ລັດຖະມົນຕີກະຊວງກະສິກໍາ ແລະປ່າໄມ້ ຕ້ອນຮັບທູດອິດສະຣາແອນ

ໃນວັນທີ 5 ກໍລະກົດ 2022 ຜ່ານມາ, ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະປ່າໄມ້ ໄດ້ຕ້ອນຮັບການເຂົ້າຢ້ຽມຂ່ານັບຂອງ ທ່ານ ນາດາບ ເອັສກາ (Nadav Eshcar) ເອກອັກຄະລັດຖະທູດ ແຫ່ງ ອິດສະຣາແອນ ປະຈໍາ ສປປ ລາວ ພ້ອມຄະນະເພື່ອລາຍງານ ແລະປຶກສາຫາລືແລກປ່ຽນບົດຮຽນວຽກງານການຮ່ວມຂອງທັງ 2 ປະເທດໃນໄລຍະຜ່ານມາໂດຍສະເພາະການຮ່ວມມືໃນຂົງເຂດວຽກງານກະສິກໍາເຊິ່ງມີສາຍພົວພັນການຮ່ວມມືທີ່ຍາວນານສິ່ງທີ່ພົ້ນເດັ່ນແມ່ນວຽກງານການແລກປ່ຽນທຶນການສຶກສາທີ່ຝ່າຍລາວໄດ້ສົ່ງນັກສຶກສາໄປທັດສະນະສຶກສາ ແລະປະຕິບັດວຽກງານຕົວຈິງໃນຂະແໜງການກະສິກໍາ.

ໂອກາດນີ້,ທ່ານ ເພັດ ພົມພິພັກ ໄດ້ສະແດງຄວາມຊົມເຊີຍຕໍ່ ທ່ານເອກອັກຄະລັດຖະທູດ ທີ່ໄດ້ໃຫ້ການຊ່ວຍເຫລືອ ແລະສະໜັບສະໜູນວຽກງານການຮ່ວມມືໃນຂະແໜງ ກະສິກໍາໃນໄລຍະຜ່ານມາ. ພ້ອມນີ້, ໄດ້ອວຍພອນໃຫ້ທ່ານທູດຈົ່ງປະສົບຜົນສໍາເລັດໃນການຮັບໜ້າທີ່ໃໝ່ ແລະມີກຽດທີ່ຍິ່ງໃຫຍ່ກວ່າເກົ່າໃນຕໍ່ໜ້າ.

ທ່ານ Nadav Eshcar ກໍໄດ້ສະແດງຄວາມຂອບໃຈຕໍ່ລັດຖະບານລາວກໍຄືການນໍາກະຊວງກະສິກໍາ ແລະປ່າໄມ້ທີ່ໄດ້ໃຫ້ການສະໜັບສະໜູນ ແລະອໍານວຍຄວາມສະດວກ ໃນການປະຕິບັດໜ້າທີ່ໃນ ນາມທູດອິດສະຣາແອນ ໃນໄລຍະ 5 ປີ ຜ່ານມາ ແລະ ໃນທ້າຍປີ 2022 ນີ້ແມ່ນຈະສິ້ນສຸດວາລະປະຕິບັດໜ້າທີ່. ເພື່ອເປັນການສືບຕໍ່ວຽກງານການຮ່ວມມືໃຫ້ນັບມື້ນັບກວ້າງຂວາງ, ທ່ານເອກອັກຄະລັດຖະທູດໄດ້ເຊື້ອເຊີນໃຫ້ທ່ານລັດຖະມົນຕີກະຊວງກະຊວງກະສິກໍາ ແລະປ່າໄມ້ໄປຢ້ຽມຢາມປະເທດອິດສະຣາ ແອນ ເພື່ອປຶກສາຫາ ແລະຊອກທ່າແຮງເພື່ອຂະຫຍາຍວຽກງານການຮ່ວມມືຂອງທັງ 2 ປະເທດໃນຕໍ່ໜ້າໃຫ້ສອດຄອງກັບສະພາບຕົວຈິງ.
ຂໍ້ມູນ: ກະຊວງກະສິກຳ ແລະປ່າໄມ້

แชร์