ຫາລືແຜນວຽກທີ່ສໍາຄັນ ກ່ຽວກັບການພັດທະນາແບບຍືນຍົງ ຢູ່ ສປປ ລາວ

ໃນວັນທີ 30 ມິຖຸນາ 2002 ທີ່ນະຄອນຫຼວງວຽງຈັນ, ກອງເລຂາຄະນະຊີ້ນໍາລະດັບຊາດເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ໄດ້ຈັດກອງປະຊຸມປະຈໍາປີ ຄະນະຈຸດປະສານງານເປົ້າໝາຍການພັດທະນາແບບຍືນຍົງແຫ່ງຊາດ ແລະຄະນະຈຸດປະສານງານເພື່ອຈັດຕັ້ງປະຕິບັດແຜນດໍາເນີນງານຂອງ ອົງການ ສປຊ ສໍາລັບປະເທດດ້ອຍພັດທະນາເພື່ອສືບຕໍ່ການປຶກສາຫາລືແຜນວຽກທີ່ສໍາຄັນກ່ຽວກັບການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ ສປປ ລາວ ປະຈໍາປີ 2022 ໂດຍສະເພາະພາຍຫລັງທີ່ ສປປ ລາວ ໄດ້ສໍາເລັດການນໍາສະເໜີບົດລາຍງານແຫ່ງຊາດແບບສະໝັກໃຈສະບັບທີສອງ (VNR2) ໃນປີ 2021 ທີ່ຜ່ານມາ.

ທ່ານ ວິລັດສອນ ວິສອນນະວົງ ຮັກສາການຫົວຫນ້າກົມອົງການຈັດຕັ້ງສາກົນ, ກະຊວງການຕ່າງປະເທດປະທານກອງປະຊຸມໄດ້ໃຫ້ຮູ້ເຖິງຄວາມໝາຍຄວາມສໍາຄັນ ຂອງການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ໂດຍສະເພາະ ການເຊື່ອມສານຕົວຊີ້ບອກ ປພຍ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະການສ້າງແຜນຍຸດທະສາດການຂ້າມຜ່ານອອກຈາກສະຖານະພາບປະເທດດ້ອຍພັດທະນາຢ່າງໂລ່ງລຽນຂອງ ສປປ ລາວ ເຊິ່ງບໍ່ພຽງແຕ່ຈະສະແດງໃຫ້ເຫັນເຖິງຄວາມໝາຍໝັ້ນອັນແຮງກ້າຂອງລັດຖະບານ ໃນການຈັດຕັ້ງວາລະ 2030 ຄຽງຄູ່ກັບເປົ້າໝາຍການພັດທະນາທີ່ເປັນບູລິມະສິດຂອງຊາດ, ແຕ່ຍັງເປັນໂອກາດອັນດີໃນການຕິດຕາມ-ປະເມີນ, ຄຽງຄູ່ກັບການທົບທວນຄືນ ແລະລາຍງານຄວາມຄືບໜ້າ, ຜົນສໍາເລັດ, ສິ່ງທ້າທາຍຕ່າງໆ ໃນການຈັດຕັ້ງປະຕິບັດ ວາລະສາກົນໃນໄລຍະທີ່ຜ່ານມາ ແລະວາງແຜນໄລຍະຍາວໃນການຫລຸດພົ້ນອອກຈາກສະຖານະພາບປະເທດດ້ອຍພັດທະນາໃຫ້ມີຄວາມຍືນຍົງ ແລະເຮັດແນວໃດເພື່ອຮັບປະກັນວ່າຈະບໍ່ກັບຄືນສະຖານະພາບດ້ອຍພັດທະນາຄືນອີກ.

ທ່ານປະທານກອງປະຊຸມຍັງໄດ້ຊຸກຍູ້ໃຫ້ທຸກພາກສ່ວນຮັດແຫນ້ນການຮ່ວມມືເຊິ່ງກັນ ແລະກັນ ໂດຍສະເພາະແມ່ນການມີສ່ວນຮ່ວມ ແລະການປະກອບສ່ວນຂອງພາກລັດ ກໍຄື ບັນດາກະຊວງ ແລະ ອົງການລັດທຽບເທົ່າກະຊວງ, ອົງການປົກຄອງຂັ້ນແຂວງ ແລະ ທ້ອງຖິ່ນ ໃນການຈັດຕັ້ງປະຕິບັດ ປພຍ ແລະການຫລຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ. ກອງປະຊຸມຈະລົງເລິກວຽກງານການສ້າງຄາດໝາຍແຕ່ລະຕົວຊີ້ບອກ ປພຍ ຂອງ ສປປ ລາວ ໃຫ້ສໍາເລັດ ແລະຈະເປີດເວທີຮັບຟັງແຜນການຂອງຂະແໜງການກ່ຽວກັບວຽກງານການເຊື່ອມສານ, ການຈັດຕັ້ງປະຕິບັດ, ການຕິດຕາມ ແລະການລາຍງານ ປພຍ. ພ້ອມນີ້, ກອງປະຊຸມຍັງໄດ້ປຶກສາຫາລືເຖິງຄວາມກ້າວໜ້າ ແລະສິ່ງທ້າທາຍຕ່າງໆໃນການຈັດຕັ້ງປະຕິບັດ ປພຍ ໃນໄລຍະຜ່ານມາເພື່ອກະກຽມໃຫ້ແກ່ກອງປະຊຸມຄະນະຊີ້ນໍາລະດັບຊາດປະຈໍາປີ 2022 ທີ່ຄາດວ່າຈະຈັດຂຶ້ນໃນ ເດືອນສິງຫາ 2022 ນີ້.

แชร์