ທູດລາວ ຍື່ນສານຕາຕັ້ງຕໍ່ຜູ້ສຳເລັດຣາຊະການນິວຊີແລນ

ໃນວັນທີ 30 ມິຖຸນາຜ່ານມາ, ທີ່ນະຄອນຫຼວງເວວລິງຕັນ, ທ່ານ ສິນໃຈ ມະນີວັນ ໄດ້ສໍາເລັດການຍື່ນສານຕາຕັ້ງຕໍ່ທ່ານ ນາງ ແດມ ຊິນດີ ຄິໂຣ (Dame Cindy Kiro), ຜູ້ສຳເລັດຣາຊະການນິວຊີແລນ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາປະເທດນິວຊີແລນໂດຍມີສໍານັກງານສະຖານທູດຕັ້ງຢູ່ນະຄອນຫລວງແຄນເບີຣາ, ປະເທດອົດສະຕຣາລີ.

ໂອກາດນີ້, ທ່ານ ນາງ ແດມ ຊິນດີ ຄິໂຣ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະຊົມເຊີຍ ທ່ານ ສິນໃຈ ມະນີວັນ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ປະເທດ ນິວຊີແລນ. ພ້ອມທັງ ໄດ້ສະແດງຄວາມຂອບໃຈ ສປປ ລາວ ທີ່ໄດ້ໃຫ້ການຮ່ວມມື ແລະສະໜັບສະໜູນນິວຊີແລນ ໃນເວທີພາກພື້ນ ແລະສາກົນ ພ້ອມທັງກ່າວວ່າ ນິວຊີແລນ ຈະສືບຕໍ່ໃຫ້ການຊ່ວຍເຫລືອ ແລະ ຮ່ວມມືທີ່ເໝາະສົມກັບ ສປປ ລາວ.

ທ່ານທູດ ສິນໃຈ ມະນີວັນ ໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊ ອັນປະເສີດຈາກທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຝາກເຖິງຜູ້ສຳເລັດຣາຊະການ ນິວຊີແລນ ແລະ ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ການອໍານວຍຄວາມສະດວກຕ່າງໆ ໃນການຈັດພິທີຍື່ນສານຕາຕັ້ງໃຫ້ແກ່ທູດລາວໃນຄັ້ງນີ້. ພ້ອມນີ້, ທ່ານທູດ ກໍໄດ້ຕາງໜ້າໃຫ້ ລັດຖະບານ ແລະປະຊາຊົນ ແຫ່ງ ສປປ ລາວ ສະແດງຄວາມຂອບໃຈຕໍ່ລັດຖະບານກໍຄືປະຊາຊົນນິວຊີແລນ ທີ່ໄດ້ໃຫ້ການຊ່ວຍເຫລືອ ແລະສະໜັບສະໜູນ ສປປ ລາວ ໃນໄລຍະຜ່ານມາໂດຍສະເພາະຂົງເຂດການສຶກສາ ແລະການພັດທະນາຊັບພະຍາກອນມະນຸດ, ກະສິກໍາ-ປ່າໄມ້, ການທ່ອງທ່ຽວ, ການຄຸ້ມຄອງຊັບພະຍາກອນນໍ້າ ແລະນໍາໃຊ້ພະລັງງານທົດແທນ,ການເກັບກູ້ລະເບີດບໍ່ທັນແຕກ ແລະອື່ນໆ ອັນໄດ້ປະກອບສ່ວນສຳຄັນເຂົ້າໃນການສ້າງສາພັດທະນາປະເທດ ແລະຫວັງວ່າຈະສືບຕໍ່ໄດ້ຮັບການຊ່ວຍເຫລືອໃນຊຸມປີຕໍ່ໜ້າ.

ສປປ ລາວ ແລະນິວຊີແລນ ໄດ້ສ້າງຕັ້ງສາຍພົວພັນການທູດຮ່ວມກັນນັບແຕ່ວັນທີ 7 ກຸມພາ 1963 ເປັນຕົ້ນມາ.
ຂ່າວ-ພາບ: ກຕທ

• 07/07/2022