ຮອງລັດຖະມົນຕີກະຊວງ ຜທ ຕ້ອນຮັບຮອງຫົວໜ້າຫ້ອງການ ອົງການໄຈກາ

ໃນວັນທີ 27 ມິຖຸນາ ຜ່ານມາ, ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະການລົງທຶນ(ຜທ) ໄດ້ຕ້ອນຮັບ ທ່ານ ໂກຈິ ໂອຊິກິຣິ (Koji OSHIKIRI) ຮອງຫົວໜ້າຫ້ອງການອົງການໄຈກາ ປະຈຳ ສປປ ລາວ ຜູ້ເກົ່າເຂົ້າຢ້ຽມອຳລາໃນໂອກາດສໍາເລັດໜ້າທີ່ ແລະທ່ານ ໂນຣິຢູກິ ອີໂຕ (Noriyuki ITO) ໃນໂອ ກາດໄດ້ຮັບຕຳແໜ່ງເປັນຮອງຫົວໜ້າຫ້ອງການອົງການໄຈກາ ປະຈຳ ສປປ ລາວ ຜູ້ໃໝ່.

ໂອກາດນີ້, ທ່ານ ນາງ ພອນວັນ ອຸທະວົງ ໄດ້ສະແດງຄວາມຂອບໃຈຢ່າງຈິງໃຈຕໍ່ທ່ານ ໂກຈິ ໂອຊິກິຣິ ທີ່ໄດ້ປະຕິບັດໜ້າທີ່ ແລະ ເຮັດວຽກຢູ່ ສປປ ລາວ ເປັນເວລາ 5 ປີຜ່ານມາເຊິ່ງໄລຍະທີ່ປະຕິບັດໜ້າທີ່ນັ້ນທ່ານເປັນຜູ້ໜຶ່ງທີ່ໄດ້ສຸມສະຕິປັນຍາ ແລະເຫື່ອແຮງໃນການຊຸກຍູ້ການຈັດຕັ້ງປະຕິບັດບັນດາກິດຈະກຳແລະໂຄງການຊ່ວຍເຫລືອຂອງລັດຖະບານຍີ່ປຸ່ນແກ່ລັດຖະບານ ສປປ ລາວ ໃນ 4 ຂົງເຂດວຽກງານບູລິມະສິດຄື: ການປັບປຸງການໃຫ້ການບໍລິການສາທາລະນະສຸກ ແລະຂະແໜງການອື່ນໆ ເປັນຕົ້ນວຽກງານເກັບກູ້ລະເບີດບໍ່ທັນແຕກເຊິ່ງການຊ່ວຍເຫລືອດັ່ງກ່າວ ໄດ້ປະກອບສ່ວນຢ່າງຕັ້ງໜ້າເຂົ້າໃນການບັນລຸເປົ້າໝາຍການພັດທະນາເສດຖະກິດ-ສັງຄົມ ຢູ່ສປປ ລາວ ແລະທັງເປັນການເພີ່ມທະວີການຮ່ວມມືພັດທະນາລະຫວ່າງສອງປະເທດລາວ ແລະຍີ່ປຸ່ນ.

ພ້ອມນີ້, ທ່ານ ນາງ ພອນວັນ ອຸທະວົງ ຕາງໜ້າໃຫ້ກະຊວງແຜນການ ແລະການລົງທຶນກໍຄືລັດຖະບານ ແລະປະຊາຊົນລາວ ໄດ້ສະແດງຄວາມຂອບໃຈຢ່າງສຸດຊຶ້ງໃນການປະກອບສ່ວນທີ່ມີຄຸນຄ່າຢ່າງສູງຂອງ ທ່ານ ໂກຈິ ໂອຊິກິຣິ ແລະອວຍພອນໄຊໃຫ້ທ່ານປະສົບຄວາມສຳເລັດໃນໜ້າທີ່ໃໝ່ ແລະເດີນທາງກັບປະເທດດ້ວຍຄວາມສະຫວັດດີພາບ.

ພ້ອມນີ້, ທ່ານຮອງລັດຖະມົນຕີກະຊວງ ຜທ ກໍສະແດງຄວາມຍິນດີ ແລະຊົມເຊີຍທ່ານ ໂນຣິຢູກິ ອີໂຕ ຮອງຫົວໜ້າຫ້ອງການອົງການໄຈກາ ປະຈຳ ສປປ ລາວ ຜູ້ໃໝ່ ທີ່ຈະມາສືບຕໍ່ປະຕິບັດວຽກງານໃຫ້ເກີດດອກອອກຜົນ ແລະຫັວງຢ່າງຍິ່ງວ່າອົງການໄຈກາກໍຄືລັດຖະບານຍີ່ປຸ່ນຈະສືບຕໍ່ໃຫ້ການສະໜັບສະໜູນຊ່ວຍເຫລືອດ້ານທຶນຮອນ ແລະວິຊາການແກ່ ສປປ ລາວ ເພື່ອປະກອບສ່ວນຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ໃຫ້ບັນລຸຜົນຕາມເປົ້າໝາຍວາງໄວ້.

แชร์