ກອງປະຊຸມ ສະມາຄົມມິດຕະພາບປະຊາຊົນກັບປະຊາຊົນ ອາຊຽນ-ຈີນ ຄັ້ງທີ 13

ກອງປະຊຸມ ສະມາຄົມມິດຕະພາບປະຊາຊົນ ກັບປະຊາຊົນ ອາຊຽນ-ຈີນ ຄັ້ງທີ 13 ຜ່ານລະບົບວີດີໂອທາງໄກ ພາຍໃຕ້ຫົວຂໍ້ “ການຮ່ວມມືເພື່ອສ້າງຄວາມເຂັ້ມແຂງຮ່ວມກັນ ແລະ ດໍາລົງຊີວິດຢ່າງປອດໄພຕາມວິຖີການດໍາລົງຊີວິດແບບໃໝ່ ” ໄດ້ຈັດຂຶ້ນໃນວັນທີ 30 ມີຖຸນາ 2022 ໂດຍການເປັນເຈົ້າພາບຂອງສະມາຄົມມິດຕະພາບ ລາວ-ຈີນ ຂັ້ນສູນກາງຊຶ່ງມີຜູ້ແທນຈາກສະມາຄົມມິດຕະພາບ ຈີນ-ອາຊຽນ, ສະມາຄົມມິດຕະພາບປະຊາຊົນຈີນກັບຕ່າງປະເທດ ແລະບັນດາສະມາຄົມມິດຕະພາບ ອາຊຽນ-ຈີນ ເຂົ້າຮ່ວມ.

ໃນກອງປະຊຸມ ທ່ານ ເພັດ ພົມພິພັກ, ກຳມະການສູນກາງພັກ, ລັດຖະມົນຕີກະຊວງກະສິກຳ ແລະປ່າໄມ້, ປະທານສະມາຄົມມິດຕະພາບ ລາວ-ຈີນ ຂັ້ນສູນກາງ ໄດ້ກ່າວຕ້ອນຮັບຄະນະຜູ້ແທນກອງປະຊຸມ ແລະ ກ່າວເປີດກອງປະຊຸມ ຢ່າງເປັນທາງການ, ຫຼັງຈາກນັ້ນ ຫົວໜ້າຄະນະຜູ້ແທນຈາກບັນດາປະເທດອາຊຽນກໍຄືບັນດາສະມາຄົມມິດຕະພາບອາຊຽນ-ຈີນ ໄດ້ຜັດປ່ຽນກັນປະກອບຄຳຄິດເຫັນແລກປ່ຽນ ແລະປຶກສາຫາລືລົງເລິກໃນຫົວຂໍ້ສະເພາະທີ່ໄດ້ກໍານົດໄວ້. ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລືທິດທາງການຮ່ວມມື ຂອງສະມາຄົມມິດຕະພາບ ລະຫວ່າງ ອາຊຽນ-ຈີນ ພາຍໃຕ້ສະພາບການແຜ່ລະບາດຂອງພະຍາດ COVID–19 ເພື່ອໃຫ້ປະຊາຊົນໃນບັນດາປະເທດອາຊຽນ ແລະຈີນ ມີຄວາມປອດໄພຈາກພະຍາດນີ້ ແລະຟື້ນຟູການໄປມາຫາສູ່ກັນໃຫ້ເປັນປົກກະຕິ. ພ້ອມນັ້ນ, ຍັງໄດ້ຕີລາຄາການຈັດຕັ້ງປະຕິບັດ, ການເຄື່ອນໄຫວວຽກງານຂອງສະມາຄົມມິດຕະພາບ ໃນໄລຍະຜ່ານມາ ພ້ອມທັງປຶກສາຫາລືກ່ຽວກັບບັນດາແຜນການກໍຄືກົນໄກການຮ່ວມມືໃນຕໍ່ໜ້າ ເພື່ອປະກອບສ່ວນເສີມສ້າງມິດຕະພາບ ແລະ ການຮ່ວມມືຕ້ານພະຍາດ ໂຄວິດ-19 ໃນບັນດາປະເທດອາຊຽນ ແລະ ຈີນ, ປະກອບສ່ວນເສີມຂະຫຍາຍສາຍພົວພັນມິດຕະພາບ ແລະການຮ່ວມມືຮອບດ້ານທີ່ຍືນຍົງ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ການພັດທະນາຮ່ວມກັນຕ່າງຝ່າຍຕ່າງມີຜົນປະໂຫຍດລະຫວ່າງອາຊຽນ-ຈີນ, ຈີນ-ອາຊຽນ.

