ກະຊວງການຕ່າງປະເທດ ທາບທາມສ້າງແຜນກໍານົດພະນັກງານນຳພາ-ຄຸ້ມຄອງ

ໃນວັນທີ 28-30 ມິຖຸນາ 2022, ກະຊວງການຕ່າງປະເທດ ໄດ້ຈັດກອງປະຊຸມທາບທາມ ເພື່ອສ້າງແຜນກໍານົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ຂອງກະຊວງການຕ່າງປະເທດ, ໂດຍການເປັນປະທານຮ່ວມ ຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ທ່ານນາງ ບຸດສະດີ ທະນະເມືອງ ຮອງຫົວໜ້າຄະນະຈັດຕັ້ງສູນກາງພັກ, ໂດຍມີຫົວໜ້າກົມ, ຮອງຫົວໜ້າກົມ ແລະ ຫົວໜ້າພະແນກ ທີ່ເປັນຄະນະໜ່ວຍພັກພາຍ ໃນກະຊວງການຕ່າງປະເທດ ແລະ ພະນັກງານຈາກຄະນະຈັດຕັ້ງສູນກາງພັກ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ໄດ້ກ່າວເປີດກອງປະຊຸມ ແລະ ໄດ້ເນັ້ນໜັກເຖິງ ຄວາມໝາຍ, ຄວາມສໍາຄັນ  ແລະ ຈຸດປະສົງຂອງວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ເຊິ່ງເປັນວຽກງານທີ່ສໍາຄັນ, ເປັນພື້ນຖານຂອງວຽກງານພະນັກງານ ເພື່ອຕອບສະໜອງກັບໜ້າທີ່ການເມືອງ ຂອງພັກ-ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະສາດ ກ່ຽວກັບວຽກງານພະນັກງານໃຫ້ເປັນອັນລະອຽດ ເພື່ອສ້າງພື້ນຖານໃຫ້ແກ່ການສ້າງແຜນກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງ ພະນັກງານຢ່າງສົມເຫດສົມຜົນ. ນອກນັ້ນ, ການສ້າງແຜນກໍານົດພະນັກງານ ແມ່ນການຄາດຄະເນເປົ້າໝາຍ ພະນັກງານ ທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງ ແຕ່ລະຂັ້ນ, ແນໃສ່ຮັບປະກັນລັກສະນະສືບທອດ ປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ.

ພ້ອມດຽວກັນນີ້, ທ່ານຮອງນາຍົກລັດຖະມົນຕີ ໄດ້ແນະນໍາ ໃຫ້ຜູ້ເຂົ້າຮ່ວມຕ້ອງໄດ້ຄົ້ນຄວ້າຢ່າງ ເລິກເຊິ່ງຕໍ່ ກັບເປົ້າໝາຍ ເລືອກເຟັ້ນທີ່ຈະກຳນົດເຂົ້າໃສ່ແຕ່ລະຕຳແໜ່ງ, ຕ້ອງຄັດເລືອກໃຫ້ໄດ້ບຸກຄົນທີ່ພົ້ນເດັ່ນ ທີ່ພຽບພ້ອມໄປດ້ວຍຄວາມຮູ້, ຄວາມສາມາດ, ຄຸນສົມບັດ ສິນທຳປະຕິວັດ, ຮູ້ຜັນຂະຫຍາຍແນວ ທາງນະໂຍບາຍ ແລະ ນິຕິກຳຕ່າງໆຂອງພັກ-ລັດ ເຂົ້າໃນການນໍາພາປະຕິບັດໜ້າທີ່ວຽກງານ, ມີພາວະຄວາມເປັນຜູ້ນຳ ໂດຍສະເພາະ ແມ່ນການນຳພາພະນັກງານ-ລັດຖະກອນ ແລະ ມະຫາຊົນ ເຄື່ອນໄຫວວຽກງານຕ່າງໆ ທີ່ການຈັດຕັ້ງມອບໝາຍໃຫ້, ມີຄວາມສະດຸ້ງໄວຕໍ່ບັນຫາຕ່າງໆ, ແກ້ໄຂບັນຫາຕ່າງໆ ຢ່າງມີປະສິດທິຜົນ, ມີຄວາມດຸໝັ່ນ, ພາກພຽນ, ປະຢັດ, ສັດຊື່, ປອດໃສ, ບໍ່ຫລິ້ນກິນຟຸມເຟືອຍ, ບໍ່ສໍ້ລາດບັງຫລວງ, ມີທັດສະນະມະຫາຊົນ ແລະ ເປັນເຈົ້າການໃນການເຕົ້າໂຮມຄວາມສາມັກຄີ, ເຮັດວຽກມີແບບແຜນ, ມີໂຄງການ, ມີການຊຸກຍູ້ຕິດຕາມ, ກວດກາ, ສະຫລຸບຕີລາຄາ, ຖອດຖອນບົດຮຽນ ແລະ ໃກ້ຊິດຕິດແທດ ກັບ ມະຫາຊົນຢ່າງແທ້ຈິງ.

ທ່ານ ຮອງນາຍົກລັດຖະມົນຕີ ຍັງໄດ້ຢ້ຳຕື່ມ ການທີ່ຈະສາມາດເລືອກໄດ້ບຸກຄົນ ຄືແນວນັ້ນ, ຕ້ອງຫລີກລ້ຽງແນວຄິດອິດສາບັງບຽດ, ກຸ່ມກ້ອນ, ແນວຄິດພັກພວກ, ເພື່ອນສະໜິດມິດສະຫາຍ ເພື່ອສ້າງເຄືອຂ່າຍ ແລະ ຜົນປະໂຫຍດໃດໜຶ່ງແກ່ຕົນເອງ. ຕ້ອງກ້າສົ່ງເສີມບຸກຄົນທີ່ດີເດັ່ນ ແລະ ມີມາດຖານເງື່ອນໄຂຄົບຖ້ວນ ເຂົ້າໃນຕໍາແໜ່ງນໍາພາ-ຄຸ້ມຄອງ, ການສ້າງແຜນກຳນົດພະນັກງານ ຕ້ອງຮັບປະກັນລັກສະນະເປີດກວ້າງ, ມີຄວາມໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຕ້ອງຮັບປະກັນໂຄງປະກອບເພດ, ເຜົ່າ, ລັກສະນະສົມສ່ວນ ລະຫວ່າງພະນັກງານ ຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ. ໃນນັ້ນ, ພະນັກ ງານຮຸ່ນໜຸ່ມໃຫ້ກວມອັດຕາສ່ວນຫລາຍກວ່າ ເພື່ອຮັບປະກັນລັກສະນະສືບທອດຕໍ່ເນື່ອງ.

ພາບ ເກດສະໜາ

แชร์