ທ່ານ ອາຊາງ ລາວລີ ພົບປະໂອ້ລົມພະນັກງານຫຼັກແຫລ່ງຂອງແຂວງຜົ້ງສາລີ

ໃນວັນທີ 28 ມິຖຸນາ 2022 ຢູ່ຫ້ອງປະຊຸມຫ້ອງວ່າວ່າການແຂວງ, ທ່ານ ອາຊາງ ລາວລີ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ໄດ້ພົບປະໂອ້ລົມ ແລະໃຫ້ທິດຕໍ່ການຊີ້ນຳໆພາຂອງອົງການປົກຄອງແຂວງຫລາຍບັນຫາສຳຄັນ.

ໂອກາດນີ້, ທ່ານ ອາຊາງ ລາວລີ ໄດ້ເນັ້ນໜັກຫຼາຍບັນຫາສໍາຄັນເປັນຕົ້ນໃຫ້ອົງຄະນະພັກແຂວງຜົ້ງສາລີເອົາໃຈໃສ່ຫັນວຽກງານກົງຈັກພັກ-ພະນັກງານ ເຫັນວ່າມີບາງບັນຫາທີ່ ຄະນະພັກ-ຄະນະນຳ ຫົວຈັກຫລັກແຫລ່ງແຂວງຈະຕ້ອງໄດ້ເພີ່ມທະວີການຈັດ ຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໂດຍສະເພາະແມ່ນ 2 ວາລະແຫ່ງຊາດ ຄື: ວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດໃຫ້ບັນລຸຕາມຄາດໝາຍຂອງແຜນການທີ່ວາງໄວ້; ສືບຕໍ່ເຂັ້ມງວດໃນວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ; ຫັນເອົາການຄຸ້ມຄອງການເກັບລາຍຮັບໄປສູ່ຄວາມທັນສະໄໝ; ດຶງດູດການລົງທຶນຂອງລັດ, ເອກະຊົນພາຍໃນ ແລະຕ່າງປະເທດເຂົ້າໃນການພັດທະນາພື້ນຖານໂຄງລ່າງເພື່ອສ້າງເງື່ອນໄຂ ແລະສິ່ງອໍານວຍຄວາມສະດວກຕ່າງໆ ໃຫ້ແກ່ການດໍາລົງຊີວິດຂອງປະຊາຊົນ; ຊຸກຍູ້ສົ່ງເສີມປະຊາຊົນເຮັດການຜະລິດກະສິກໍາ ໂດຍສືບຕໍ່ສຸມໃສ່ສົ່ງເສີມການປູກ ແລະສົ່ງອອກພືດກະສິກໍາທີ່ມີຕະຫລາດຮອງຮັບແລ້ວໃຫ້ກາຍເປັນສິນຄ້າຕາມທ່າແຮງບົ່ມຊ້ອນຂອງປະຊາຊົນໃຫ້ຫລາຍຂຶ້ນ,ຍົກສູງຄຸນນະພາບການສຶກສາ, ສາທາລະນະສຸກ; ແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ກ້າວໄປສູ່ຄວາມກີນດີຢູ່ດີ, ສືບຕໍ່ສົ່ງເສີມມູນເຊື້ອວັດທະນະທໍາ ແລະຮີດຄອງປະເພນີອັນດີງາມຂອງຊາດ ແລະຂອງທ້ອງຖິ່ນໃຫ້ຫລາຍຂຶ້ນ, ເອົາໃຈໃສ່ວຽກງານກໍ່ສ້າງຮາກຖານການເມືອງໃຫ້ໜັກແໜ້ນ ແລະເຂັ້ມແຂງ; ພ້ອມທັງວຽກງານການປ້ອງກັນ, ສະກັດກັ້ນ ແລະການຄວບຄຸມພະຍາດໂຄວິດ-19 ໃຫ້ມີປະສິດທິຜົນ.

ພ້ອມກັນນີ້, ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີກໍໄດ້ລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງແຂວງໂດຍທ່ານໄດ້ຍົກໃຫ້ເຫັນການຊີ້ ນຳໆ ພາໂດຍພາຍໃຕ້ການຊີ້ນໍາ-ນໍາພາຂອງຄະນະພັກ,ອົງການປົກຄອງແຕ່ລະຂັ້ນເຮັດໃຫ້ແຂວງຜົ້ງສາລີສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍດີ, ເສດຖະກິດ-ສັງຄົມ ໄດ້ຮັບການພັດທະນາຖືກທິດ ແລະມີການຂະຫຍາຍຕົວດີຂຶ້ນເທື່ອລະກ້າວເຊິ່ງສະແດງອອກອັດຕາການເຕີບໂຕສະເລ່ຍຢູ່ໃນລະດັບ 6,10%, ລວມຍອດຜະລິດຕະພັນພາຍໃນ (GDP) ສະເລ່ຍໃສ່ຫົວຄົນບັນລຸ 1.123 ໂດລາສະຫະລັດ, ໂຄງປະກອບເສດຖະກິດຕາມຂະແໜງການກະສິກໍາ-ປ່າໄມ້ ເພີ່ມຂຶ້ນ 11,37%, ອຸດສາຫະກໍາ-ຫັດຖະກໍາ ເພີ່ມ 5,89%, ການບໍລິການຫລຸດລົງ 1,72% ຂອງລວມຍອດດຜະລິດຕະພັນພາຍໃນ. ວຽກງານປະເມີນຄວາມທຸກຍາກ ໄດ້ປະເມີນຕາມ ດໍາລັດ 348/ລບ ໃນປີ 2019 ທົ່ວແຂວງມີ 516 ບ້ານ, ມີບ້ານພົ້ນທຸກ 117 ບ້ານ, ກວມ 22,67%, ຄອບຄົວພົ້ນທຸກ 12.015 ຄອບຄົວ, ກວມ 34,19% ແລະຄອບຄົວພັດທະນາ 2.862 ຄອບຄົວ ກວມ 8,14%. ປັດຈຸບັນສືບຕໍ່ສູ້ຊົນແກ້ໄຂຄວາມທຸກຍາກໃຫ້ໄດ້ 128 ບ້ານ ແລະຄອບຄົວທຸກຍາກໃຫ້ໄດ້ 7.040 ຄອບຄົວ. ພ້ອມກັນນັ້ນ, ກໍກຳລັງສຸມໃສ່ຈັດຕັ້ງປະຕິບັດ 2 ວາລະແຫ່ງຊາດຢ່າງແຂງແຮງ ແລະ ເປັນບຸລິມະສິດທີ່ສຳຄັນ, ວຽກງານໂຄງການກໍ່ສ້າງ ແລະ ຍົກຍ້າຍເທສະບານແຂວງ ໄດ້ເອົາໃຈໃສ່ຊີ້ນໍາຈັດຕັ້ງປະຕິບັດຕາມສັນຍາການຄ້າ ແລະມາຮອດປັດຈຸບັນ ມີຄວາມຄືບໜ້າເປັນມູນຄ່າປະມານ 122 ລ້ານກວ່າໂດລາສະຫະລັດ ເທົ່າກັບ 61,27 % ຂອງມູນຄ່າສັນຍາເງິນກູ້ 200 ລ້ານໂດລາ ແລະບັນຫາສໍາຄັນອື່ນໆ.

แชร์