ມອບ-ຮັບ ອາຄານຮຽນໂຮງຮຽນມັດທະຍົມມິດຕະພາບ-ລາວຫວຽດນາມ

ພິທີມອບ-ຮັບອາຄານຮຽນ ໂຮງຮຽນມັດທະຍົມສຶກສາສົມບູນມິດຕະພາບລາວ-ຫວຽດນາມແຂວງເຊກອງ ໄດ້ຈັດຂຶ້ນໃນຕອນເຊົ້າວັນທີ 4 ກໍລະກົດ 2022 ທີ່ໂຮງຮຽນດັ່ງກ່າວ, ໂດຍເປັນກຽດເຂົ້າຮ່ວມຂອງທ່ານ ຫວຽນ ວັນ ກວາງ ກຳມະການສູນກາງພັກຄອມມູນິດຫວຽດນາມ, ເລຂາພັກນະຄອນດານັງ ສສ ຫວຽດນາມ ແລະ ທ່ານ ເຫຼັກໄຫຼ ສີວິໄລ ກຳມະການສູນກາງພັກປະຊາຊົນປະຕິວັດລາວ, ເລຂາພັກແຂວງ, ເຈົ້າແຂວງເຊກອງ, ບັນດາຂະແໜງການກ່ຽວຂ້ອງ, ພະນັກງານຄູອາຈານ ແລະນ້ອງນ້ອຍນັກຮຽນເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ຄໍາໄພ ສິມມາວັດ ຫົວ ໜ້າພະແນກສຶກສາທິການ ແລະກິລາແຂວງເຊກອງ ໄດ້ລາຍງານວ່າ: ໂຄງການກໍ່ສ້າງອາຄານໂຮງຮຽນແຫ່ງນີ້ແມ່ນທຶນຊ່ວຍເຫຼືອລ້າຂອງນະຄອນດານັງ,ລວມມູນຄ່າການກໍ່ສ້າງ 10 ຕື້ດົ່ງ (ສະກຸນເງິນຫວຽດນາມ), ເປັນອາຄານ 2 ຊັ້ນ, ມີ 7 ຫ້ອງຮຽນ, ມີ 1 ຫ້ອງການ ແລະມີຫ້ອງນໍ້າ 10 ຫ້ອງ, ປະກອບມີລະບົບໄຟຟ້າ, ນໍ້າປະປາ, ເຄື່ອງໃຊ້ເພີນີເຈີຄົບຊຸດ.

ໂຄງການດັ່ງກ່າວໄດ້ດໍາເນີນການລົງມືກໍ່ສ້າງມາແຕ່ເດືອນຕຸລາປີ 2019 ໃຊ້ເວລາໃນການກໍ່ສ້າງ 1 ປີ ກັບ 6 ເດືອນ, ແຕ່ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ການດໍາເນີນການກໍ່ສ້າງມີລັກສະນະແກ່ຍາວ ແຕ່ດ້ວຍຄວາມຮັບຜິດຊອບຂອງຜູ້ຮັບເໝົາກໍ່ສ້າງ ແລະຜູ້ໃຫ້ທຶນຈຶ່ງເຮັດໂຄງການນີ້ສຳເລັດ ແລະສາມາດເປີດ ນໍາໃຊ້ໃນການຈັດການຮຽນ -ການສອນໃນສົກຮຽນ 2021- 2022. ໂຄງການດັ່ງກ່າວໄດ້ປະກອບສ່ວນສຳຄັນເສີມສ້າງສາຍພົວພັນທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ- ສອງລັດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ນະຄອນດານັງ ແລະແຂວງເຊກອງ ໄດ້ຮັບການເພີ່ມພູນຄູນສ້າງໃຫ້ແໜ້ນແຟ້ນກວ່າເກົ່າ, ປະກອບສ່ວນໃນການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 45 ແລະວັນສ້າງຕັ້ງສາຍພົວພັນການທູດລາວ- ຫວຽດນາມ ຄົບຮອບ 60 ປີ ມີຄວາມໝາຍ ແລະມີເນື້ອໃນອັນເລິກເຊິ່ງ.

ພ້ອມນີ້ຕາງໜ້າການນໍາ ນະຄອນດານັງ ໄດ້ກ່າວມອບອາຄານຮຽນດັ່ງກ່າວ ໃຫ້ການນໍາແຂວງເຊກອງ, ຊຶ່ງການນໍາ ແຂວງເຊກອງ ກໍຄືຫ້ອງການສຶກສາທິ ການ ແລະກິລາເມືອງລະມາມ ກໍໄດ້ໃຫ້ຄໍາໝັ້ນສັຍາວ່າຈະປົກປັກຮັກສາ ແລະນໍາໃຊ້ອາຄານຮຽນແຫ່ງນີ້ດໍາເນີນການຮຽນ-ການສອນໃຫ້ເກີດປະໂຫຍດສູງສຸດ.

ໂອກາດນີ້ ທ່ານ ຫວຽນ ວັນ ກວາງ ກໍາມະການສູນກາງພັກຄອມມູນິດຫວຽດນາມ, ເລຂາພັກນະຄອນດານັງ ສສ ຫວຽດ ນາມ ໄດ້ໃຫ້ກຽດຕັດແຖບຜ້າ ແລະລັ່ນຄ້ອງ 9 ບາດ ເພື່ອເປັນເປີດການນໍາໃຊ້ອາຄານຮຽນໂຮງຮຽນມັດທະຍົມສຶກສາສົມບູນ ມິດຕະພາບລາວ-ຫວຽດນາມ ແຂວງເຊກອງຢ່າງເປັນທາງການໂດຍມີການນໍາທັງສອງຝ່າຍ ລາວ-ຫວຽດນາມ ເຂົ້າຮ່ວມເປັນສັກຂີພິຍານ.

แชร์