ຄວາມເປັນມາຂອງຮູບປັ້ນພະຍານາກ

ບັນດາທ່ານເຄີຍສັງເກດບໍ່ວ່າເວລາເຂົ້າໄປໃນວັດແລ້ວຈະເຫັນຮູບປັ້ນພະຍານາກຢູ່ຕາມບ່ອນຕ່າງໆບໍ່ວ່າຈະເປັນທາງເຂົ້າວັດທາງຂຶ້ນອາຮາມ ແລະສິມເປັນຕົ້ນຕ່າງກໍຈະມີຮູບປັ້ນພະຍານາກຢູ່ແຕ່ບັນດາທ່ານຮູ້ບໍ່ວ່າຍ້ອນຫຍັງຢູ່ຕາມວັດບ້ານເຮົາຈຶ່ງຕ້ອງມີຮູບປັ້ນພະຍານາກຢູ່ເປັນຮູບປັ້ນອັນອື່ນບໍ່ໄດ້ບໍ?

ຕາມປະຫວັດຄວາມເປັນມາຂອງການທີ່ເຮົາຍຶດເອົາຮູບປັ້ນພະຍານາກມາປະດັບຕາມວັດນັ້ນມີເລື່ອງເລົ່າຢູ່ວ່າປະເທດລາວເປັນປະເທດໜຶ່ງທີ່ນອນຢູ່ລຽບຝັ່ງແມ່ນໍ້າຂອງໃນແມ່ນໍ້າຂອງເລິກລົງໄປນັ້ນແມ່ນຖິ່ນອາໄສຂອງ “ພະຍານາກ” ແລະໃນເມື່ອພຣະເຈົ້າຟ້າງຸ່ມໄດ້ນໍາເອົາພຸດທະສາສະໜາເຂົ້າມາເຜີຍແຜ່ໃນອານາຈັກລາວລ້ານຊ້າງຈຶ່ງມີນາກຕົນໜຶ່ງເກີດມີຄວາມເຫຼື້ອມໃສໃນພຸດທະສາສະໜາຈຶ່ງໄດ້ແປງເພດເປັນມະນຸດເພື່ອມາຂໍບວດໃນພຸດທະສາສະໜາໃນເມື່ອບວດເປັນສົງແລ້ວນາກຕົນນັ້ນກໍບໍ່ສາມາດປະຕິບັດຕາມກົດຂອງສົງໄດ້ຄືຕ້ອງຕື່ນແຕ່ເຊົ້າໄປບິນທະບາດ,ປັດກວາດບົວລະບັດວັດເພາະວ່ານາກກໍຄືງູຊະນິດໜຶ່ງແຕ່ຈະມີຄວາມພິເສດແລະໃຫຍ່ກວ່າງູທົ່ວໄປ ຊຶ່ງຖືວ່າເປັນສັດເດຍລະສານ, ສັດເປັນພວກທີ່ມັກນອນຕື່ນສວາຍ, ຢູ່ມາມື້ໜຶ່ງຫຼັງຈາກທີ່ພະສົງອົງຕ່າງໆກັບຈາກການໄປບິນທະບາດແຕ່ນາກຕົນນັ້ນແມ່ນຍັງນອນຫຼັບໄຫຼຢູ່ ຈຶ່ງໄດ້ໄປຮຽກເອົານາກຕົນນັ້ນເພື່ອມາສັນເຂົ້າແຕ່ກໍຕ້ອງຕົກໃຈເມື່ອເຂົ້າໄປໃນຫ້ອງ ນອນກໍພົບວ່າ: ພະສົງອົງນັ້ນໄດ້ກາຍເປັນງູນອນຂົດຢູ່ເມື່ອເຫັນແບບນັ້ນກໍໄດ້ເອົາເລື່ອງນີ້ໄປບອກແກ່ເຈົ້າອາວາດ,  ເຈົ້າອາວາດຈຶ່ງໄດ້ຮຽກ “ນາກ” ຕົນນັ້ນມາເພື່ອທີ່ຈະໃຫ້ສິກຂາເນື່ອງຈາກເປັນສັດເດຍລະສານບໍ່ສາມາດທີ່ຈະບວດເປັນສົງໄດ້ແຕ່ດ້ວຍຄວາມສັດທາຂອງ “ນາກ” ຕົນນັ້ນເລີຍຂໍເຈົ້າອາວາດໄວ້ວ່າ: ຖ້າຕົນບໍ່ສາມາດບວດເປັນສົງໄດ້ກໍຂໍໃຫ້ມີຊື່ຂອງຕົວເອງຢູ່ໃນພຸດທະສາສະໜາເຈົ້າອາວາດກໍຮັບປາກຈະເຮັດຕາມຄໍາຂໍຂອງ “ນາກ” ຕົນນັ້ນ.

ນັບແຕ່ນັ້ນເປັນຕົ້ນມາຊື່  “ນາກ” ຈຶ່ງຖືກນໍາມາໃຊ້ໃນພຸດທະສາສະໜາຄື: ກ່ອນທີ່ຄົນສາມັນຈະບວດເປັນພຣະສົງຕ້ອງໃຫ້ຊື່ວ່າ “ນາກ” ກ່ອນແລະໃນວັດທຸກບ່ອນກໍຈະຕ້ອງມີ “ຮູບປັ້ນນາກ” ເພື່ອສະແດງເຖິງຄວາມສັດທາທີ່ນາກມີຕໍ່ພຸດທະສາສະໜາ. ປະຈຸບັນ “ນາກ” ກໍໄດ້ກາຍເປັນຕົວແທນຂອງຄົນລາວທີ່ສະແດງເຖິງຄວາມມີນໍ້າໃຈ, ເອື້ອເຟື້ອເພື່ອແຜ່ສັງເກດຈາກຮູບປັ້ນນາກຈະເຫັນວ່າ”ນາກ” ແຕ່ລະຕົນຈະອ້າປາກ, ແຍ່ລີ້ນອອກມາ ນັ້ນຄືຄົນທີ່ມີຈິດໃຈດີງາມພ້ອມທີ່ຈະຕ້ອນຮັບແຂກຕ່າງດ້າວທ້າວຕ່າງເມືອງທຸກທ່ານ.

ນສພ ເສດຖະກິດ-ສັງຄົມ

แชร์