ມອບ-ຮັບ ແລະເປີດນຳໃຊ້ເຂດອະນຸສອນ ປະທານ ໂຮ່ຈິມິນ

ພິທີມອບ-ຮັບ ແລະເປີດນຳໃຊ້ໂຄງການສ້ອມແປງຍົກລະດັບ ເຂດອະນຸສອນ ປະທານ ໂຮ່ຈິມິນ ໄດ້ຈັດຂຶ້ນໃນວັນທີ 25 ມິຖຸນາ 2022 ຢູ່ບ້ານຊຽງຫວາງ ເມືອງໜອງບົກ ແຂວງຄໍາມ່ວນ ໃຫ້ກຽດເຂົ້າຮ່ວມຝ່າຍລາວນໍາໂດຍ ທ່ານ ວັນໄຊ ພອງສະຫວັນ ກຳມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງຄຳມ່ວນ, ມີທ່ານ ເພັດຖາວອນ ພິລະວັນ ຄະນະປະຈຳພັກ ຮອງຫົວໜ້າຫ້ອງວ່າການສູນກາງພັກ ປປ ລາວ, ຝ່າຍຫວຽດນາມນຳໂດຍ ທ່ານ ປອ. ຫວູແມ໋ງຮ່າ ອຳນວຍການຫໍພິພິທະພັນ ໂຮ່ຈິມິນ ສສ ຫວຽດນາມ, ມີຕາງໜ້າສະຖານທູດ ສສ ຫວຽດນາມປະຈຳລາວ, ເຈົ້າເມືອງໜອງບົກ ແລະພາກສ່ວນກ່ຽວຂ້ອງເຂົ້າຮ່ວມ.

ໃນພິທີທີ່ມີຄວາມໝາຍຄວາມສຳຄັນ ທ່ານ ພັນເອກ ຫງຽນຫວຽດອ່ຽນ ຮອງອຳນວຍການໃຫຍ່ບໍລິສັດ ໂກເອໂກ ແລະ ທ່ານ ປອ. ຫວູແມ໋ງຮ່າ ໄດ້ຂຶ້ນລາຍງານຫຍໍ້ ແລະ ກ່າວມີຄຳເຫັນກ່ຽວກັບສະພາບການຈັດຕັ້ງປະຕິບັດໂຄງການສ້ອມແປງ ຍົກລະດັບເຂດອະນຸສອນສະຖານ ປະທານ ໂຮ່ຈິມິນ ທີ່ບ້ານຊຽງຫວາງໃນມູນຄ່າທັງໝົດ 13 ຕື້ກວ່າດົງ (ສະກຸນເງິນຫວຽດນາມ) ໂດຍແມ່ນບໍລິສັດຮ່ວມມືເສດຖະກິດໂກເອໂກ ແລະບໍລິສັດຫຸ້ນສ່ວນອອກແບບຜັງເມືອງຫວຽດນາມເປັນຜູ້ຮັບເໜົາກໍ່ສ້າງ, ພາຍຫຼັງ 4 ເດືອນກວ່າໃນການຈັດຕັ້ງການກໍ່ສ້າງ: ປັບປຸງສະພາບຊໍາລຸດຊຸດໂຊມ ແລະເພີ່ມເຕີມບາງເນື້ອໃນທີ່ຍັງບໍ່ທັນຄົບຖ້ວນ ມາຮອດວັນທີ 25 ມິຖຸນາ ກໍໄດ້ສຳເລັດ.

