ລາວ ຜ່ານເນື້ອໃນຮ່າງຂໍ້ຕົກລົງ ເພື່ອຄຸ້ມຄອງກິດຈະການສະຖານີສາກລົດໄຟຟ້າ

ໃນລະຫວ່າງວັນທີ 28-30 ມິຖຸນາ 2022, ທີ່ແຂວງວຽງຈັນ, ກົມສົ່ງເສີມ ແລະປະຢັດພະລັງງານ, ກະຊວງພະລັງງານ ແລະບໍ່ແຮ່ ໄດ້ຈັດກອງປະຊຸມຜ່ານເນື້ອໃນຮ່າງຂໍ້ຕົກລົງວ່າດ້ວຍການຄຸ້ມຄອງກິດຈະການສະຖານີປະຈຸ (ສາກ) ລົດໄຟຟ້າ ແລະການນໍາສະເໜີບົດຮຽນກ່ຽວກັບມາດຕະຖານລົດໄຟຟ້າ ແລະລາຄາ (ສາກ) ໄຟ ຂອງຕ່າງປະເທດຊຶ່ງຮ່າງດັ່ງກ່າວປະກອບມີ 10 ໝວດ, 65 ມາດຕາ. ທັງນີ້ບັນດາຜູ້ເຂົ້າຮ່ວມໄດ້ປຶກສາຫາລືກັນກ່ຽວກັບການກຳນົດຫລັກການ, ລະບຽບການ, ມາດຕະຖານໃນການດຳເນີນທຸລະກິດ, ການຕິດຕັ້ງ, ການຄຸ້ມຄອງ ແລະການກວດກາກິດຈະການສະຖານີສາກລົດໄຟຟ້າເພື່ອໃຫ້ມີເນື້ອໃນຄົບຖ້ວນ ແລະສົມບູນຂຶ້ນກວ່າເກົ່າ.

ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່ ໄດ້ກ່າວວ່າ: ປັດຈຸບັນ, ມີຫລາຍປະເທດໃນໂລກໄດ້ເລີ່ມນໍາໃຊ້ລົດໄຟຟ້າພ້ອມທັງພັດທະນາລະບົບສາກໄຟຟ້າຕາມສະຖານທີ່ຕ່າງໆ ນັບມື້ຫລາຍຂຶ້ນໃນສັງຄົມເຊິ່ງມີເປົ້າໝາຍເພື່ອຫລຸດຜ່ອນຜົນກະທົບຈາກມົນລະພິດທາງອາກາດທີ່ເກີດຂຶ້ນຈາກການປ່ອຍກ໊າສ CO2 ຂອງໂຮງງານອຸດສາຫະກໍາ ແລະຈາກພາຫະນະທີ່ໃຊ້ນໍ້າມັນເຊື້ອໄຟ. ຫລາຍປະເທດໄດ້ເລີ່ມປະກາດຈຸດຢືນໃນການຮັກສາສິ່ງແວດລ້ອມພັນທະຂອງຕົນຕໍ່ການຫລຸດ ຜ່ອນມົນລະພິດທາງອາກາດ ໂດຍສະເພາະ ກໍານົດທິດທາງການພັດທະນາ ແລະ ນໍາໃຊ້ພາຫະນະທີ່ບໍ່ມີມົນລະພິດ. ພາຍຫລັງທີ່ລັດຖະບານ ໄດ້ອອກມະຕິວ່າດ້ວຍການຮັບຮອງ ແລະປະກາດໃຊ້ ນະໂຍບາຍການນຳໃຊ້ລົດ ໄຟຟ້າ ໃນສປປ ລາວ ສະບັບເລກທີ 08/ລບ, ລົງວັນທີ 4 ຕຸລາ 2021 ໂດຍມີທິດຊີ້ນຳ ໃຫ້ກະຊວງ ພະລັງງານ ແລະບໍ່ແຮ່ເປັນໃຈກາງສົມທົບກັບພາກສ່ວນທີ່ກ່ຽວຂ້ອງໃນການຈັດຕັ້ງປະຕິບັດນະໂຍບາຍ ແລະ ແຜນຈັດຕັ້ງປະຕິບັດຕົວຈິງໃນການຫັນໄປສູ່ການນຳໃຊ້ລົດໄຟຟ້າ; ໃນນັ້ນ, ກະຊວງພະລັງງານ ແລະບໍ່ແຮ່ຮັບຜິດຊອບໃນການສ້າງນິຕິກຳທີ່ກ່ຽວຂ້ອງກັບສະຖານີສາກລົດໄຟຟ້າ, ການກຳນົດໂຄງສ້າງລາຄາໄຟຟ້າສຳລັບທີ່ຢູ່ອາໄສ ແລະ ການສາກລົດໄຟຟ້າແບບສາທາລະນະ.

ທ່ານ ຄຳໂສ້ ກຸໂພຄຳ ກ່າວຕື່ມວ່າ: ສຳລັບ ສປປ ລາວ ໂດຍອີງໃສ່ສະພາບການຜັນປ່ຽນລາຄານໍ້າມັນເຊື້ອໄຟມີລັກສະນະເພີ່ມຂຶ້ນໃນປັດຈຸບັນ. ເພື່ອເປັນການຜັນຂະຫຍາຍມະຕິຂອງລັດຖະບານ ເລກທີ່ 08/ລບ ເຫັນໄດ້ວ່າຄວາມສົນໃຈຂອງສັງຄົມໃນການຫັນມານໍາໃຊ້ລົດໄຟຟ້າມີລັກສະນະເພີ່ມຂຶ້ນຫລາຍ ຮອດປັດຈຸບັນມີຫລາຍກວ່າ 166 ຄັນ (ຂໍ້ມູນພະແນກ ຍທຂ ນະຄອນລວງວຽງຈັນ 11/5/2022) ແລະ ສະຖານີສາກລົດໄຟຟ້າ ມີຈຳນວນ 15 ຈຸດ ໃນນັ້ນ, 1 ຈຸດແມ່ນລະບົບສາກໄວ ໃນນະຄອນຫລວງວຽງຈັນ ຕາມຂໍ້ມູນຂອງບໍລິສັດນໍາເຂົ້າ ແລະຈໍາໜ່າຍລົດໄຟຟ້າຢູ່ ສປປ ລາວ ແລະມີແນວໂນ້ມຈະເພີ່ມຂຶ້ນອີກໃນອະນາຄົດ.

ຄຽງຄູ່ກັນນັ້ນ, ໃນເບື້ອງພາກລັດກໍໄດ້ສົ່ງເສີມໃຫ້ມີການນຳໃຊ້ລົດໄຟຟ້າໂດຍເລີ່ມຈາກການນຳຂັ້ນສູງໃນໄລຍະເລີ່ມຕົ້ນ ແລະໄດ້ວາງເປົ້າໝາຍສູ້ຊົນຮອດປີ 2025 ໃຫ້ໄດ້ 1% ຂອງການນໍາໃຊ້ພາຫະນະທັງໝົດ ແລະ ແຜນປີ 2025-2030 ໃຫ້ໄດ້ 30%. ນອກຈາກນັ້ນ, ແຜນພັດທະນາສະຖານີ (ສາກ) ລົດໄຟຟ້າແບບສາທາລະນະແບບປານກາງຫາໄວ ຮອດປີ 2025 ໃຫ້ໄດ້ຢ່າງໜ້ອຍ 50 ສະຖານີທີ່ມີຫົວສາກແຕ່ 5-10 ໜ່ວຍ ແລະ 100 ສະຖານີ ໃນປີ 2030 ໃນຂອບເຂດທົ່ວປະເທດ.

แชร์