ສຳເລັດການສ້າງຄວາມເຂັ້ມແຂງ ເພື່ອຄຸ້ມຄອງປ່າສະຫງວນ ແລະອະນຸລັກສັດປ່າ ຢູ່ເມືອງນາກາຍ

ໃນວັນທີ 29 ມິຖຸນາ 2022, ກົມປ່າໄມ້, ກະຊວງກະສິກຳ ແລະປ່າໄມ້ ໄດ້ຈັດກອງປະ ຊຸມສະຫລຸບປິດໂຄງການສ້າງຄວາມເຂັ້ມແຂງດ້ານການຈັດຕັ້ງເພື່ອຄຸ້ມຄອງປ່າສະຫງວນ, ປ່າປ້ອງກັນ ແລະອະນຸລັກສັດປ່າ ໃນການນໍາໃຊ້ ແລະຕິດຕາມຂະບວນການສຶກສາເບື້ອງຕົ້ນກ່ຽວກັບຜົນກະທົບຕໍ່ສິ່ງແວດລ້ອມທີ່ເມືອງນາກາຍ, ແຂວງຄຳມ່ວນ.

ໂອກາດນີ້, ທ່ານ ສົມຫວັງ ພິມມະວົງ ຮອງຫົວໜ້າກົມປ່າໄມ້ ໄດ້ກ່າວວ່າ: ກອງປະຊຸມໃນຄັ້ງນີ້ ເພື່ອລາຍງານການຈັດຕັ້ງປະຕິບັດວຽກງານໃນໄລຍະ 7 ປີ (2015-2022) ຜ່ານມາ ຊຶ່ງໂຄງການໄດ້ຮັບງົບປະມານ ໃນມູນຄ່າ 2.619.205 ໂດລາສະຫະລັດ, ພາຍໃຕ້ໂຄງການສິ່ງແວດລ້ອມ ແລະ ສັງຄົມ ຢູ່ ສປປ ລາວ ໄລຍະ 2 (ຄສລ2) ໂດຍຜ່ານກອງທຶນປົກປັກຮັກສາສິ່ງແວດລ້ອມເພື່ອຈັດຕັ້ງປະຕິບັດວຽກງານເສີມສ້າງຄວາມເຂັ້ມແຂງໃຫ້ແກ່ລະບົບການຄຸ້ມຄອງປົກປັກຮັກສາສິ່ງແວດລ້ອມ ໃນເຂດຄັດເລືອກ, ຄຸ້ມຄອງປ່າສະຫງວນ,ການບັງຄັບນໍາໃຊ້ກົດໝາຍວ່າດ້ວຍສັດນໍ້າ ແລະສັດປ່າ, ການຄຸ້ມຄອງປະເມີນສິ່ງແວດລ້ອມໂດຍການພັດທະນາການຄຸ້ມຄອງລະບົບປ່າສະຫງວນແຫ່ງຊາດ ແລະ ປ່າປ້ອງກັນແຫ່ງຊາດ, ການຈັດຕັ້ງປະຕິບັດຂອງປ່າສະຫງວນແຫ່ງຊາດ, ລະບົບການຄຸ້ມຄອງປ່າປ້ອງກັນແຫ່ງຊາດ-ການຄຸ້ມຄອງໂຄງການຍ່ອຍ, ການສ້າງຄວາມສາມາດພະນັກງານຂັ້ນສູນກາງ ແລະທ້ອງຖິ່ນໃນລະບົບການຄຸ້ມຄອງປ່າສະຫງວນ ແລະປ່າປ້ອງກັນ.

ຜ່ານການຈັດຕັ້ງປະຕິບັດໂຄງການ ໃນໄລຍະ 7 ປີຜ່ານມາ ເຫັນໄດ້ວ່າໂຄງການໄດ້ມີຜົນສໍາເລັດໄປຕາມອົງປະກອບທີ່ວາງໄວ້ຫຼາຍດ້ານເປັນຕົ້ນການພັດທະນາສະຖາບັນ ໃນລະບົບການຄຸ້ມຄອງປ່າສະຫງວນ ແລະປ່າປ້ອງກັນ ແຫ່ງຊາດ (ການວາງແຜນ ແລະປັບປຸງຄູ່ມືຕ່າງໆ): ການສຶກສາດ້ານການຈັດຕັ້ງໃນການຄຸ້ມຄອງປ່າສະຫງວນ ແບບມີສ່ວນຮ່ວມໃນ ສປປ ລາວ, ສະຖານະພາບປ່າສະຫງວນແຫ່ງຊາດ, ແຜນແມ່ບົດປ່າສະຫງວນແຫ່ງຊາດ ແລະການສ້າງເວັບໄຊ, ຄູ່ມືແນະນໍາດ້ານການຄຸ້ມຄອງປ່າສະຫງວນ 15 ສະບັບ ແລະຄູ່ມືແນະນໍາການຄຸ້ມຄອງ ປ່າປ້ອງກັນ 1 ສະບັບ.

