ກົດໝາຍແກ້ໄຂຄຳຮ້ອງທຸກ ເປີດກວ້າງໃຫ້ປະຊາຊົນເຂົ້າເຖິງຂະບວນການຍຸຕິທຳຫຼາຍຂຶ້ນ

ພາຍຫຼັງກົດໝາຍ ວ່າດ້ວຍການແກ້ໄຂຄຳຮ້ອງທຸກໄດ້ຖືກຮັບຮອງ ແລະປະກາດໃຊ້ ໃນໄລຍະ 5 ປີຜ່ານມາ ໄດ້ສ້າງຜົນປະໂຫຍດຫຼາຍດ້ານເປັນຕົ້ນການເປັນເຄື່ອງມືສຳຄັນໃຫ້ແກ່ອົງການຈັດຕັ້ງລັດທີ່ຮັບຜິດຊອບແກ້ໄຂຄຳຮ້ອງທຸກ ສາມາດປະຕິບັດພາລະບົດບາດ, ສິດ ແລະໜ້າທີ່ຕາມຂອບເຂດຄວາມຮັບຜິດຊອບຂອງຕົນ, ທັງເປີດກວ້າງໃຫ້ປະຊາຊົນສາມາດເຂົ້າເຖິງຂະບວນການຍຸຕິທຳຫຼາຍຂຶ້ນ; ສິດ ແລະຜົນປະໂຫຍດຂອງນິຕິບຸກຄົນ ແລະການຈັດຕັ້ງໄດ້ຮັບການປົກປ້ອງຕາມລັດຖະທຳມະນູນ ແລະກົດໝາຍປະກອບສ່ວນເຮັດໃຫ້ສັງຄົມມີຄວາມສະຫງົບໂດຍພື້ນຖານ.

ທ່ານ ຄຳແພງ ວິລະພັນ ປະທານກຳມາທິການຍຸຕິທຳສະພາແຫ່ງຊາດລາຍງານໃຫ້ຮູ້ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 30 ມິຖຸນາ 2022 ນີ້ວ່າ: ເຖິງແມ່ນກົດໝາຍສະບັບນີ້ ໄດ້ສ້າງຜົນປະໂຫຍດຢ່າງຫລວງຫລາຍໃຫ້ກັບສັງຄົມລາວແຕ່ຍັງເຫັນວ່າມີອັນຄົງຄ້າງບາງດ້ານທີ່ຕ້ອງໄດ້ຮັບການປັບປຸງຕື່ມອີກເປັນຄັ້ງທີ 3. ເມື່ອກົດໝາຍສະບັບນີ້ຖືກຮັບຮອງ ແລະປະກາດໃຊ້ຢ່າງເປັນທາງການຈະເປັນບ່ອນອີງ, ຮັບປະກັນການກໍານົດຂັ້ນຕອນ, ວິທີການ, ກົນໄກການຮັບ ແລະພິຈາລະນາແກ້ໄຂຄຳຮ້ອງທຸກຂອງອົງການລັດທີ່ກ່ຽວຂ້ອງໃຫ້ເປັນລະບົບ, ວ່ອງໄວ, ສອດຄ່ອງກັບພາລະບົດບາດ, ທັງຮັບປະກັນຄວາມຖືກຕ້ອງ ຕາມລັດຖະທຳມະນູນ ແລະກົດໝາຍແນ່ໃສ່ປົກປ້ອງສິດ ແລະຜົນປະໂຫຍດອັນຊອບທຳຂອງພົນລະເມືອງ, ນິຕິບຸກຄົນ ແລະການຈັດຕັ້ງ ເຮັດໃຫ້ການດຳເນີນຄະດີ ຕາມຂະບວນການຍຸຕິທໍາເປັນທີ່ສິ້ນສຸດ.

ນອກຈາກນີ້,ຍັງເປັນການຮັບປະກັນໃຫ້ການປະຕິບັດພາລະບົດບາດ, ສິດ ແລະໜ້າທີ່ຂອງບັນດາອົງການທີ່ກ່ຽວຂ້ອງໃນການແກ້ໄຂຄຳຮ້ອງທຸກມີຄວາມຈະແຈ້ງຊັດເຈນຫລາຍຂຶ້ນ ແລະ ເຮັດໃຫ້ກົນໄກປະສານງານມີຄວາມໂລ່ງລ່ຽນ, ໂປ່ງໃສ ແລະຍຸຕິທຳຕາມລັດຖະທຳມະນູນ ແລະກົດໝາຍກຳນົດໄວ້; ຫລີກລ້ຽງໄດ້ການກໍານົດພາລະບົດບາດຊໍ້າຊ້ອນ, ເຮັດໜ້າທີ່ແທນກັນ, ກ້າວກ່າຍເຊິ່ງກັນ ແລະກັນ; ພ້ອມທັງເປັນການຍົກສູງຄວາມຮັບຜິດຊອບການເມືອງຂອງບັນດາອົງການທີ່ມີສິດ, ໜ້າທີ່ໃນການແກ້ໄຂຄຳຮ້ອງທຸກ ແລະ ເປັນການຍົກສູງຄຸນນະພາບໃນການຕິດຕາມກວດກາຂອງສະພາແຫ່ງຊາດ, ສະພາປະຊາຊົນຂັ້ນແຂວງ, ອົງການກວດກາລັດ ແລະ ອົງການໄອຍະການປະຊາຊົນໃນຂະບວນການຍຸຕິທຳຕາມພາລະບົດບາດຂອງແຕ່ລະພາກສ່ວນໃຫ້ມີຄວາມເຂັ້ມງວດ.

แชร์