍ.

ພ້ອມນີ້ຄະນະຜູ້ແທນນະຄອນດານັງກໍ່ຍັງໄດ້ມອບເງິນຈຳນວນ 500 ລ້ານດົ່ງໃຫ້ກັບແຂວງສະຫວັນນະເຂດ ແລະຄະນະຜູ້ແທນທັງສອງຝ່າຍກໍ່ໄດ້ຜັດປ່ຽນກັນມອບຂອງຂັວນທີ່ລະນຶກໃຫ້ເຊິ່ງກັນ ແລະກັນນຳອີກ

แชร์