ສຳລັບການຈັດຕັ້ງປະຕິບັດລະບົບການຄຸ້ມຄອງປ່າສະຫງວນ ແລະປ່າປ້ອງກັນແຫ່ງຊາດໄດ້ສໍາເລັດການປັບປຸງບັນຊີສັດນໍ້າ ແລະສັດປ່າ ຢູ່ສປປ ລາວ ເຊັ່ນ: ການສັງລວມຂໍ້ມູນປ່າສະຫງວນແຫ່ງຊາດ ແລະ ອຸທິຍານແຫ່ງຊາດ 24 ແຫ່ງ, ການຈັດປະເພດປ່າສະຫງວນ: ສໍາເລັດການປະເມີນປ່າສະຫງວນ ແຫ່ງຊາດ 10 ແຫ່ງ ໃນນັ້ນ 6 ແຫ່ງ, ໄດ້ສ້າງຕັ້ງເປັນອຸທິຍານແຫ່ງຊາດ ຄື: ອຸທິຍານແຫ່ງຊາດ ນໍ້າແອດ-ພູເລີຍ, ນາກາຍ-ນໍ້າເທີນ, ຫີນໜາມໜໍ່, ດົງຫົວສາວ, ເຊປຽນ ແລະ ພູເຂົາຄວາຍ; ປະເມີນວຽກງານການທ່ອງທ່ຽວ 10 ເຂດ, ບົດລາຍງານການທ່ອງທ່ຽວ ແລະ ຮ່າງຍຸດທະສາດການທ່ອງ ທ່ຽວ. ພ້ອມກັນນີ້ໄດ້ສຳເລັດແຜນການລົງທຶນ ອຸທິຍານແຫ່ງຊາດ ນໍ້າແອດ-ພູເລີຍ, ນາກາຍ-ນໍ້າເທີນ, ຫີນໜາມໜໍ່, ນໍ້າກະດິງ, ນໍ້າຫ້າ, ນໍ້າກ່ານ, ດົງຫົວສາວ, ເຊປຽນ ແລະ ພູເຂົາຄວາຍ; ການສົ່ງເສີມວຽກງານການຄຸ້ມຄອງປ່າປ້ອງກັນ: ສະໜຸບສະໜູນກອງປະຊຸມປຶກສາຫາລືຄຸ່ມືແນະນໍາປ່າປ້ອງກັນ,ການກໍານົດເຂດປ່າປ້ອງກັນ 5 ເຂດ ແລະການໂຄສະນາເຜີຍແຜ່ 10 ຄັ້ງ.

ນອກຈາກນີ້ໄດ້ສຳເລັດການຊຸກຍູ້ໂຄງການຍ່ອຍເປັນຕົ້ນແຜນຄຸ້ມຄອງປ່າສະຫງວນ ແລະ ປ່າປ້ອງກັນ 9 ແຫ່ງ, ການໂຄສະນາເຜີຍແຜ່ແຜນແມ່ບົດປ່າສະຫງວນ, ສະຖານະພາບປ່າສະຫງວນ, ຄູ່ມືແນະນໍາດ້ານປ່າສະຫງວນ, ການຊຸກຍູ້ຕິດຕາມ ວຽກງານການພັດທະນາຊຸມຊົນ ແລະ ປັບປຸງຊີວິດການເປັນຢູ່ຂອງປະຊາຊົນ, ການສະໜັບສະໜູນວຽກງານການຄຸ້ມຄອງປ່າສະຫງວນ ແລະການສ້າງຕັ້ງກອງຄຸ້ມຄອງປ່າສະຫງວນ 11 ແຂວງ, ສໍາເລັດການຊຸກຍູ້ຕິດຕາມວຽກງານການພັດທະນາຊຸມຊົນ ແລະປັບປຸງຊີວິດການເປັນຢູ່ ໃນ 8 ແຂວງ,ສໍາເລັດການສະໜັບສະໜູນວຽກງານການຄຸ້ມຄອງປ່າສະຫງວນ ແລະການສ້າງຕັ້ງກອງຄຸ້ມຄອງປ່າສະຫງວນ 11 ແຂວງ.

แชร์