ທ່ານເອກອັກຄະລັດຖະທູດລາວ ເດີນທາງໄປຢ້ຽມຢາມ ນະຄອນຊົງຊິ້ງ ສປ ຈີນ ຢ່າງເປັນທາງການ

ໃນລະຫວ່າງວັນທີ 04-08 ກໍລະກົດ 2022 ທ່ານ ນາງ ຄຳເພົາ ເອີນທະວັນ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ໄດ້ເດີນທາງໄປຢ້ຽມຢາມເຮັດວຽກຢູ່ນະຄອນຊົງຊິ້ງ, ສປ ຈີນ ຕາມໜັງສືເຊື້ອເຊີນຂອງພະແນກການຕ່າງປະ ເທດນະຄອນຊົງຊິ້ງ. ໃນວັນທີ 5 ກໍລະ ກົດ 2022 ທ່ານ ເອກອັກຄະລັດຖະທູດລາວ ໄດ້ເຂົ້າຢ້ຽມຂໍ່ານັບ ທ່ານ ຮູເຮີງຮົວ, ຮອງເລຂາພັກນະຄອນຊົງຊິ້ງ, ເຈົ້າຄອງນະຄອນຊົງຊິ້ງ. ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ, ສອງລັດ ແລະປະຊາຊົນສອງຊາດລາວ ແລະຈີນ ໃນໄລຍະຜ່ານມາກໍ່ຄືໃນປັດຈຸບັນ, ການຮ່ວມມືທີ່ພົ້ນເດັ່ນລະຫວ່າງສອງປະເທດລາວ ແລະ ຈີນ ທີ່ໄດ້ນໍາເອົາຜົນປະໂຫຍດມາສູ່ສອງປະເທດກໍ່ຄືປະຊາຊົນສອງຊາດລາວ ແລະ ຈີນ, ເປັນຕົ້ນແມ່ນໂຄງການລົດໄຟລາວ-ຈີນ, ໂຄງການແລວເສດຖະກິດລາວ-ຈີນ ແລະອື່ນໆ, ໂດຍສະເພາະແມ່ນໂຄງການລົດໄຟລາວ-ຈີນ, ຊຶ່ງໄດ້ເປີດນໍາໃຊ້ຢ່າງເປັນທາງການໃນວັນທີ 3 ທັນວາ 2021 ໂດຍເປັນກຽດກົດປຸ່ມເປີດຂະບວນລົດໄຟຖ້ຽວທໍາອິດຂອງສອງສະຫາຍເລຂາທິການໃຫຍ່ຂອງພັກລາວແລະຈີນ.

ໂຄງການດັ່ງກ່າວນີ້,ໄດ້ກາຍເປັນໂຄງການແຫ່ງສັນຍາລັກມິດຕະພາບລາວ-ຈີນ, ເປັນການເຊື່ອມໂຍງແຜນຍຸດທະສາດການຫັນປະເທດລາວຈາກບໍ່ມີຊາຍແດນຕິດກັບທະເລ ມາເປັນປະເທດເຊື່ອມໂຍງເຊື່ອມຈອດໃນພາກພື້ນ ແລະອະນຸພາກພື້ນ ແລະເປັນການສະໜັບສະໜູນຂໍ້ລິເລີ່ມໜຶ່ງແລວໜຶ່ງເສັ້ນທາງ ຂອງ ສປ ຈີນ. ສອງຝ່າຍຕີລາຄາສູງຕໍ່ການພົວພັນຮ່ວມມືເສດຖະກິດ, ການຄ້າ ແລະການລົງທຶນ ລະຫວ່າງ ສປປ ລາວ ແລະ ນະຄອນຊົງຊິ້ງ ໄດ້ມີບາດກ້າວໃໝ່,ໂດຍສະເພາະແມ່ນຜ່ານການນຳໃຊ້ລົດໄຟລາວ-ຈີນ ສົມທົບກັບແຜນຍຸດທະສາດເສັ້ນທາງບົກ ແລະທາງທະເລຂອງນະຄອນຊົງຊິ້ງ, ສອງຝ່າຍເຊື່ອໝັ້ນວ່າການພົວພັນຮ່ວມມືລະຫວ່າງ ສປປ ລາວ ແລະນະຄອນຊົງຊິ້ງຈະມີຜົນສຳເລັດອັນໃໝ່ ແລະໃຫຍ່ຫຼວງກວ່າເກົ່າ. ໃນມື້ດຽວກັນ ທ່ານເອກອັກຄະລັດຖະທູດລາວຍັງໄດ້ເຂົ້າຮ່ວມມີຄຳເຫັນໃນກອງປະຊຸມ

ແນະນຳກາລະໂອກາດອັນໃໝ່ພາຍໃຕ້ຫົວຂອບການຮ່ວມມື RCEP ແລະ ການຮ່ວມມືທາງດ້ານເສດຖະກິດ-ການຄ້າ ລະຫວ່າງ ສປປ ລາວ ແລະ ສປ ຈີນ, ນະຄອນຊົງຊິ້ງ, ຊຶ່ງຮ່ວມກັນຈັດໂດຍສະຖານເອກອັກຄະລັດຖະທູດລາວ ແລະຄະນະກຳມະທິການເສດຖະກິດ ແລະຄະນະກຳມະທິການເສດຖະກິດ-ການຄ້ານະຄອນຊົງຊິ້ງ. ສອງຝ່າຍເຊື່ອໝັ້ນວ່າອີງໃສ່ເຕັກນິກ ແລະ ທຶນຮອນຂອງຝ່າຍຈີນບວກກັບທ່າແຮງບົ່ມຊ້ອນຫຼາຍດ້ານຂອງ ສປປ ລາວ, ຈະເຮັດໃຫ້ການຮ່ວມມືສອງຝ່າຍ ໄດ້ຮັບໝາກຜົນເປັນຢ່າງດີທີ່ຈະນຳເອົາຜົນປະໂຫຍດມາສູ່ສອງຝ່າຍ. ພ້ອມນັ້ນ, ທ່ານເອກອັກຄະລັດຖະທູດລາວ ຍັງໄດ້ເຂົ້າຮ່ວມເປັນສັກຂິພິຍານຮ່ວມກັບການນຳນະຄອນຊົງຊິ້ງໃນການເຊັນສັນຍາການຮ່ວມມືທາງດ້ານທຸລະກິດ-ການຄ້າ ແລະການຮ່ວມມືທາງດ້ານອາຊີວະສຶກສາ ຈຳນວນ 7 ສະບັບ. ນອກຈາກນັ້ນ, ທ່ານເອກອັກຄະລັດຖະທູດລາວພ້ອມດ້ວຍຄະນະໄດ້ໄປຢ້ຽມຢາມສູນກະຈາຍສິນຄ້ານໍາເຂົ້າ ແລະ ສົ່ງອອກ ລາວ-ຈີນ(ຊົງຊິ້ງ), ເຂົ້າຮ່ວມພິທີໄຂຕູ້ສິນຄ້ານຳເຂົ້າໂດຍຜ່ານລົດໄຟລາວ-ຈີນ ຕາມແລວຂົນສົ່ງທາງບົກ-ທາງທະເລແບບໃໝ່ (New Land-Sea corridor) ແລະ ໄດ້ໄປຢ້ຽມຊົມຫໍວາງສະແດງຜັງນະຄອນຊົງຊິ້ງ ແລະ ເຂດທ່ອງທ່ຽວມໍລະດົກໂລກອູຫລົງນະຄອນຊົງຊິ້ງຕື່ມອີກ.

แชร์