4 ໜ່ວຍພັກ ທີ່ຂຶ້ນກັບຮາກຖານພັກ ແຂວງວຽງຈັນ ໄດ້ຮັບການຢັ້ງຢືນ ເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ.

ພິທີມອບ-ຮັຍໃບຢັ້ງຢືນ ໜ່ວຍພັກ ປອດໃສ ເຂັ້ມແຂງ ໜັກແໜ້ນ ໃຫ້ໜ່ວຍພັກ ບໍລິຫານ, ສັງຄົມສົງເຄາະ, ປະກັນສັງຄົມ ແລະໜ່ວຍພັກອົງການກາແດງທີ່ຂຶ້ນກັບຮາກຖານພັກພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ ໄດ້ຈັດຂຶ້ນໃນວັນທີ 29 ມິຖຸນາ 2022 ຢູ່ຫ້ອງການປະກັນສັງຄົມແຂວງ, ໂດຍການເປັນກຽດເຂົ້າຮ່ວມຂອງ ສະຫາຍ ຄຳພັນ ສິດທິດໍາພາ ກຳມະການສູນກາງພັກ, ເລຂາພັກແຂວງ,ເຈົ້າແຂວງວຽງຈັນ,ມີຄະນະພັກຮາກຖານ, ເລຂາໜ່ວຍພັກພະແນກການອ້ອມຂ້າງ, ພ້ອມດ້ວຍສະມາຊິກພັກພາຍໃນ 4 ໜ່ວຍພັກດັ່ງກ່າວເຂົ້າຮ່ວມ.

ໂອກາດນີ້, ສະຫາຍ ສີສະໄຫວ ແກ້ວດາລາວິນ ຕາງໜ້າເລຂາໜ່ວຍພັກທັງ 4 ໜ່ວຍ ໄດ້ຂຶ້ນຜ່ານບົດສະຫຼູບຕີລາຄາປະເມີນຜົນການກໍ່ສ້າງໜ່ວຍພັກປອດໃສເຂັ້ມແຂງ ໜັກແໜ້ນ ປະຈຳປີ 2021 ຂອງ 4 ໜ່ວຍພັກດັ່ງກ່າວວ່າ: ຜ່ານມາບັນດາຄະນະໜ່ວຍພັກ, ສະມາຊິກພັກໄດ້ເອົາໃຈໃສ່ເຊື່ອມຊຶມ,ກຳແໜ້ນແນວທາງນະໂຍບາຍ, ມະຕິ, ຄໍາສັ່ງ, ຂໍ້ກຳນົດ, ກົດລະບຽບຂອງພັກເຮັດໃຫ້ສະມາຊິກພັກທຸກສະຫາຍມີຄວາມຮັບຮູ້ ແລະ ເຂົ້າໃຈດ້ານທິດສະດີການເມືອງ, ຕັ້ງໜ້າປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງຫັນແນວທາງນະໂຍບາຍຂອງພັກ, ລະບຽບກົດໝາຍຂອງລັດເປັນແຜນການ, ແຜນງານ, ໂຄງການ ແລະຈັດຕັ້ງປະຕິບັດຕົວຈິງໄດ້ຮັບຜົນສຳເລັດຕາມແຜນການ ແລະຄາດໝາຍທີ່ວາງໄວ້; ມີທັດສະນະຫຼັກໝັ້ນການເມືອງໜັກແໜ້ນ, ມີຄວາມຈົງຮັກພັກດີ,ເຊື່ອໝັ້ນຕໍ່ການນຳພາ ແລະ ອຸດົມການສັງຄົມນິຍົມຂອງພັກຢ່າງສະເໝີຕົ້ນສະເໝີປາຍ, ຍຶດໝັ້ນຈຸດໝາຍສັງຄົມນິຍົມ, ມີຄວາມອົດທົນໜຽວແໜ້ນ, ບໍ່ຫວັ່ນໄຫວຄອນແຄນຕໍ່ສະພາບການຜັນແປຕ່າງໆ ທັງຢູ່ພາຍໃນ ແລະ ຕ່າງປະເທດ, ຮູ້ຈຳແນກມິດ-ສັດຕູຢ່າງຈະແຈ້ງ, ມີຄວາມສາມັກຄີເປັນເອກະພາບພາຍໃນການຈັດຕັ້ງພັກຢ່າງແໜ້ນແຟ້ນ, ບໍ່ມີແນວຄິດສວຍໂອກາດ, ສໍ້ລາດບັງຫຼວງ, ຫຼີ້ນກິນຟຸມເຟືອຍ, ຕ້ານແນວຄິດຫຼາຍພັກ, ຫຼາຍເຄົ້າ, ຈຸ້ມເຈື້ອເຊື້ອສາຍ ແລະ ກຸ່ມກ້ອນຢູ່ໃນການຈັດຕັ້ງພັກ; ສັດຊື່ບໍລິສຸດຕໍ່ໜ້າທີ່ວຽກງານ, ຕໍ່ການຈັດຕັ້ງ ແລະ ຕໍ່ປະເທດຊາດ, ໄດ້ຍຶດໝັ້ນ ແລະ ປະຕິບັດຕາມ 5 ຫຼັກການ, 3 ທິດນໍາໃນການກໍ່ສ້າງ ແລະ ປັບປຸງພັກຢ່າງເຂັ້ມງວດ, ໄດ້ເອົາໃຈໃສ່ກໍ່ສ້າງມະຫາຊົນເຂົ້າພັກ ແມ່ນຖືເອົາຄູນນະພາບເປັນກົກ ບົນພື້ນຖານປະຕິບັດໃຫ້ຖຶກຕ້ອງຕາມມາດຖານເງື່ອນໄຂ, ບາດກ້າວ, ຂັ້ນຕອນຂອງການຂະຫຍາຍພັກທີ່ໄດ້ກໍານົດໄວ້ໃນກົດລະບຽບຂອງພັກຢ່າງເຂັ້ມງວດ; ຄະນະພັກໄດ້ນໍາພາເຄື່ອນໄຫວປະຕິບັດໜ້າທີ່ວຽກງານຕາມຫຼັກການລວມສູນປະຊາທິປະໄຕຢ່າງເຂັ້ມງວດ, ມີການແບ່ງຄວາມຮັບຜິດຊອບພາຍໃນຄະນະໜ່ວຍພັກ ແລະສະມາຊິກພັກຢ່າງຈະແຈ້ງ, ມີການຊຸກຍູ້, ຕິດຕາມ ແລະກວດກາການຈັດຕັ້ງປະຕິບັດວຽກງານແຕ່ລະໄລຍະ, ມີການສະຫຼຸບຖອດຖອນບົດຮຽນເພື່ອປັບປຸງແບບແຜນການນຳພາໃຫ້ສອດຄ່ອງກັບສະພາບຕົວຈິງ.

ເປັນກຽດມອບໃບຢັ້ງຢືນ ໜ່ວຍພັກ ປອດໃສ ເຂັ້ມແຂງ ໜັກແໜ້ນ ໃຫ້ 4 ໜ່ວຍພັກດັ່ງກ່າວທີ່ຂຶ້ນກັບຮາກຖານພັກພະແນກແຮງງານ ແລະສະຫວັດດີການສັງຄົມ ແຂວງວຽງຈັນ ຄັ້ງນີ້ໂດຍສະຫາຍ ຄຳພັນ ສິດທິດໍາພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ.

แชร์