ລັດຖະບານອິນເດຍ ມອບຂອງຂວັນ ຫໍພັກ ສລດ ໃຫ້ ສປປ ລາວ ຢ່າງເປັນທາງການ

 

     ພິທີມອບ-ຮັບ ຫໍພັກ ສູນພັດທະນາຜູ້ປະກອບກິດຈະການ ລາວ-ອິນເດຍ ຫຼື ສລດ ຈັດຂຶ້ນໃນວັນທີ 23 ມິຖຸນາ 2022 ທີ່ສູນດັ່ງກ່າວ, ໂດຍເປັນກຽດເຂົ້າຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ດຣ ຣາຊ໌ກູມ່າ ລານຈັນ ຊິ່ງ ລັດຖະມົນຕີ ກະຊວງການຕ່າງປະເທດແຫ່ງສາທາລະນະລັດອິນເດຍ, ທ່ານ ດິນກ່າ ອາດທານ່າ (Dinkar Asthana) ເອກອັກຄະລັດຖະທູດ ອິນເດຍ ຜູ້ມີອຳນາດເຕັມ ປະຈຳ ສປປ ລາວ ແລະ ທ່ານ ສຸທໍາ ສາກົນນິຍົມ ປະທານສະມາຄົມມິດຕະພາບ ລາວ-ອິນເດຍ ພ້ອມດ້ວຍຄະນະກົມຈັດຕັ້ງ-ພະນັກງານ, ກົມອາຊີວະສຶກສາ, ກົມຮ່ວມມືຕ່າງປະເທດ, ກົມການເງິນ, ສະຖາບັນພັດທະນາບໍລິຫານການສຶກສາ, ສູນການສຶກສານອກໂຮງຮຽນ, ຄະນະອຳນວຍການ ສລດ ແລະ ພະນັກງານທີ່ກ່ຽວຂ້ອງ.

  ໃນພິທີ, ທ່ານ ນາງ ສຸດສາຍໃຈ ດວງສະຫວັນ ຜູ້ອຳນວຍການ ສລດ ກ່າວວ່າ: ມື້ນີ້ ໄດ້ຈັດພິທີເປີດປ້າຍສີລາລືກຂອງຕຶກອາຄານຫໍພັກ ສລດ ພ້ອມທັງບາສີສູ່ຂວັນຕາມຮີດຄອງປະເພນີອັນດີງາມຂອງຊາດລາວ ເພື່ອເປັນສີຣິມຸງຄຸນ ທີ່ທາງລັດຖະບານອິນເດຍ ໄດ້ມອບເປັນຂອງຂວັນສຸດທີ່ພິເສດ ເພື່ອເປັນການສະແດງເຖິງການຮ່ວມມືຂອງລັດຖະບານ ສປປ ລາວ ກໍຄື ສສກ ແລະ ລັດຖະບານ ສາທາລະນະລັດອິນເດຍ ໂດຍຜ່ານສະຖານເອກອັກຄະລັດຖະທູດອິນເດຍ ປະຈໍາ ສປປ ລາວ. ອີກຢ່າງໜຶ່ງ ພິທີນີ້ສະແດງເຖິງຄວາມຮູ້ບຸນຄຸນ, ການພົວພັນ, ການຮ່ວມມື ແລະ ການສະໜັບສະໜູນທາງດ້ານວິຊາການ ເປັນຕົ້ນແມ່ນການຝຶກອົບຮົມໃຫ້ແກ່ບຸກຄະລາກອນພາຍໃນສູນ ໄລຍະສັ້ນ-ໄລຍະຍາວ, ສະໜອງງົບປະມານໃນການກໍ່ສ້າງອາຄານຫໍພັກ, ສະໜອງຄອມພິວເຕີ ແລະ ອື່ນໆ. ພິເສດຂໍສະແດງເຖິງຄວາມຮູ້ບຸນຄຸນຕໍ່ການຊີ້ນໍານໍາພາຂອງທ່ານລັດຖະມົນຕີ ສສກ, ກົມອາຊີວະສຶກສາ ແລະ ບັນດາການນໍາຂອງກົມ, ສູນ, ສະຖາບັນອ້ອມຂ້າງ.

