ເຈົ້າແຂວງຈຳປາສັກ ຕ້ອນຮັບຮອງລັດຖະມົນຕີກະຊວງການຕ່າງປະເທດ ອິນເດຍ

ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ຣາຈກູມາ ຣານຈັ່ນ ຊຶ່ງ (Rajkumar Ranjan Singh) ຮອງລັດຖະມົນຕີ ກະຊວງການຕ່າງປະເທດ ແຫ່ງສາທາລະນະລັດ ອິນເດຍ ພ້ອມດ້ວຍຄະນະ ໃນຕອນບ່າຍ ວັນທີ 26 ມິຖຸນາ ທີ່ຜ່ານມາ ໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວວຽກ ຢູ່ແຂວງຈໍາປາສັກ ຂອງ ສປປ ລາວ.

 ໂອກາດນີ້, ທ່ານ ວິໄລວົງ ບຸດດາຄຳ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ຣາຈກູມາ ຣານຈັ່ນ ຊຶ່ງ ໄດ້ເດີນ ທາງມາຢ້ຽມຢາມ ແລະ ເຄື່ອນໄຫວວຽກ ຢູ່ ສປປ ລາວ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ສປປ ລາວ ແລະ ສ ອິນເດຍ. ພ້ອມນີ້, ທ່ານເຈົ້າແຂວງຈຳປາສັກ ຍັງໄດ້ຍົກໃຫ້ຮູ້ສະພາບໂດຍລວມ ການພັດທະນາເສດຖະກິດ-ສັງຄົມ ຂອງແຂວງ ແລະ ໄດ້ສະແດງຄວາມຂອບໃຈ ມາຍັງລັດຖະບານອິນເດຍ ທີ່ໄດ້ໃຫ້ການສະໜັບສະໜູນ ແຂວງຈຳປາສັກ ໂດຍສະເພາະການຮ່ວມມື ແລະ ຊ່ວຍເຫຼືອ ໃນການພັດທະນາທາງດ້ານກະສິກຳ, ດ້ານວັດທະນະທຳ ແລະ ການທ່ອງທ່ຽວ ພ້ອມທັງສະເໜີ ໃຫ້ ລັດຖະບານອິນເດຍ ສືບຕໍ່ໃຫ້ການສະໜັບສະໜູນຊ່ວຍເຫຼືອ ແກ່ ສປປ ລາວ ກໍຄື ແຂວງຈຳປາສັກ ເພື່ອປະກອບສ່ວນເຂົ້າໃນພັດທະນາ ນຳອີກ.

 ພ້ອມກັນນີ້, ທ່ານ ຣາຈກູມາ ຣານຈັ່ນ ຊຶ່ງກໍໄດ້ແຈ້ງຈຸດປະສົງຂອງການເດີນ ທາງມາຢ້ຽມຢາມ ແຂວງຈຳປາສັກ ໃນຄັ້ງນີ້ ໂດຍໄດ້ເຄື່ອນໄຫວຢ້ຽມຢາມບັນດາໂຄງ ການ ທີ່ລັດຖະບານອິນເດຍ ໃຫ້ການຊ່ວຍເຫຼືອ ແລະ ຈັດຕັ້ງປະຕິບັດ ເປັນຕົ້ນໂຄງ ການປົກປັກຮັກສາ ແລະ ປະຕິສັງຂອນວັດພູຈໍາປາສັກ ໄລຍະ 2, ໂຄງການຊ່ວຍ ເຫຼືອ ປູກໝາກແໜ່ງຂຽວ ແລະ ອື່ນໆ. ພ້ອມນີ້, ທ່ານຮອງລັດຖະມົນຕີກະຊວງການຕ່າງປະເທດ ອິນເດຍ ຍັງໄດ້ຕີລາຄາສູງຕໍ່ການຮ່ວມມື ສອງຝ່າຍ ໃນໄລຍະຜ່ານມາ ແລະ ຢືນຢັນວ່າ ລັດຖະບານອິນເດຍ ຈະສືບຕໍ່ໃຫ້ການສະໜັບສະໜູນຊ່ວຍເຫລືອ ແກ່ ສປປ ລາວ ກໍຄື ແຂວງຈຳປາສັກ ຕື່ມອີກ.

ຂ່າວ: ທັດຊະນະ

แชร์