ສະພາແຫ່ງຊາດ ພິຈາລະນາຮ່າງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ

ການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດ IX  ຕອນເຊົ້າວັນທີ 6 ກໍລະກົດ 2022 ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ເປັນກຽດເຂົ້າຮ່ວມຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໃນກອງປະຊຸມ ຜູ້ແທນກອງປະຊຸມ ໄດ້ຮັບຟັງ ແລະປະກອບຄໍາເຫັນເຂົ້າໃສ່ ການປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ທີ່ສະເໜີໂດຍທ່ານນາງບຸນຄໍາ ວໍລະຈິດ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຊຶ່ງກົດ   ໝາຍສະບັບນີ້ປະກອບມີ 5 ພາກຄື:  ສະພາບການປະຕິບັດກົດໝາຍວ່າດ້ວຍນໍ້າ ແລະຊັບພະຍາກອນນໍ້າ , ເຫດຜົນ ແລະ ຄວາມຈໍາເປັນໃນການປັບປຸງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ສະພາບການປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ໂຄງປະກອບຂອງຮ່າງກົດໝາຍ ວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ແລະ ຄາດຄະເນຜົນໄດ້ຮັບ ພາຍຫລັງການຮັບຮອງຮ່າງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນໍ້າ ແລະຊັບພະຍາກອນນໍ້າ.

ກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ສະບັບປັບປຸງປີ 2017 ໄດ້ເປັນການຜັນຂະຫຍາຍແນວທາງຂອງພັກ, ນະໂຍບາຍຂອງລັດ ກ່ຽວກັບການຄຸ້ມຄອງນໍ້າ ແລະ ຊັບພະຍາກອນນໍ້າ ໄດ້ວາງອອກແຕ່ລະໄລຍະ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕິດພັນກັບການປົກປັກຮັກສາສິ່ງແວດລ້ອມ ຕາມທິດສີຂຽວ ແລະຍືນຍົງນັບມື້ດີຂຶ້ນເທື່ອລະກ້າວ. ຜ່ານການຈັດຕັ້ງປະຕິບັດກົດໝາຍສະບັບນີ້ເຫັນວ່າ ວຽກງານຄຸ້ມຄອງນໍ້າ ແລະຊັບພະຍາກອນນໍ້າ ໂດຍສະເພາະການອ່ວາຍແລ້ວນໍ້າ ແມ່ນຍັງບໍ່ອະນຸຍາດໃຫ້ບຸກຄົນ, ນິຕິບຸກຄົນ ແລະການຈັດຕັ້ງດໍາເນີນການອ່ວາຍແລວນໍ້າ ຕາມທີ່ກໍານົດໄວ້ໃນມາດຕາ 67 ຂໍ້3 ຂອງກົດໝາຍສະບັບນີ້ , ແຕ່ເນື່ອງຈາກສະພາບການພັດທະນາ  ເສດຖະກິດ-ສັງຄົມໃນໄລຍະໃໝ່ ຊຶ່ງມີຄວາມຈໍາເປັນຕ້ອງມີການອ່ວາຍແລວນໍ້າ ເພື່ອເປົ້າໝາຍໃນການນໍາໃຊ້ນໍ້າ, ອ່ວາຍແລ້ວນໍ້າ ຫຼື ຈຸດປະສົງອື່ນ, ສະນັ້ນ ຈຶ່ງເກີດມີສະພາບການຂໍອະນຸຍາດໃນການຍົກເວັ້ນການປະຕິບັດມາດຕາດັ່ງກ່າວ, ໂດຍໄດ້ຂໍອະນຸຍາດດໍາເນີນການອ່ວາຍນໍ້າໃນໂຄງການຈໍານວນນຶ່ງ ເປັນຕົ້ນ: ການອ່ວຍແລວນໍ້າ ນໍ້ກອກ ແລະຫ້ວຍຄຽງຂອງໂຄງການຂະຫຍາຍບໍ່ຄໍາເຊໂປນ, ການອ່ວຍແລວນໍ້າເຊກອງຂອງໂຄງການໄຟຟ້າພະລັງງານຄວາມຮ້ອນເຊກອງ ອັນເປັນສາເຫດ ແລະ ຄວາມຈໍາເປັນທີ່ຕ້ອງໄດ້ປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະຊັບພະຍາກອນນໍ້າສະບັບປັບປຸງປີ 2017, ແນໃສ່ເພື່ອເຮັດໃຫ້ວຽກງານການອ່ວຍແລ້ວນໍ້າມີ ຄວາມຖືກຕ້ອງຕາມກົດໝາຍ ແລະ ສອດຄ່ອງກັບສະພາບຄວາມເປັນຈິງໃນໄລຍະໃໝ່.

       ກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ສະບັບປັບປຸງ ໄດ້ຖືກນໍາໃຊ້ມາເປັນເວລາ 5 ປີ, ຜ່ານການຈັດຕັ້ງປະຕິບັດຜ່ານມາ ເຫັນວ່າເນື້ອໃນຂອງກົດໝາຍສະບັບນີ້ ຍັງບໍ່ທັນຄົບຖ້ວນແລະຈະແຈ້ງ ໂດຍສະເພາະການກໍານົດການອ່ວາຍແລວນໍ້າ ຊຶ່ງເຮັດໃຫ້ການປະຕິບັດບໍ່ເປັນເອກະພາບກັນ , ການກໍານົດຄວາມຮັບຜິດຊອບຂອງການອ່ວາຍແລວນໍ້າ ແມ່ນຍັງບໍ່ທັນໄດ້ລະບຸຄວາມໝາຍ ແລະ ບໍ່ທັນສອດຄ່ອງກັບການພັດທະນາໃນໄລຍະໃໝ່. ຈາກສະພາບການດັ່ງກ່າວ, ເພື່ອເຮັດໃຫ້ກົດໝາຍສະບັບນີ້ມີຄວາມຊັດເຈນກວ່າເກົ່າ, ສອດຄ່ອງກັບສະພາບ ແລະ ຄວາມຮຽກຮ້ອງຕ້ອງການຂອງວຽກງານນໍ້າ ແລະ ຊັບພະຍາກອນນໍ້າໃນປະຈຸບັນ, ແລະ ອະນາຄົດວິໄສທັດ ຍຸດທະສາດ ແລະແຜນພັດທະນາເສດຖະກິດ ສັງຄົມແຫ່ງຊາດ ແລະ ຫຼັກການຂອງສາກົນ ກະຊວງຊັບພະຍາກອນທໍາມະຊາດ ແລະສິ່ງແວດລ້ອມຈຶ່ງສະເໜີປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ສະບັບປັບປຸງປີ 2017 ຄື: ມາດຕາ 36 ເປົ້າໝາຍການນໍາໃຊ້ແຫ່ລງນໍ້າ, ແລະ ມາດຕາ 67 ຂໍ້ຫ້າມ ແນໃສ່ເພື່ອເຮັດໃຫ້ການຄຸ້ມຄອງ, ການປົກປັກຮັກສາ, ການນໍາໃຊ້, ການພັດທະນາ ແລະຂຸດຄົ້ນຊັບພະຍາກອນນໍ້າ ຮັບປະກັນທາງດ້ານຄຸນນະພາບ ແລະປະລິມານ, ຫລຸດຜ່ອນຜົນກະທົບອັນບໍ່ດີຕໍ່ຊີວິດ ແລະ ສິ່ງແວດລ້ອມໃຫ້ມີຄວາມຍືນຍົງ.

      ສໍາລັບເນື້ອໃນທີ່ມີການປັບປຸງ ແລະ ເພີ່ມເຂົ້າໃໝ່ປະກອບມີ:  ພາກທີ V ການນຳໃຊ້ ແລະ ການບໍລິການກ່ຽວກັບນໍ້າ ແລະ ຊັບພະຍາກອນນໍ້າ, ໝວດທີ I ການນຳໃຊ້ນໍ້າ ແລະ ຊັບພະຍາກອນນໍ້າ ໄດ້ປັບປຸງ I ມາດຕາ ແລະ ເພີ່ມໃຫມ່ 2 ມາດຕາ ຄື: ມາດຕາ 36 (ປັບປຸງ) ເປົ້າໝາຍການນໍາໃຊ້ແຫຼ່ງນໍ້າ, ມາດຕາ 36/1 ການອວ່າຍແລວນໍ້າ, ມາດຕາ 36/2 ອົງການລັດທີ່ມີສິດຕົກລົງການອວ່າຍແລວນໍ້າ,  ຄາດຄະເນຜົນໄດ້ຮັບພາຍຫຼັງການຮັບຮອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ພາຍຫຼັງການປັບປຸງແລະໄດ້ຮັບການຮັບຮອງ ແລະ ປະກາດໃຊ້ ແລ້ວຈະກາຍເປັນນິຕິກຳພື້ນຖານໃຫ້ແກ່ວຽກງານການຄຸ້ມຄອງ, ຕິດຕາມ ແລະກວດການໍ້າ ແລະ ຊັບພະຍາກອນນໍ້າ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ ຕາມທິດຍືນຍົງ ແລະສີຂຽວ.

   ຫລັງຈາກນັ້ນ ປະທານກອງປະຊຸມໄດ້ມີຄໍາເຫັນເຈາະຈີ້ມ ແລະ ໃຫ້ທິດຊີ້ນໍາແກ່ສະມາຊິກສະພາແຫ່ງຊາດໃນການຄົ້ນຄວ້າປະກອບຄໍາເຫັນເຂົ້າໃສ່ການປັບປຸງມາດຕາຂອງກົດໝາຍສະບັບນີ້, ພາຍຫລັງສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆປະກອບຄໍາເຫັນແລ້ວ ອະນຸກໍາມະການຮັບຜິດຊອບຮ່າງກົດໝາຍໄດ້ໃຫ້ຄວາມກະຈ່າງແຈ້ງຕໍ່ຄໍາເຫັນຂອງຜູ້ແທນກອງປະຊຸມທີ່ໄດ້ປະກອບຄໍາເຫັນ ແລະຍົກບັນຫາຕ່າງໆຂຶ້ນໃນກອງປະຊຸມຄັ້ງນິີ້, ຈາກນັ້ນປະທານກອງປະຊຸມ ໄດ້ສະຫລຸບສັງລວມການປະກອບຄໍາເຫັນຂອງສະມາຊິກສະພາແຫ່ງຊາດຕໍ່ການປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະຊັບພະຍາກອນນໍ້າ.

 

แชร์