ການພົວພັນຮ່ວມມື ສອງກະຊວງການຕ່າງປະເທດ ລາວ-ຫວຽດນາມ ນັບມື້ໄດ້ຮັບການເສີມຂະຫຍາຍຢ່າງແໜ້ນແຟ້ນ

ຕະຫຼອດໄລຍະຜ່ານມາຈົນຮອດປັດຈຸບັນການພົວພັນຮ່ວມມືລະຫວ່າງສອງກະຊວງການຕ່າງປະເທດ ລາວ-ຫວຽດນາມ ນັບມື້ໄດ້ຮັບການເສີມຂະຫຍາຍໃຫ້ແໜ້ນແຟ້ນຂຶ້ນເລື້ອຍໆ ໂດຍໄດ້ມີການພົວພັນຮ່ວມມືກັນໃນຫລາຍຂົງເຂດວຽກງານທີ່ກ່ຽວຂ້ອງກັບວຽກງາການຕ່າງປະເທດ ແລະໄດ້ມີຜົນສຳເລັດໃນຫຼາຍດ້ານເປັນຕົ້ນໄດ້ມີການເຊັນບົດບັນທຶກການພົວພັນຮ່ວມມືດ້ານຕ່າງໆຮ່ວມກັນ, ໄດ້ມີການແລກປ່ຽນຄວາມຮູ້, ປະສົບການ, ແລກປ່ຽນທາງດ້ານວິຊາການ, ແລກປ່ຽນການຢ້ຽມຢາມເຊິ່ງກັນ ແລະກັນລະຫວ່າງການນຳຂັ້ນສູງ ຂອງສອງກະຊວງການຕ່າງປະເທດຢ່າງເປັນປົກກະຕິ.

ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ໃຫ້ສຳພາດຕໍ່ສື່ມວນຊົນ ໃນວັນທີ 27 ມິຖຸນາ 2022 ຜ່ານມານີ້, ເນື່ອງໃນໂອກາດສະ ເຫລີມສະຫລອງ 2 ວັນສຳຄັນປະຫວັດສາດ ລາວ-ຫວຽດນາມ ໂດຍໄດ້ຍົກໃຫ້ເຫັນການພົວພັນຮ່ວມມືອັນສະໜິດສະໜົມ ແລະ ແໜ້ນແຟ້ນ ລະຫວ່າງ ສອງກະຊວງການຕ່າງປະເທດ ລາວ-ຫວຽດນາມ ຕະຫລອດໄລຍະຜ່ານມາ ໂດຍສອງກະຊວງການຕ່າງປະເທດ ລາວ-ຫວຽດນາມ ໄດ້ມີກົນໄກການຮ່ວມມືທີ່ຈະເເຈ້ງ ເເລະ ຍາວນານ, ທັງມີການຮັບຮອງເອົາເເຜນການຮ່ວມມືປະຈຳປີ ເຊິ່ງຫລ້າສຸດ ກໍໄດ້ມີການລົງນາມເເຜນປະຕິບັດງານລະຫວ່າງສອງກະຊວງການຕ່າງປະເທດ ລາວ-ຫວຽດນາມ ເຊິ່ງໄດ້ກວມເອົາຫລາຍຂົງເຂດ ເປັນຕົ້ນເເມ່ນການເເລກປ່ຽນຂໍ້ມູນຂ່າວສານ ເພື່ອຮັບປະກັນໃຫ້ມີທັດສະນະອັນດຽວກັນຕໍ່ບັນຫາຕ່າງໆທີ່ເກີດຂຶ້ນຢູ່ໃນພາກພື້ນ ເເລະ ສາກົນ ເຊິ່ງຕ້ອງໄດ້ມີການປະສານສົມທົບກັນ ເເລກປ່ຽນຂໍ້ມູນຂ່າວສານນຳກັນຕະຫລອດ ເພື່ອໃຫ້ເຂົ້າໃຈບັນຫາ ເເລະ ຮັບປະກັນດ້ານທັດສະນະທີ່ວາງອອກນັ້ນ ສອດຄ່ອງກັບນະໂຍບາຍການຕ່າງປະເທດຂອງ ພັກ-ລັດ ສອງປະເທດ. ພ້ອມນັ້ນ, ສອງກະຊວງການຕ່າງປະເທດ ລາວ-ຫວຽດນາມ ໄດ້ມີການຕົກລົງຮ່ວມມືກັນໃນການເເລກປ່ຽນບົດຮຽນປະສົບການໃນວຽກງານການຕ່າງປະເທດ; ຫວຽດນາມ ກໍໄດ້ໃຫ້ການສະໜັບສະໜູນຊ່ວຍເຫລືອຝຶກອົບຮົມໃຫ້ເເກ່ພະນັກງານ-ລັດຖະກອນ, ພະນັກງານນັກການທູດຂອງລາວບໍ່ວ່າຈະເປັນດ້ານທັກສະການເຈລະຈາ, ການຄົ້ນຄວ້າວິໄຈບັນຫາ, ການເເລກປ່ຽນ ຫລືຖ່າຍທອດບົດ ຮຽນກ່ຽວກັບການເເປພາສາໃຫ້ເເກ່ພະນັກງານກະຊວງການຕ່າງປະເທດຂອງພວກເຮົາ.

