ເສດຖະກິດຂອງຫວຽດນາມ ຂະຫຍາຍຕົວ ລະດັບ 7,7% ໄຕມາດ 2 ປີ 2022 ທຽບໃສ່ປີຜ່ານມາ

ຕາມຂ່າວຈາກ bangkokbiznews, ສຳນັກງານສະຖິຕິຂອງຫວຽດນາມ ລາຍງານໃນວັນທີ 29 ມິຖຸນາ 2022 ວ່າ: ຍອດລວມຜະລິດຕະພັນພາຍໃນປະເທດ (ຈີດີພີ) ໄຕມາດທີ 2 ຂອງປີ 2022 ຂະຫຍາຍຕົວລະດັບ 7,72% ເມື່ອທຽບໃສ່ ປີ 2021 ຊຶ່ງເປັນການຂະຫຍາຍຕົວໄວທີ່ສຸດໃນຮອບເກືອບ 10 ປີ ຫຼັງຈາກໄດ້ຮັບແຮງໜູນຈາກການຟື້ນໂຕດ້ານການສົ່ງອອກ ແລະການຜະລິດຊຶ່ງຊ່ວຍຊົດເຊີຍຜົນກະທົບຈາກການແພ່ລະບາດ ໂຄວິດ-19 ແລະການເພີ່ມຂຶ້ນຂອງລາຄານໍ້າມັນ.

ຊຶ່ງຂະນະທີ່ ຈີດີພີ ໃນໄຕມາດ ທຳອິດ ປີ 2022 ຂະຫຍາຍຕົວ ລະດັບ 6,42% ເມື່ອທຽບໃສ່ ປີ 2021 ສູງກວ່າ ນັກວິເຄາະຄາດການໄວ້ 5,5% ແລະ ໃກ້ຄຽງກັບເປົ້າໝາຍການຂະຫຍາຍຕົວໝົດປີທີ່ລັດຖະບານຫວຽດນາມກຳນົດໄວ້ທີ່ 6%-6,5%.

ສ່ວນເສດຖະກິດ ຫວຽດນາມ ໃນ 6 ເດືອນຕົ້ນປີນີ້ ຟື້ນຕົວເກືອບທຸກຂະແໜງການໂດຍສະເພາະຂະແໜງການຜະລິດ, ການສົ່ງອອກ, ການຄ້າຍ່ອຍ, ທະນາຄານ ແລະປະກັນໄພ. ຂະນະທີ່ລັດຖະບານຈະຕິດຕາມຢ່າງໃກ້ຊິດກ່ຽວກັບລາຄາສິນຄ້າທີ່ຈຳເປັນ ໂດຍສະເພາະລາຄານໍ້າມັນເຊື້ອໄຟໃນໄລຍະ 6 ເດືອນທ້າຍປີ 2022 ເພື່ອປະເມີນສະຖານະການເງິນເຟີ້ພາຍໃນປະເທດ. ນອກນີ້ດັດຊະນີລາຄາຜູ້ບໍລິໂພກເດືອນມິຖຸນາປັບຕົວຂຶ້ນ 3,3% ເມື່ອທຽບໃສ່ຕໍ່ປີ, ຂະນະທີ່ລັດຖະບານຫວຽດນາມ ກໍາໜົດເປົ້າໝາຍສະເລ່ຍຂອງເງິນເຟີ້ໃນປີນີ້ໄວ້ທີ່ 4%, ສ່ວນຍອດການສົ່ງອອກເພີ່ມຂຶ້ນ 20% ແລະ ຍອດການນຳເຂົ້າ ເພີ່ມຂຶ້ນ 16,3% ເປັນຕົ້ນຍອດການສົ່ງອອກກາເຟເພີ່ມຂຶ້ນ 13,3% ລະດັບ 145.000 ໂຕນ, ຍອດການສົ່ງອອກເຂົ້າເພີ່ມຂຶ້ນ72% ລະດັບ 750.000 ໂຕນ ແລະຍອດການສົ່ງອອກຢາງພາລາ ເພີ່ມຂຶ້ນ 16,5% ລະດັບ 180.000 ໂຕນ ໃນເດືອນມິຖຸນານີ້.

แชร์