ກອງປະຊຸມຄົບຄະນະບໍລິຫານງານພັກ ຄັ້ງທີ IV ສະໄໝທີ V ຂອງອົງຄະນະພັກ ອອປສ

ກອງປະຊຸມຄົບຄະນະບໍລິຫານງານພັກ ຄັ້ງທີ IV ສະໄໝທີ V ຂອງອົງຄະນະພັກອົງການໄອຍະການປະຊາຊົນສູງສຸດ (ອອປສ) ຈັດຂຶ້ນໃນວັນທີ 27 ມິຖຸນາ ຜ່ານມາ ພາຍໃຕ້ການເປັນປະທານຂອງສະຫາຍ ໄຊຊະນະ ໂຄດພູທອນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ, ມີຮອງເລຂາຄະນະພັກ, ຄະນະປະຈຳພັກ ແລະຄະນະພັກເຂົ້າຮ່ວມ.

ກອງປະຊຸມ, ໄດ້ປຶກສາຫາລື ແລະເອກະພາບກັນໃນການຕີລາຄາຜົນສໍາເລັດຂອງການຊີ້ນຳ-ນຳພາການຈັດຕັ້ງປະຕິບັດ 9 ວຽກງານຈຸດສຸມ 3 ເດືອນ (4,5,6) ປີ 2022; ການປັບປຸງການຈັດຕັ້ງພາຍໃນ ອົງການໄອຍະການປະຊາຊົນສູງສຸດ, ການແບ່ງຄວາມຮັບ ຜິດຊອບຂອງຄະນະພັກ-ຄະນະນຳ ອົງການໄອຍະການປະຊາຊົນສູງສຸດ, ເຜີຍແຜ່, ຈັດຕັ້ງຜັນຂະຫຍາຍ 2 ວາລະແຫ່ງຊາດ ຢູ່ອົງການໄອຍະການປະຊາຊົນສູງສຸດ ແລະ ບັນດາອົງການໄອຍະການປະຊາຊົນທ້ອງຖິ່ນ, ພ້ອມນັ້ນກໍໄດ້ປະກາດການເລື່ອນຂັ້ນພະນັກງານໄອຍະການປະຊາຊົນແຕ່ລະຂັ້ນ; ກອງປະຊຸມສະຫລຸບວຽກງານຈັດຕັ້ງ, ກໍ່ສ້າງ-ພະນັກງານ ທົ່ວປະເທດ ຄັ້ງທີ 2 ຂອງອົງການໄອຍະການປະຊາຊົນ ເພື່ອຈັດຕັ້ງປະຕິບັດວຽກງານຂອງພະນັກງານເຂດປະຈຳເມືອງໃນຂອບເຂດທົ່ວປະເທດ ຜ່ານລະບົບທາງໄກ, ຈັດຝຶກອົບຮົມເພື່ອສ້າງຄວາມເຂັ້ມແຂງທາງດ້ານວິຊາການໃຫ້ພະນັກງານ ອົງການໄອຍະການປະຊາຊົນ ຢູ່ແຂວງຈຳປາສັກ, ແຂວງອຸດົມໄຊ; ການປັບປຸງນິຕິກຳກ່ຽວກັບຄອບຄົວພະນັກ ງານໄອຍະການ ແລະ ລົງວິໄນຕໍ່ພະນັກງານ, ສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນອົງການຄຸ້ມຄອງ ຂອງອົງການໄອຍະການປະຊາຊົນສູງສຸດ; ການສ້າງບົດບັນທຶກກອງປະຊຸມທາງໄກ ລະຫວ່າງຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສປປ ລາວ ກັບຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ, ອົງການໄອຍະການສູງສຸດ ສປ ຈີນ ແລະກູຍບາ ທີ່ມີການພົວພັນຮ່ວມມືສອງຝ່າຍໄປແລກປ່ຽນບົດຮຽນວິຊາການທາງດ້ານກົດໝາຍ; ຄະນະພັກ-ຄະນະນຳມີຄວາມສາມັກຄີເປັນເອກະພາບ, ຮັບຜິດຊອບໃນການຊີ້ນຳ-ນຳພາ ໃຫ້ມີຄຸນນະພາບ, ຄະນະບໍລິ ຫານງານພັກ ແຕ່ລະສະຫາຍ ພ້ອມທັງແກ້ໄຂຈຸດອ່ອນຂໍ້ຄົງຄ້າງ ທັງເປັນບ່ອນອີງໃນການເລືອກເຟັ້ນບຸກຄະລາກອນຜູ້ທີ່ດີເດັ່ນເພື່ອປະກອບສ່ວນເຂົ້າໃນຄະນະບໍລິຫານງານພັກ ຂອງອົງການໄອຍະການປະຊາຊົນສູງສຸດໃຫ້ໄດ້ຕາມມາດຖານທີ່ວາງໄວ້.

ໃນໂອກາດນີ້, ປະທານກອງປະຊຸມໄດ້ມີຄໍາເຫັນຊີ້ນໍາຕໍ່ກອງປະຊຸມໂດຍໄດ້ເນັ້ນໜັກໃຫ້ບັນດາຄະນະບໍລິຫານງານພັກຈົ່ງຍົກສູງຄວາມຮັບຜິດຊອບຄວາມເປັນເຈົ້າການບຸກທະລຸ ເສີມຂະຫຍາຍແບບແຜນການນຳພາ ແລະວິທີເຮັດວຽກຂອງຄະນະພັກ, ສ້າງນິຕິກຳລະຫວ່າງອົງການໄອຍະການປະຊາຊົນສູງສຸດ ກັບ ກະຊວງກະສິກຳ ແລະ ປ່າໄມ້, ກະຊວງການເງິນ, ສານປະຊາຊົນສູງສຸດ ແລະອົງການອື່ນໃຫ້ສຳເລັດ; ເອົາໃຈໃສ່ໂຄ ສະນາເຜີຍແຜ່ນິຕິກຳຂອງອົງການໄອຍະການປະຊາຊົນສູງສຸດໃຫ້ພະນັກງານ-ລັດຖະກອນ ທົ່ວອົງການໄອຍະການປະຊາຊົນ, ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ມີແບບແຜນການດຳລົງຊີວິດ,ມີຄວາມຕັດສິນໃຈຢ່າງສູງ ເຮັດສໍາເລັດໜ້າທີ່ທີ່ພັກ, ລັດ ແລະປະຊາຊົນ ມອບໝາຍໃຫ້.

แชร์