ທ່ານ ໄຊຍະລາດ ພົງຍາລັກ ຫົວໜ້າກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ ແລະທ່ານ ໄພມະນີ ພົມມະສານ ຮອງຫົວໜ້າຫ້ອງວ່າການແຂວງຄຳມ່ວນ ໄດ້ຜັດປ່ຽນກັນຂຶ້ນກ່າວຮັບ ແລະກ່າວສະແດງຄວາມຂອບໃຈຮູ້ບຸນຄຸນຢ່າງສູງຕໍ່ພັກ-ລັດຖະບານ ລາວ-ຫວຽດນາມ ອັນໄດ້ເຮັດໃຫ້ສະຖານທີ່ແຫ່ງນີ້ມີໂສມໜ້າໃໝ່ໂດດເດັ່ນສົມກັບເປັນສະຖານທີ່ທ່ອງທ່ຽວທາງປະຫວັດສາດອັນສຳຄັນຂອງແຂວງຄຳມ່ວນ. ໂຄງການຍົກລະດັບເຂດອະນຸສອນສະຖານແຫ່ງນີ້ແມ່ນການຊ່ວຍເຫຼືອ ແລະເປັນຂອງຂວັນຈາກພັກ-ລັດຖະບານ ແລະປະຊາຊົນຊາວຫວຽດນາມ, ທັງນີ້ກໍແມ່ນໄດ້ສະແດງເຖິງຄວາມເອົາໃຈໃສ່, ຄວາມຫວ່ງໃຍຂອງສອງພັກ-ສອງລັດ, ເປັນການເສີມຂະຫຍາຍເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານທີ່ປະທານ ໄກສອນ ພົມວິຫານ ແລະປະທານ ໂຮ່ຈິມິນ ຜູ້ນຳທີ່ແສນເຄົາລົບຮັກພວກເຮົາໄດ້ສ້າງໄວ້. ການເປີດນຳໃຊ້ເຂດອະນຸສອນດັ່ງກ່າວຈະເປັນໂອກາດ ແລະ ເງື່ອນໄຂທີ່ດີໃຫ້ປະຊາຊົນລາວບັນດາເຜົ່າ, ຊາວຫວຽດນາມຕ່າງດ້າວ ແລະຊາວຕ່າງປະເທດທີ່ເຂົ້າມາຢ້ຽມຢາມ, ສັກກາລະບູຊາ, ສຶກສາຄົ້ນຄວ້າຮໍ່າຮຽນກ່ຽວກັບຊີວິດ ແລະການເຄື່ອນໄຫວປະຕິວັດຂອງປະທານ ໂຮ່ຈິມິນ ກໍຄືສາຍພົວພັນຄວາມສາມັກຄີພິເສດຂອງສອງຊາດລາວ-ຫວຽດນາມ ແລະເພື່ອເປັນການຊົມເຊີຍ ແລະຕ້ອນຮັບການສະເຫຼີມສະຫຼອງປີແຫ່ງຄວາມສາມັກຄີມິດຕະພາບແບບພິເສດ ແລະການຮ່ວມມືຮອບດ້ານຂອງສອງຊາດລາວ-ຫວຽດນາມ, ຫວຽດນາມ-ລາວ ຄື: ວັນສ້າງຕັ້ງສາຍພົວພັນການທູດຄົບຮອບ 60 ປີ, ວັນເຊັນສົນທິສັນຍາມິດຕະພາບຄົບຮອບ 45 ປີ ໃຫ້ມີບັນຍາກາດຟົດຟື້ນເຕັມໄປດ້ວຍເນື້ອໃນຄວາມໝາຍສຳຄັນເລິກຊຶ່ງ.

ໃນພິທີຕາງໜ້າຜູ້ແທນທັງສອງຝ່າຍ ແລະ ຕາງໜ້າບໍລິສັດຮັບເໝົາກໍ່ສ້າງຍັງໄດ້ພ້ອມກັນລົງນາມເຊັນບົດບັນທຶກມອບ-ຮັບ ແລະເປີດນໍາໃຊ້ຢ່າງເປັນທາງການ ແລະ ມອບໃຫ້ແຂວງຄໍາມ່ວນເປັນຜູ້ຄຸ້ມຄອງເບິ່ງແຍງ ແລະປົກປັກຮັກສາ, ໂອກາດນີ້ທ່ານເຈົ້າແຂວງຄຳມ່ວນ ແລະຄະນະຜູ້ແທນທີ່ເຂົ້າຮ່ວມຍັງໄດ້ຢ້ຽມຊົມພິພິທະພັນພ້ອມທັງຮ່ວມປູກຕົ້ນໄມ້ຢູ່ເດີ່ນສວນເຂດອະນຸສອນສະຖານແຫ່ງນີ້ເພື່ອເປັນທີ່ລະນຶກອີກດ້ວຍ.

(ຂ່າວ: ມະນີວັນ)

แชร์