ໂຮງຮຽນອະນຸບານບ້ານກົກງິ້ວເປັນໂຮງຮຽນຕົວແບບ

ພິທີປະກາດໂຮງຮຽນອະນຸບານບ້ານກົກງິ້ວນະຄອນຫຼວງພະບາງແຂວງຫຼວງພະບາງເປັນໂຮງຮຽນຕົວແບບດ້ານການຮຽນ-ການສອນລະດັບແຂວງໄດ້ຈັດຂຶ້ນເມື່ອບໍ່ດົນມານີ້ທີ່ໂຮງຮຽນອະນຸ ບານບ້ານກົກງິ້ວ ໂດຍມີທ່ານ ສົມລິດ ຈັນທະມາລີ ຮອງຫົວໜ້າພະແນກສຶກສາທິການ ແລະກີລາແຂວງ, ທ່ານ ບຸນລຽງ ແກ້ວມະນີ ຫົວໜ້າຄະນະກວດກາພັກ-ລັດນະຄອນຫຼວງພະບາງ,ຫົວໜ້າຫ້ອງການສຶກສານະຄອນຫຼວງພະບາງ, ຂະແໜງການກ່ຽວຂ້ອງພ້ອມດ້ວຍຕາງໜ້າຈາກຜູ້ໃຫ້ທຶນຊ່ວຍເຫຼືອແລະພະນັກງານ-ຄູອາຈານຕະຫຼອດຮອດອົງການປົກຄອງ ແລະປະຊາຊົນບ້ານກົກງິ້ວເຂົ້າຮ່ວມ.

ທ່ານ ນາງ ຈັນທີ ສິດທິໂສມ ອໍານວຍການໂຮງຮຽນອະນຸບານ ບ້ານກົກງິ້ວ ໄດ້ລາຍງານໃຫ້ຮູ້ວ່າ: ແຕ່ປີ  2005  ເບື້ອງຕົ້ນແມ່ນຫ້ອງກຽມປະຖົມ 1 ຫ້ອງ, ມີຄູພຽງ 1 ຄົນ, ມີນັກຮຽນໃນເກນອາຍຸ 5 ປີ ຈໍານວນ 25 ຄົນ, ຍິງ 15 ຄົນ., ຊຶ່ງຂຶ້ນກັບໂຮງຮຽນປະຖົມບ້ານກົກງິ້ວແຕ່ປີ 2005. ຈາກນັ້ນໃນປີຕໍ່ມາໄດ້ຮັບທຶນປຸກສ້າງຂອງໂຄງການສົ່ງເສີມເດັກນ້ອຍ 1  ຫຼັງ, 2 ຫ້ອງຮຽນ 1 ຫ້ອງນໍ້າ, ໃນມູນຄ່າ 320 ລ້ານກີບ, ໃນນັ້ນມີທຶນສົມທົບຂອງຊຸມຊົນ 70 ລ້ານກີບ, ໃນປີຕໍ່ມາໄດ້ຮັບການຂະຫຍາຍໂດຍໄດ້ຮັບທຶນຈາກມູນລະນິທິສໍແຫ່ງຄວາມຫວັງເພີ່ມຕື່ມ 1 ຫ້ອງຮຽນ ແລະ1 ຫ້ອງການ, ດ້ວຍທຶນ96,6 ລ້ານກີບ, ໃນນີ້ມີທຶນຂອງຊຸມຊົນ 3 5 ລ້ານກີບ,  ປະຈຸບັນໂຮງຮຽນອະນຸບານບ້ານກົກງິ້ວ ມີທັງໝົດ 3 ຫ້ອງຮຽນ ໂດຍທາງພະແນກສຶກສາທິການ ແລະກີລາແຂວງໄດ້ກໍານົດເອົາໂຮງຮຽນດັ່ງກ່າວນີ້ເປັນເປົ້າໝາຍບຸລິມະສິດໃນການສ້າງໂຮງຮຽນຕົວແບບຂອງແຂວງແຕ່ສົກປີ 2015-2016, ໂດຍການສົ່ງວິຊາການຂະແໜງການສຶກສາແຕ່ລະຂັ້ນເພື່ອຊີ້ນໍາຂະບວນການ ແລະຂັ້ນຕອນໃນການພັດທະນາໃຫ້ບັນລຸມາດຕະຖານໂຮງຮຽນຕົວແບບ.

