ນິວຊີແລນ ແລະໄອແລນ ຊ່ວຍເຫລືອໂຄງການເກັບກູ້ລະເບີດ ແຫ່ງຊາດລາວ

ໃນວັນທີ 29 ມິຖຸນາ 2022 ທີ່ນະຄອນຫລວງວຽງຈັນ, ລັດຖະບານ ນິວຊີແລນ ແລະລັດຖະບານໄອແລນ ໄດ້ມອບພາຫະນະລົດ ແລະອຸປະກອນກວດກູ້ລະເບີດບໍ່ທັນແຕກໃຫ້ໂຄງການເກັບກູ້ລະເບີດແຫ່ງຊາດເພື່ອນຳໃຊ້ເຂົ້າໃນວຽກງານເກັບກູ້ລະເບີດໂດຍຜ່ານອົງການສະຫະປະຊາຊາດເພື່ອການພັດທະນາປະຈໍາ ສປປ ລາວ.ຕາງໜ້າໃຫ້ສອງລັດຖະບານກ່າວມອບໂດຍທ່ານ ນາງ ແຄັດ ທຣີນ ເຟືອງ ຮອງຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈໍາ ສປປ ລາວ ແລະ ຮັບໂດຍທ່ານ ລີປາວ ຢ່າງຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມພ້ອມດ້ວຍພະນັກງານ ແລະວິຊາການໂຄງການເກັບກູ້ລະເບີດແຫ່ງຊາດເຂົ້າຮ່ວມ.

ເຄື່ອງຊ່ວຍເຫລືອຄັ້ງນີ້ປະກອບມີ: ລົດພາກສະໜາມຈໍານວນ 2 ຄັນ, ລົດຕູ້ 15 ບ່ອນນັ່ງ ຈຳ ນວນ 1 ຄັນ, ເຄື່ອງກວດລະເບີດຈໍານວນ 58 ເຄື່ອງ, ອຸປະກອນຈັດກອງປະຊຸມທາງໄກ ຈຳນວນ 4 ຊຸດ, ອຸປະກອນໄອທີ ແລະ ອຸປະກອນອື່ນໆອີກຈໍານວນໜຶ່ງ ເພື່ອສະໜັບສະໜູນເຂົ້າໃນການປະຕິບັດງານຂອງໂຄງການເກັບກູ້ລະເບີດແຫ່ງຊາດ ແລະນໍາໃຊ້ເຂົ້າໃນວຽກງານແກ້ໄຂບັນຫາລະເບີດທີ່ບໍ່ທັນແຕກຕົກຄ້າງ ຢູ່ ສປປ ລາວ ລວມມູນຄ່າ 440.000 ໂດລາສະຫະລັດ.

ທ່ານ ນາງ ແຄັດທຣິນ ເຟືອງ ກ່າວວ່າ: ອົງການ ສປຊ ຍັງມຸ່ງໝັ້ນທີ່ຈະສະໜັບສະໜູນວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ, ພ້ອມທັງສຸມໃສ່ຄວາມເປັນເຈົ້າການຊ່ວຍເຫລືອຂົງເຂດນີ້ໃຫ້ມີຄວາມຍືນຍົງຂອງຂະແໜງການໃນໄລຍະຍາວ ແລະ ພ້ອມທີ່ຈະສືບຕໍ່ໃຫ້ການສະໜັບສະໜູນໃຫ້ແກ່ລັດຖະບານລາວ ໂດຍສະເພາະວຽກງານການແກ້ໄຂບັນຫາລະເບີດທີ່ບໍ່ທັນແຕກຕົກຄ້າງ ຢູ່ ສປປ ລາວ ໃນການສ້າງຂີດຄວາມສາມາດແຫ່ງງຊາດ. ຄຽງຄູ່ກັນນັ້ນ, ພວກເຮົາຍັງຈະໄດ້ຈັດຕັ້ງປະຕິບັດໂຄງການ ກ່ຽວກັບວຽກງານເກັບກູ້ລະເບີດບໍ່ທັນແຕກໃນອີກ 5 ປີຕໍ່ໜ້າ ແລະ ເຊື່ອໝັ້ນວ່າອົງການ ສປຊ ຈະພະຍາຍາມສືບຕໍ່ໃຫ້ການສະໜັບສະໜູນ ເພື່ອໃຫ້ລັດຖະບານລາວ ບັນລຸເປົ້າໝາຍການພັດທະນາແຫ່ງຊາດ ແລະ ເປົ້າໝາຍການພັດທະນາແບບຍືນຍົງ ໃນປີ 2030 ໂດຍສະເພາະ ແມ່ນເປົ້າໝາຍການພັດທະນາແບບຍືນຍົງທີ 18 ແລະສືບຕໍ່ຊ່ວຍເຫລືອວຽກງານສຳຫລວດ ແລະກວດກູ້ ຢູ່ ສປປ ລາວ ໃນຊຸມປີຕໍ່ໜ້າຕື່ມອີກ.

ໂອກາດນີ້, ທ່ານ ລີປາວ ຢ່າງ ກໍໄດ້ກ່າວສະແດງຄວາມຂອບໃຈ ແລະຕີລາຄາສູງຕໍ່ການສະໜັບສະໜູນຈາກລັດຖະບານນິວຊີແລນ ແລະລັດຖະບານໄອ ທີ່ໄດ້ໃຫ້ການຊ່ວຍເຫລືອວຽກງານແກ້ໄຂບັນຫາລະເບີດບໍ່ທັນແຕກຢູ່ ສປປ ລາວ ໃນຄັ້ງນີ້ເຊິ່ງເປັນການປະກອບສ່ວນໂດຍກົງ ແລະສໍາຄັນເຂົ້າໃນການພັດທະນາເສດຖະກິດ-ສັງຄົມ ແລະລຶບລ້າງຄວາມທຸກຍາກຂອງ ສປປ ລາວ ເພື່ອຊ່ວຍເຫລືອປະຊາຊົນລາວບັນດາເຜົ່າໃຫ້ປອດໄພຈາກລະເບີດບໍ່ທັນແຕກ. ທັງເປັນການປະກອບສ່ວນເຂົ້າໃນເປົ້າໝາຍຍຸດທະສາດແຜນພັດທະນາເສດຖະກິດ-ສັງຄົມແຫ່ງຊາດຂອງລັດຖະບານລາວກໍຄືການບັນລຸເປົ້າໝາຍການພັດທະນາທີ່ຍືນຍົງ ທີ 18 (SDG 18) ວ່າດ້ວຍ ‘’ຊີວິດທີ່ປອດໄພຈາກລະເບີດບໍ່ທັນແຕກ”. ພ້ອມທັງໃຫ້ຄຳໝັ້ນສັນຍາວ່າຈະນຳໃຊ້ພາຫະນະ ແລະອຸປະກອນຕ່າງໆ ເຂົ້າໃນວຽກງານສຳຫລວດ ແລະກວດກູ້ລະເບີດທີ່ບໍ່ທັນແຕ່ກຕົກຄ້າງ ຢູ່ ສປປ ລາວ ໃຫ້ມີປະສິດທິພາບ ແລະໄດ້ຮັບຜົນປະໂຫຍດສູງສຸດ.

ຂໍ້ມູນ: ກະຊວງ ຮສສ

แชร์