ມອບ-ຮັບ ໂຄງການສ້າງເສັ້ນທາງ ແລະຂົວ

ພິທີມອບ-ຮັບໂຄງການວຽກເພີ່ມ ກໍ່ສ້າງເສັ້ນທາງ, ຮອງລະບາຍນໍ້າ ແລະຂົວ ລະຫວ່າງພະແນກໂຍທາທິການ ແລະຂົນສົ່ງ ແຂວງຫຼວງນໍ້າທາ ກັບບໍລິສັດໄຊ ຍາກໍ່ສ້າງ ແລະສ້ອມແປງຄົບວົງຈອນ ຈໍາກັດຜູ້ດຽວ, ບໍລິສັດແສງມີໄຊ ຄົບວົງ ຈອນຈໍາກັດຜູ້ດຽວ ຈັດຂື້ນໃນວັນທີ 28 ມີຖຸນາຜ່ານມາ ທີ່ຂົວຂ້າມນໍ້າທາ ບ້ານທົ່ງໃຈ້ໃຕ້ ໂດຍເປັນກຽດເຂົ້າຮ່ວມຂອງ ທ່ານ ຄໍາໄຫຼ ສີປະເສີດ ເຈົ້າ ແຂວງຫຼວງ ນໍ້າທາ, ທ່ານ ນາງວິໄລຄໍາ ໂພສາລາດ ຮອງລັດທະມົນຕີ ກະຊວງໂຍທາທິການ ແລະຂົນສົ່ງ, ມີຄະນະປະຈໍາພັກເມືອງ, ຫົວໜ້າພະແນກ, ຮອງຫົວໜ້າພະແນກ, ພາກສ່ວນກ່ຽວຂ້ອງເຂົ້າຮ່ວມ.

ທ່ານ ລາຢ່າງ ຮືຫຼົ່ງ ຫົວໜ້າຫ້ອງ ການໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນໍ້າຂອງ 2 ຕົວເມືອງຫຼວງນໍ້າທາ ໄດ້ລາຍງານຫຍໍ້ກ່ຽວກັບການຈັດຕັ້ງປະຕິບັດໂຄງການ, ໂຄງການກໍ່ສ້າງເສັ້ນທາງ, ຮອງລະບາຍນໍ້າ ແລະຂົວ ແມ່ນໄດ້ເຊັນສັນຍາໃນວັນທີ 23 ພະຈີກ 2020 ແລະເລີ່ມດໍາເນີນການກໍ່ສ້າງມາແຕ່ວັນທີ 1 ມີນາ 2021 ແລະມີໜ້າວຽກຄື: ກໍ່ສ້າງເສັ້ນທາງເບຕົງປະເພດໜ້າທາງກ້ວາງ 4 ແມັດ ຍາວ 1.385,96 ແມັດ ແລະປະເພດໜ້າທາງກ້ວງ 5 ແມັດ ຍາວ 8.502,37 ແມັດ ລວມ ຄວາມຍາວ 9.888,33 ແມັດ, ກໍ່ສ້າງ ຮ່ອງລະບາຍນໍ້າແຄມທາງແບບຕົວ V ຍາວ 10.018,30 ແມັດ, ກໍ່ສ້າງຂົວ 2 ແຫ່ງຄື: ຂົວຂ້າມນໍ້າດີ ບ້ານນໍ້າດີ ຍາວ 25 ແມັດ, ກ້ວາງ 4,50 ແມັດ, ຂົວຂ້າມນໍ້າທາ ບ້ານທົ່ງໃຈ້ໃຕ້ ຍາວ 50 ແມັດ, ກ້ວາງ 4,50 ແມັດ, ກໍ່ສ້າງທໍ່ກົມ ຂະໜາດ 60, 80 ແລະ 100 ຊມ ຈໍານວນ 39 ຈຸດ ລວມ 538 ແມັດ, ກໍ່ສ້າງທໍ່ລຽມຂະ ໜາດ ກ້ວາງ2 ແມັດ, ສູງ 2 ແມັດ, ຍາວ 16 ກວ່າແມັດ ເຊີ່ງກວມເອົາ 9 ບ້ານ ເທດສະບານເມືອງຫຼວງນໍ້າທາ ໂດຍແມ່ນກະຊວງ ຍທຂ ແລະພະແນກ ຍທຂ ຕາງໜ້າເຈົ້າຂອງໂຄງການ ບໍລິສັດໄຊຍາ ກໍ່ສ້າງ ແລະສ້ອມແປງຄົບວົງຈອນ ຈໍາກັດຜູ້ດຽວ ເປັນຜູ້ຮັບເໝົາ ແລະ ຮັບເໝົາຕໍ່ໂດຍບໍລິສັດ ແສງມີໄຊ ຄົບວົງຈອນ ຈໍາກັດຜູ້ດຽວ ໃນມູນຄ່າ 2.975.710,83 ໂດລາ ມາເຖີງປັດຈຸບັນແມ່ນສໍາເລັດ 99,98% ຍັງຄ້າງວຽກເກັບຈໍານວນໜຶ່ງ.

ໂອກາດນີ້ ທ່ານ ນາງ ວິສາພອນ ອິນທິລາດ ຮອງຫົວໜ້າກົມເຄຫາ-ຜັງເມືອງ ໄດ້ມີຄໍາເຫັນກ່າວເປີດນໍາໃຊ້ໂຄງການກໍ່ສ້າງເສັ້ນທາງ,ຮ່ອງລະບາຍນໍ້າ ແລະຂົວ ພ້ອມທັງມອບຕໍ່ໃຫ້ພະແນກໂຍທາທິການ ແລະຂົນສົ່ງແຂວງເປັນຜູ້ຄຸ້ມຄອງ.

ຂ່າວ: ກິ່ນນາລົມ

แชร์