ສໍາລັບການຈັດຕັ້ງການຮຽນ-ການສອນແຕ່ສົກ 2015-2019 ມີຄູສອນເພດຍິງ 6 ຄົນ, ມີເດັກ ໃນເກນອາຍຸ 3-5 ປີໄດ້ເຂົ້າຮຽນ 100%, ອັດຕານັກຮຽນແມ່ນ 13 ຄົນຕໍ່ຄູ 1 ຄົນ. ປະກອບມີຫ້ອງອະນຸບານ 1 ຮອດ 3  ມີນັກຮຽນເພີ່ມຂຶ້ນໃນແຕ່ລະປີປະຈຸບັນມີນັກຮຽນ ອະນຸບານ 1 ຈໍານວນ 27 ຄົນ, ຍິງ 19 ຄົນ, ອະນຸບານ 2 ຈໍານວນ 22 ຄົນ, ຍິງ 10 ຄົນ ແລະອະນຸ  ບານ 3 ຈໍານວນ 14 ຄົນ, ຍິງ 8 ຄົນ.ຜ່ານການປະເມີນຕີລາຄາຈັດປະເພດການຮຽນ-ການສອນໃນແຕ່ລະປີຂອງພະແນກສຶກສາທິການ ແລະກີລາແຂວງໃນສົກ 2015-2016 ໄດ້ປະເພດດີ 82,8%, 2016-2017 ດີຫຼາຍ 92%,2017-2018  ໄດ້ປະເພດດີຫຼາຍ  85,2% ແລະສົກ 2018-2019 95,3% ເຫັນໄດ້ວ່າມີການພັດທະນາດີຂຶ້ນໃນແຕ່ລະປີ.

ຈາກນັ້ນພິທີດັ່ງກ່າວກໍໄດ້ມີຜ່ານຂໍ້ຕົກລົງຂອງແຂວງວ່າດ້ວຍການເປີດໂຮງຮຽນຕົວແບບດ້ານບໍລິຫານ-ຄຸ້ມຄອງສຶກສາຊັ້ນອະນຸບານລະດັບຂັ້ນແຂວງພ້ອມທັງມອບໃບຢັ້ງຢືນ ໂດຍການມອບຂອງທ່ານ ສົົມລິດ ຈັນທະມາລີ ຮອງຫົວໜ້າພະແນກສຶກສາທິການ ແລະກີລາແຂວງ ແລະຂໍ້ຕົກລົງວ່າດ້ວຍການຍ້ອງຍໍພາກສ່ວນທີ່ໃຫ້ການຊ່ວຍເຫຼືອທຶນກໍ່ສ້າງໂຮງຮຽນ ແລະອຸປະກອນຄັ້ງນີ້ປະກອບມີມູນລະນິທິ ສໍແຫ່ງຄວາມຫວັງ, ໂຄງການສົ່ງເສີມເດັກນ້ອຍ, ໂຮງຮຽນກຽດຕິສັກນາໆຊາດແລະພາກສ່ວນຕ່າງໆ ໂດຍການມອບຂອງທ່ານ ບຸນລຽງ ແກ້ວມະນີ ຫົວໜ້າຄະນະກວດກາພັກ-ລັດ ນະຄອນຫຼວງພະບາງ.ຈາກນັ້ນປະທານພິທີກໍໄດ້ຮ່ວມກັນເປີດປ້າຍໂຮງຮຽນອະນຸບານບ້ານກົກງິ້ວເປັນໂຮງຮຽນຕົວແບບຢ່າງເປັນທາງການ. ນອກນັ້ນຍັງມີການສະແດງສິລະປະວັນນະຄະ ດີຈາກນ້ອງນ້ອຍນັກຮຽນຂອງໂຮງຮຽນດັ່ງກ່າວຕື່ມອີກ.

ນສພ ເສດຖະກິດ-ສັງຄົມ

แชร์