ພ້ອມດຽວກັນນັ້ນ, ອັນສຳຄັນໃນຕໍ່ໜ້າທີ່ສອງກະຊວງກຳລັງສຸມໃສ່ປະຕິບັດເເມ່ນເເລກປ່ຽນບົດຮຽນກ່ຽວກັບການທູດເສດຖະກິດເນື່ອງຈາກການທູດເສດຖະກິດໃນປັດຈຸບັນນີ້ ເເມ່ນສອດຄ່ອງກັບສະພາບຄວາມເປັນຈິງ, ການປະຕິບັດນະໂຍບາຍການຕ່າງປະເທດຂອງລາວຕໍ່ໄປຈະເນັ້ນໃສ່ການທູດເສດຖະກິດເປັນຫລັກເພື່ອຮັບປະກັນໃຫ້ປະເທດຊາດ ໄດ້ຮັບຜົນປະໂຫຍດທາງດ້ານເສດຖະກິດໃຫ້ຫລາຍຂຶ້ນ ໃນການດຳເນີນນະໂຍບາຍການຕ່າງປະເທດ ກໍຄື ການປະຕິບັດການທູດເສດຖະກິດ. ມາຮອດປັດຈຸບັນ, ການຮ່ວມມືລະຫວ່າງສອງປະເທດ ລາວ-ຫວຽດນາມ ແມ່ນມີຢູ່ທຸກຂົງເຂດ, ສະເພາະການຮ່ວມມືໃນຂົງເຂດວັດທະນະທຳ-ສັງຄົມ ກໍມີຫລາຍອັນລວມທັງການຮ່ວມມືໃນຂົງເຂດຂອງສື່ມວນຊົນ, ການສຶກສາ, ການສ້າງຊັບພະຍາກອນມະນຸດເຊິ່ງໃນປັດຈຸບັນ ຫວຽດນາມ ໄດ້ຮັບເອົາບັນດານັກສຶກສາລາວໄປຮຽນຢູ່ ສສ ຫວຽດນາມ ແມ່ນມີຈຳນວນຫລາຍ, ຖ້ານັບຕັ້ງແຕ່ 10 ປີ ຜ່ານມາ ເຫັນວ່າມີຫລາຍກວ່າ 50.000 ຄົນ, ໃນຂະນະດຽວກັນກໍຍັງມີນັກຮຽນທີ່ກຳລັງສຶກສາຢູ່ ສສ ຫວຽດນາມ ປະມານ 14.000 ຄົນ.

ທ່ານ ສະເຫລີມໄຊ ກົມມະສິດ ກ່າວອີກວ່າ: ເພື່ອສະເຫລີມສະຫລອງສອງວັນປະຫວັດສາດ ລາວ-ຫວຽດນາມ ໃຫ້ມີບັນຍາກາດອັນຟົດຟື້ນກະຊວງການຕ່າງປະເທດ ໄດ້ເປັນເຈົ້າການໃນການປະ ສານກັບຂະແໜງການກ່ຽວຂ້ອງ ເປັນຕົ້ນ ຫ້ອງວ່າການສູນກາງພັກ, ນະຄອນຫລວງວຽງຈັນ ແລະ ພາກສ່ວນອື່ນໆ ເພື່ອກະກຽມໃຫ້ແກ່ການຈັດກິດຈະກຳທີ່ສຳຄັນ ແລະ ຍິ່ງໃຫຍ່ຢູ່ ນະຄອນຫລວງວຽງຈັນ ໃນວັນທີ 18 ກໍລະກົດ 2022 ຈະມາເຖິງນີ້. ພິທີສະເຫລີມສະຫລອງນີ້ຈະເປັນຍິ່ງໃຫຍ່ ຈະມີການນຳສູງສຸດຂອງພັກ-ລັດ ເຂົ້າຮ່ວມ, ສ່ວນເບື້ອງຫວຽດນາມ ແມ່ນການນຳຂັ້ນສູງສາຍພັກ-ລັດ ຈະມາຮ່ວມ, ສ່ວນຝ່າຍລາວ ກໍຈະສົ່ງຄະນະຜູ້ແທນການນຳຂັ້ນສູງຂອງລາວໄປເຂົ້າຮ່ວມພິທີສະເຫລີມສະຫລອງລັກສະນະດຽວກັນຢູ່ຫວຽດນາມ ເຊິ່ງທັງສອງປະເທດ ຈະຈັດພິທີສະເຫລີມສະຫລອງປີສາ ມັກຄີມິດຕະພາບພ້ອມກັນທັງຢູ່ນະຄອນຫລວງວຽງຈັນ ແລະນະຄອນຫລວງຮ່າໂນ້ຍ. ນອກຈາກນັ້ນ, ກະຊວງການຕ່າງປະເທດ ລາວ-ຫວຽດນາມ ກໍໄດ້ປະສານສົມທົບກັນເພື່ອຊຸກຍູ້ໃຫ້ຂະແໜງການກ່ຽວຂ້ອງປະຕິບັດຕາມແຜນການກິດຈະກຳຕ່າງໆ ແຕ່ນີ້ຈົນຮອດທ້າຍປີ; ສຳລັບພິທີເປີດ ແລະສະຫລຸບປີສາມັກຄີມິດຕະພາບ ລາວ-ຫວຽດນາມ ຄັ້ງນີ້ ການນຳຂັ້ນສູງຂອງປະເທດລາວຈະໄດ້ເຂົ້າຮ່ວມພິທີເປີດຢູ່ ສສ. ຫວຽດນາມ, ຈາກນັ້ນ ໃນທ້າຍປີ 2022 ກໍຈະມີພິທີປິດຂອງກິດຈະຢູ່ ສປປ ລາວ ໂດຍຈະມີການນຳຂັ້ນສູງຂອງຫວຽດນາມມາຢ້ຽມຢາມລາວເຂົ້າຮ່ວມຢ່າງຟົດຟື້ນ ແລະມີຜົນສຳເລັດ.

แชร์