ສະພາແຫ່ງຊາດ ພິຈາລະນາກົດໝາຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ ສະບັບປັບປຸງ

ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 29 ມິຖຸນາ ນີ້, ພາຍໃຕ້ການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະການຄ້າໄດ້ສະເໜີຮ່າງກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ ສະບັບປັບປຸງ ເຊິ່ງປະກອບມີ XI ພາກ, 5 ໝວດ ແລະ72 ມາດຕາ, ພ້ອມນີ້ກໍໄດ້ປ່ຽນຊື່ກົດໝາຍຈາກກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະກາງ ມາເປັນກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ ໂດຍໄດ້ເພີ່ມຈຸນລະວິສາຫະກິດເຂົ້າຕື່ມເຊິ່ງການປັບປຸງເນື້ອໃນແມ່ນໄດ້ຕັດອອກຈຳນວນ 6 ມາດຕາ, ປັບປຸງເນື້ອໃນ 30 ມາດຕາ ແລະ ສ້າງໃໝ່ 23 ມາດຕາ.

ໂອກາດນີ້, ທ່ານ ມະໄລທອງ ກົມມະສິດ ໄດ້ໃຫ້ຮູ້ກ່ຽວກັບ ຄວາມຈຳເປັນໃນການປັບປຸງກົດໝາຍສະບັບດັ່ງກ່າວວ່າ: ວິສາຫະກິດຂະໜາດນ້ອຍ ແລະກາງ ຂຽນຫຍໍ້: ວນກ ຂຽນຫຍໍ້ເປັນພາສາອັງກິດ SME ແມ່ນມີບົດບາດຢ່າງຕັ້ງໜ້າຕໍ່ກັບການພັດທະນາເສດຖະກິດ-ສັງຄົມ ຂອງ ສປປ ລາວ ເປັນຕົ້ນແມ່ນການຜະລິດສິນຄ້າ,ການດໍາເນີນ ການຄ້າ ແລະ ການບໍລິການ, ຊ່ວຍສ້າງວຽກເຮັດງານທໍາ, ສ້າງລາຍຮັບ ແລະ ຍົກສູງຊີວິດການເປັນຢູ່ຂອງປະຊາຊົນ ກໍຄື ການສ້າງປະຖົມປັດໄຈໃຫ້ແກ່ການຫັນເປັນອຸດສາຫະກໍາ ແລະ ທັນສະໄໝເທື່ອລະກ້າວ, ປະກອບສ່ວນໃຫ້ເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ. ອີງຕາມຜົນການສໍາຫລວດເສດຖະກິດທົ່ວປະເທດ ປີ 2020 ຈໍານວນ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ (MSME) ກວມເອົາ 99,8% ຈາກການລົງສໍາຫລວດຕົວຈິງຫົວໜ່ວຍທຸລະກິດ ຈໍານວນ 133.997 ຫົວໜ່ວຍ. ໃນນີ້, ຈຸນລະວິສາຫະກິດແມ່ນກວມເອົາ 94%. ນອກນີ້ ວຽກງານສົ່ງເສີມ SME ຍັງຖືກບັນຈຸເຂົ້າໃນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານ ເສດຖະກິດ-ການເງິນ (2021-2023). ເຊິ່ງຜ່ານການຄົ້ນຄວ້າ ແລະ ວິໄຈ ຂໍ້ມູນຕ່າງໆທີ່ກ່ຽວຂ້ອງເຫັນວ່າມີຄວາມຈໍາເປັນຕ້ອງປັບປຸງກົດໝາຍໃຫ້ສອດຄ່ອງກັບສະພາບການຂະຫຍາຍຕົວຂອງເສດຖະກິດໃນຍຸກປັດຈຸບັນເປັນຕົ້ນຈຸນລະວິສາຫະກິດ ແມ່ນເປັນວິສາຫະກິດທີ່ກວມເອົາອັດຕາສ່ວນຫລາຍໃນຈໍານວນວິສາຫະກິດທັງໝົດ ຢູ່ ສປປ ລາວ ເຊິ່ງເຫັນວ່າຄວນໃຫ້ຄວາມສໍາຄັນສູງຂຶ້ນ ແລະກໍານົດໃຫ້ແຈ້ງຕື່ມໃນການສົ່ງເສີມວິສາຫະກິດດັ່ງກ່າວເປັນຕົ້ນກົດໝາຍສະບັບປັດຈຸບັນແມ່ນ “ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ-SME” ຄວນປ່ຽນຊື່ເປັນ “ກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ-MSME”.

ພາຍຫລັງທີ່ກົດໝາຍສະບັບດັ່ງກ່າວໄດ້ຖືກຮັບຮອງ ແລະປະກາດໃຊ້ຢ່າງເປັນທາງການແລ້ວຈະມີນິຕິກຳທີ່ຊັດເຈນໂດຍສະເພາະແມ່ນມີນະໂຍບາຍສົ່ງເສີມ MSME ທີ່ລະອຽດ, ຈະແຈ້ງ ແລະແທດເໝາະກັບສະພາບຕົວຈິງ ຢູ່ ສປປ ລາວ, ຈະເຮັດໃຫ້ການຈັດຕັ້ງປະຕິບັດວຽກງານສົ່ງເສີມ MSME ໃນທົ່ວປະເທດມີຄວາມເປັນເອກະພາບ, ເປັນລະບົບ ແລະມີຜະສິດທິຜົນສູງ, ເຮັດໃຫ້ MSME ໄດ້ຮັບການພັດທະນາ ແລະມີການຂະຫຍາຍຕົວທັງປະລິມາ ແລະຄຸນນະພາບ, ປະກອບສ່ວນແກ່ການສ້າງວຽກເຮັດງານທຳໃຫ້ປະຊາຊົນລາວຢ່າງກວ້າງຂວາງ ແລະທົ່ວເຖິງ, ປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນເປັນກ້າວໆ.

แชร์