ປະທານສະພາແຫ່ງຊາດ ຊົມເຊີຍວັນລັດຖະສະພາສາກົນ ຄົບຮອບ 133 ປີ

ໃນວາລະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 30 ມິຖຸນາ 2022 ນີ້, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ທັງເປັນປະທານຄະນະສະຫະພັນລັດຖະສະພາສາກົນ (IPU) ຂອງສະພາແຫ່ງຊາດ ແຫ່ງ ສປປ ລາວ ໄດ້ກ່າວບາງທັດສະນະສະແດງຄວາມຊົມເຊີຍວັນລັດຖະສະພາສາກົນ ຄົບຮອບ 133 ປີ ເຊິ່ງເປັນວັນທີ່ມີຄວາມໝາຍສໍາຄັນຂອງລະບົບລັດຖະສະພາໃນທົ່ວໂລກ ແລະເປັນວັນດຽວກັນກັບການສ້າງຕັ້ງສະຫະພັນລັດຖະສະ ພາສາກົນ(30/6/1889), ມາຮອດປັດຈຸບັນ, ສະຫະພັນລັດຖະສະພາສາກົນມີລັດຖະສະພາທີ່ເປັນສະມາ ຊິກທັງໝົດ 178 ປະເທດ ແລະ 14 ອົງການສະມາຊິກທີ່ເປັນພາຄີ.

ທ່ານ ໄຊສົມພອນ ພົມວິຫານ ກ່າວຕື່ມວ່າ: ວັນລັດຖະສະພາສາກົນໄດ້ຖືກຮັບຮອງເອົາໃນກອງປະຊຸມສະຫະພັນລັດຖະສະພາສາກົນ ຄັ້ງທີ 129 ທີ່ນະຄອນເຈເນວາ, ປະເທດສະວິດຊີແລນ ໃນປີ 2018 ໂດຍກໍານົດໄດ້ເອົາ ວັນທີ 30 ມິຖຸນາ ຂອງທຸກໆປີ ເປັນວັນສະເຫລີມສະຫລອງວັນລັດຖະສະພາສາກົນ ຂອງທຸກປະເທດສະມາຊິກໃນທົ່ວໂລກ. ອົງການສະຫະພັນລັດຖະສະພາສາກົນ ແມ່ນອົງການລະ ດັບໂລກ ຂອງລັດຖະສະພາຈາກປະເທດຕ່າງໆ ໂດຍມີຈຸດປະສົງເພື່ອສ້າງເປັນເວທີສົ່ງເສີມການຕິດຕໍ່ພົວພັນ, ການປະສານງານ ແລະ ການແລກປ່ຽນປະສົບການ ລະຫວ່າງລັດຖະສະພາ ແລະ ສະມາຊິກລັດຖະສະພາທຸກປະເທດໃນໂລກ; ພິຈາລະນາບັນຫາສໍາຄັນຂອງໂລກ, ທັງສົ່ງເສີມການປົກຄອງດ້ວຍລະ ບຽບກົດໝາຍ, ສົ່ງເສີມບົດບາດຍິງ-ຊາຍ ແລະ ຄົນໜຸ່ມ, ສົ່ງເສີມສັນຕິພາບ, ປະຊາທິປະໄຕ ແລະ ການພັດທະນາແບບຍືນຍົງ.
ສະພາແຫ່ງຊາດ ແຫ່ງ ສປປ ລາວ ໄດ້ເຂົ້າເປັນສະມາຊິກສະຫະພັນລັດຖະສະພາສາກົນ ໃນວັນທີ 4 ເມສາ 1990, ຈາກນັ້ນມາ,ໄດ້ຕັ້ງໜ້າເຂົ້າຮ່ວມເຄື່ອນໄຫວຢ່າງຫ້າວຫັນໃນກອງປະຊຸມໃຫຍ່ ແລະ ກອງປະຊຸມລະດັບຕ່າງໆຂອງສະຫະພັນລັດຖະສະພາສາກົນເຊິ່ງເປັນການເຜີຍແຜ່ແນວທາງນະໂຍບາຍຂອງພັກ ແລະກົດໝາຍຂອງລັດ, ປະກອບສ່ວນອັນສຳຄັນເຂົ້າໃນການສົ່ງເສີມສັນຕິພາບ, ສະຖຽນລະພາບ ແລະຄວາມໝັ້ນຄົງໃນພາກພື້ນ ແລະສາກົນ.

ທ່ານ ໄຊສົມພອນ ພົມວິຫານ ຍັງໄດ້ອວຍພອນໃຫ້ວັນລັດຖະສະພາສາກົນນີ້ຈົ່ງເປັນວັນທີ່ມີຄວາມໝາຍຄວາມສໍາຄັນ ແລະເປັນວັນແຫ່ງການຊຸກຍູ້ສົ່ງເສີມບົດບາດ ຂອງລັດຖະສະພາໃນທົ່ວໂລກໂດຍສະເພາະສະພາແຫ່ງຊາດ ແຫ່ງ ສປປ ລາວ ໃຫ້ມີຄວາມເຂັ້ມແຂງ ແລະສົມກັບເປັນອົງການຕົວແທນແຫ່ງສິດ ແລະຜົນປະໂຫຍດຂອງປະຊາຊົນຢ່າງແທ້ຈິງ.

แชร์