ໃນກອງປະຊຸມຫົວໜ້າຄະນະຜູ້ແທນຈາກບັນດາປະເທດອາຊຽນ ແລະຈີນ ກໍໄດ້ຜັດປ່ຽນກັນປະກອບຄຳເຫັນຢ່າງສ້າງສັນ ແລະພ້ອມກັນປຶກສາຫາລືບັນດາແຜນການ ກໍຄືແຜນການເຄື່ອນໄຫວໃນຕໍ່ໜ້າ ຂອງວຽກງານສະມາຄົມມິດຕະພາບ ຈີນ-ອາຊຽນ, ສະມາຄົມມິດຕະພາບປະຊາຊົນຈີນກັບຕ່າງປະເທດ ແລະບັນດາສະມາຄົມມິດຕະພາບ ອາຊຽນ-ຈີນ ເພື່ອປະກອບສ່ວນເສີມຂະຫຍາຍ ແລະພັດທະນາການພົວພັນຮ່ວມມືດ້ານການທູດປະຊາຊົນໃຫ້ນັບມື້ມີບົດບາດ ແລະນຳເອົາຜົນປະໂຫຍດມາສູ່ປະຊາຊົນ ອາຊຽນ ແລະຈີນ.

ກອງປະຊຸມ ໄດ້ເປັນເອກະພາບອອກຖະແຫລງການຮ່ວມທິດທາງແຜນການຮ່ວມມືໃນຕໍ່ໜ້າລະຫວ່າງບັນດາສະມາຄົມມິດຕະພາບອາຊຽນ-ຈີນ ແລະ ຈີນ-ອາຊຽນ ເຊິ່ງເນື້ອໃນສໍາຄັນແມ່ນເວົ້າເຖິງການພົວພັນຮ່ວມມືເພື່ອຮ່ວມກັນຕ້ານ ແລະ ສະກັດກັ້ນ ການແຜ່ລະຂອງພະຍາດ ໂຄວິດ-19, ການຮ່ວມມືຟື້ນຟູຊີວິດການເປັນຢູ່ ຂອງປະຊາຊົນ, ໂຄງການ “ຂໍ້ລິເລີ່ມໜຶ່ງແລວໜຶ່ງເສັ້ນທາງ” ແລະ ແຜນແມ່ບົດວ່າດ້ວຍການເຊື່ອມໂຍງອາຊຽນ ໃນປີ 2025, ສ້າງກົນໄກສືບຕໍ່ຕິດຕາມ, ຊຸກຍູ້ໃຫ້ມີການຮ່ວມມືລະຫວ່າງປະເທດ 3 ລະດັບ ຄື: ຂັ້ນນະຄອນຫລວງ ຫລືແຂວງຕ່າງໆ, ຂັ້ນເມືອງຂອງ ຈີນ-ອາຊຽນ ແລະຂັ້ນໂຮງຮຽນ ຫລືໂຮງໝໍເພື່ອສະໜັບສະໜູນໃຫ້ບັນດານະຄອນຫລວງ ຫລືແຂວງຕ່າງໆ, ເມືອງ, ໂຮງຮຽນ ຫລື ໂຮງໝໍຂອງຈີນ ແລະບັນດາປະເທດອາຊຽນມີການສ້າງມິດຕະພາບນຳກັນໃຫ້ນັບມື້ຫລາຍຂຶ້ນ.

ກອງປະຊຸມໃນຄັ້ງນີ້ແມ່ນລາວເປັນເຈົ້າພາບຕາມການໝູນວຽນເຊິ່ງໃນຕອນທ້າຍກອງປະຊຸມ ທ່ານ ເພັດ ພົມພິພັກ ກໍໄດ້ມອບທຸງໃຫ້ສະມາຄົມມິດຕະພາບມາເລເຊຍ-ຈີນ ທີ່ຈະໄດ້ຮັບກຽດເປັນເຈົ້າພາບຈັດກອງປະຊຸມສະມາຄົມມິດຕະພາບລະຫວ່າງປະຊາຊົນກັບປະຊາຊົນ ອາຊຽນ-ຈີນ ຄັ້ງທີ 14 ໃນປີ 2024.

แชร์