ເປີດໂຄງການພຣະສະມະນະທູດລາວ ກຳມາທິການຕ່າງປະເທດ

ໃນວັນທີ 28 ມີຖຸນາ 2022 ກໍາມາທິການຕ່າງປະເທດຈັດພິທີເປີດໂຄງການພຣະສະມະນະທູດລາວກໍາມາທິການຕ່າງປະເທດທີ່ຫໍປະຊຸມສູນການຮ່ວມມືສາກົນ ແລະ ການຝຶກອົບຮົມ (ICTC) ໂດຍໃຫ້ກຽດເຂົ້າຮ່ວມຂອງພະອາຈານໃຫຍ່ ມະຫາບຸນມາ ສິມມາພົມ ປະທານສູນກາງອົງການພຸດທະສາສະໜາສຳພັນແຫ່ງ ສປປ ລາວ (ອພສ), ພະອາຈານໃຫຍ່ບຸນສ່ວນ ພັນທະວົງ ຮອງປະທານ ອພສ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດ, ມີພະສົງສຳມະເນນພ້ອມຜູ້ແທນສາສະໜາຕ່າງໆທັງພາຍໃນ, ຕ່າງປະເທດ ແລະພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງຂອງໂຄງການພະສະມະນະທູດລາວແມ່ນເພື່ອຝຶກອົບຮົມພຣະສະມະນະທູດລາວໃຫ້ມີຄວາມຮູ້ຄວາມສາມາດໃຫ້ມີຄວາມໝັ້ນໃຈໃນການປະຕິບັດສາສະນະກິດຕາມວັດຖຸປະສົງ, ເພື່ອກຽມພ້ອມພຣະສະມະນະທູດລາວທີ່ມີຄຸນສົມບັດເໜາະສົມໃນການສົງເສີມສະໜັບສະໜູນພຣະສົງລາວທີ່ເຮັດໜ້າທີ່ເຜີຍແຜ່ພຣະພຸດທະສາສະໜາຢູ່ຕ່າງປະເທດ,ເພື່ອສະໜອງນະໂຍບາຍຂອງພັກ-ລັດ ແລະອົງການພຸດທະສາສະໜາສຳພັນແຫ່ງ ສປປ ລາວ ໂດຍລວມ, ໂດຍສະເພາະຄືກຳມາທິການ ການຕ່າງປະເທດທາງດ້ານການພົວພັນວຽກງານຕ່າງປະເທດຂອງພຣະພຸດທະສາສະໜາ ແລະ ສາສະໜາອື່ນ ແລະ ເຮັດໃຫ້ພະສົງສາມະເນນລາວພໍ່ຂາວ, ແມ່ຂາວ ມີຄວາມຮູ້ມີຄວາມສາມາດ, ມີຄວາມໝັ້ນໃຈຕົນເອງໃນການໄປເຜີຍແຜ່ພຣະພຸດທະສາສະໜາທັງພາຍໃນປະເທດ ແລະຕ່າງປະເທດ, ໄດ້ນຳເອົາພຣະພຸດທະສາສະໜາຕະຫຼອດເຖິງຮີດຄອງປະເພນີວັດທະນະທຳຂອງລາວ ແນວທາງນະໂຍບາຍຂອງພັກ-ລັດອອກໄປເຜີຍແຜ່ໃຫ້ຕ່າງປະເທດໃນໂລກຮັບຮູ້ຢ່າງກວ້າງຂວາງ, ເຮັດໃຫ້ເກີດການເຜີຍແຜ່ພຣະພຸດທະສາສະໜາຢ່າງມີຮູບການທີ່ເປັນເອກະລັກ ແລະ ເອກະພາບທັງພາຍໃນ ແລະຕ່າງປະເທດ, ຍົກສູງພາລະບາດບາດຂອງພຣະສົງລາວໃນພາກພື້ນ ແລະສາກົນ.

ພຣະສະມະນະທູດມີພາລະບົດບາດ ແລະໜ້າທີ່ສຳຄັນໃນການເຜີຍແຜ່ຫຼັກທຳເປັນຜູ້ນຳໃນການຟື້ນຟູພຣະພຸດທະສາສະໜາພ້ອມທັງເປັນຜູ້ສົ່ງເສີມການຮຽນຮູ້ ແລະ ສ້າງຄວາມສາມັກຄີໃຫ້ແກ່ຊຸມຊົນດ້ວຍການນຳເອົາຫຼັກທຳຄຳສັງສອນທາງພຣະພຸດທະສາສະໜາມາເປັນແກນກາງໃນການພັດທະນາ, ມີພາລະບົດບາດ ແລະໜ້າທີ່ໃນຖານະເປັນຕົວແທນຂອງພຣະສຳມາສຳພຸດທະເຈົ້າໃນດ້ານພຸດທະສາສະໜາເພື່ອສັງຄົມທັງພາຍໃນ ແລະ ຕ່າງປະເທດ. ເຊິ່ງພຣະສະມະນະທູດມີໜ້າທີ່ປະຕິບັດຕາມແນວທາງຂອງພຣະສະມະນະທູດຕົ້ນແບບຕັ້ງແຕ່ສະໄໝພຣະພຸດທະການ ແລະຫຼັງພຣະພຸດທະການ.

แชร์