  ໂອກາດດຽວກັນ, ທ່ານ ຮສ.ປອ ພຸດ ສິມມາລາວົງ ກ່າວວ່າ: ໄລຍະຜ່ານມາ ລັດຖະບານສາທາລະນະລັດ ອິນເດຍ ໄດ້ໃຫ້ການຊ່ວຍເຫຼືອລັດຖະບານ ສປປ ລາວ ໃນການຕັ້ງ ສລດ ຊຶ່ງໄດ້ສ້າງຕັ້ງຂຶ້ນໃນວັນທີ 27 ພະຈິກ 2004 ພາຍໃຕ້ການສະໜັບສະໜູນຂອງການລິເລີ່ມເຂົ້າໃນການເຊື່ອມໂຍງອາຊຽນ (The Initiative for ASEAN Integration (IAI)) ແລະ ໄດ້ຊ່ວຍເຫຼືອທາງດ້ານງົບປະມານໃນການບໍລິຫານສູນ (ໃນເວລາເປີດສູນໃໝ່) ພ້ອມທັງວັດຖຸອຸປະກອນຕ່າງໆ ເຊັ່ນ: ຄອມພິວເຕີ, ໂຕະ, ຕັ່ງ, ຕູ້ ແລະ ອື່ນໆ ເພື່ອປະກອບເຂົ້າໃນສູນດັ່ງກ່າວ. ນອກຈາກນັ້ນ, ຍັງໄດ້ສະໜອງທີ່ປຶກສາ, ພັດທະນາຫຼັກສູດຝຶກອົບຮົມກ່ຽວກັບ ການປະກອບກິດຈະການ ແລະ ທຶນຍົກລະດັບໃຫ້ບຸກຄະລາກອນ ພາຍໃນ ແລະ ພາຍນອກ ທັງໄລຍະສັ້ນ ແລະ ໄລຍະຍາວ ທີ່ສະຖານບັນພັດທະນາຜູ້ປະກອບກິດຈະການ ປະເທດອິນເດຍ  (Entrepreneurship Development Institute of India (EDII)).

  ປັດຈຸບັນ ສະຖານເອກອັກຄະລັດຖະທູດອິນເດຍ ປະຈໍາ ສປປ ລາວ ຍັງສືບຕໍ່ໃຫ້ການຊ່ວຍເຫຼືອທາງດ້ານວິຊາການ ແລະ ສະໜັບສະໜູນວຽກງານການຮ່ວມມື ລະຫວ່າງ ສູນພັດທະນາຜູ້ປະກອບກິດຈະການ ລາວ-ອິນເດຍ ກັບ ສະມາຄົມມິດຕະພາບ ລາວ-ອິນເດຍ ໃນການຈັດຕັ້ງກິດຈະກຳຕ່າງໆ ເຊັ່ນ: ການປູກຕົ້ນໄມ້ ເພື່ອມິດຕະພາບ, ຈັດຕັ້ງການສອນໂຢຄະ, ຝຶກອົບຮົມຄອມພິວເຕີ (MS Office 365) ເພື່ອນໍາໃຊ້ເຂົ້າໃນການຮຽນການສອນ ຮູບແບບທາງໄກ ແລະ ຝຶກອົບຮົມກ່ຽວກັບການປະກອບກິດຈະການໃຫ້ແກ່ພະນັກງານພາຍໃນສູນ ແລະ ພາຍນອກ. ນອກຈາກນັ້ນ, ລັດຖະບານສາທາລະນະລັດອິນເດຍ ຍັງໄດ້ຊ່ວຍເຫຼືອໃນການກໍ່ສ້າງອາຄານຫໍພັກໃຫ້ ສລດ ພາຍໃຕ້ໂຄງການເຫັນຜົນໄວຂອງຂອບການຮ່ວມມືແມ່ນ້ຳຂອງ-ແມ່ນ້ຳຄົງຄາ ປີ 2020 ຂອງລັດຖະບານປະເທດອິນເດຍ ສະບັບເລກທີ Vient/220/2020, ລົງວັນທີ 23 ຕຸລາ 2020.

  ສໍາລັບຫໍພັກດັ່ງກ່າວ ມີມູນຄ່າທັງໝົດ 50.000 ໂດລາສະຫະລັດ ເປັນຕົວອາຄານຫໍພັກອອກແບບເປັນຮູບໂຕເອວ (ອັກສອນພາສາອັງກິດ), ເປັນອາຄານຊັ້ນດຽວ, ຈໍານວນ 5 ຫ້ອງ (ລວມມີ ຫ້ອງໂຖ່ງ/ຫ້ອງນອນ, ຫ້ອງປຸງແຕ່ງອາຫານ ແລະ ຫ້ອງນໍ້າ ຢູ່ໃນແຕ່ລະຫ້ອງ) ເພື່ອອໍານວຍຄວາມສະດວກໃຫ້ແກ່ຊ່ຽວຊານຈາກປະເທດອິນເດຍ ທີ່ຈະມາປະຈໍາຢູ່ສູນ ແລະ ບັນດາແຂກທີ່ມາຮ່ວມກອງປະຊຸມຝຶກອົບຮົມທີ່ສູນໄດ້ຈັດຕັ້ງຂຶ້ນເປັນປະຈໍາ.

ໂດຍ ສົງການ ພັນແພງດີ

แชร์