ໂຮງຮຽນສະຖາພອນ ສະຫລຸບຜົນການຮຽນ-ການສອບ ສົກຮຽນ 2021-2022

ໂຮງຮຽນອານຸບານ-ປະຖົມ-ມັດທະຍົມຕົ້ນ ສະຖາພອນ ຈັດພິທີສະຫລຸບປີຮຽນປະຈຳສົກຮຽນ 2021-2022 ໃນວັນທີ 24 ມິຖຸນາ 2022 ເພື່ອສະຫລຸບຕີລາຄາຜົນການຈັດຕັ້ງປະຕິບັດການຮຽນ-ການສອນ ໃນສົກປີຜ່ານມາ, ພ້ອມທັງເປັນການມອບໃບ ຍ້ອງຍໍຜົນງານໃຫ້ແກ່ພະນັກງານຄູ-ອາຈານ ແລະ ນັກຮຽນເກັ່ງ, ນັກຮຽນດີເດັ່ນຮອບດ້ານ, ມອບ-ຮັບໃບຢັ້ງຢືນຈົບຊັ້ນອະນຸບານ ແລະ ມອບ-ຮັບໃບປະກາດຈົບຊັ້ນປະຖົມປີທີ 5.

ໂອກາດນີ້, ທ່ານ ນາງ ສຸກສະຖາພອນ ສູນທະວົງ ປະທານໂຮງຮຽນສະຖາພອນ ໄດ້ໃຫ້ຮູ້ວ່າ: ໂຮງຮຽນອານຸບານ-ປະຖົມ-ມັດທະຍົມ ສະຖາພອນ ເປັນໂຮງຮຽນພາກເອກະຊົນ ດຳເນີນການຮຽນ-ການສອນ ຕາມໂຄງການຫລັກສູດຂອງກະຊວງສຶກສາທິການ ແລະກິລາ ວາງອອກໂດຍວຽກງານການສຶກສາໄດ້ມີການຂະຫຍາຍຕົວດ້ານປະລິມານ ແລະ ຄຸນນະພາບ, ການສຶກສາໄດ້ຮັບການພັດທະນາຕາມ 3 ລັກສະນະ 5 ຫລັກມູນຂອງການສຶກສາ ແລະ 3 ຂໍ້ແຂ່ງຂັນຂອງກະຊວງສຶກສາ, ພັດທະນາຄູ-ອາຈານ, ພະນັກງານ ແລະ ນ້ອງນັກຮຽນໃຫ້ມີທັດສະນະ ຄຸນສົມບັດສິນທຳປະຕິວັດ, ຮັກຄວາມກ້າວໜ້າ ແລະ ພັດທະນາທາງດ້ານສະຕິປັນຍາຮອບດ້ານ ໄປຄຽງຄູ່ກັບການຮຽນ-ການສອນ ທາງດ້ານທິດສະດີ, ຍັງໄດ້ຈັດກິດຈະກຳ ເຄື່ອນໄຫວລົງພາກປະຕິບັດຈິງຕາມເງື່ອນໄຂນັບແຕ່ ອະນຸບານ ເຖິງຊັ້ນມັດທະຍົມ ເຊັ່ນ: ລົງພາກປະຕິບັດຕົວຈິງກ່ຽວກັບຮຽນ, ກິດຈະກຳເຄື່ອນໄຫວສິລະປະ-ກິ ລາ, ອະນາໄມ, ອອກແຮງງານປູກຕົ້ນໄມ້, ປູກດອກໄມ້ປະດັບ, ປູກຜັກຊະນິດຕ່າງໆ ເພື່ອໃຫ້ນັກຮຽນໄດ້ສຶກສາຫາຄວາມຮູ້ ແລະປະດັບເອ້ ໃຫ້ສວຍງາມ.

ໂຮງຮຽນອານຸບານ-ປະຖົມ-ມັດທະຍົມ ສະຖາພອນ ມີອາຄານຮຽນ 4 ຫລັງ, ຊັ້ນອານຸບານມີ 34 ຫ້ອງ, ຊັ້ນປະຖົມ 15 ຫ້ອງ, ຊັ້ນມັດທະຍົມ 11 ຫ້ອງ, ມີຄູສອນ 52 ຄົນ ຍິງ 39 ຄົນ, ມີນັກຮຽນ 998 ນ້ອງ ຍິງ 499 ນ້ອງ, ໃນສົກປີ 2021-2022 ສົ່ງນັກຮຽນເຂົ້າແຂ່ງຂັນນັກຮຽນເກັ່ງຂັ້ນເມືອງ ຊັ້ນ ປ5 ຈໍານວນ 10 ຄົນ, ຊັ້ນ ມ4 ຈຳ ນວນ 8 ຄົນ ເຊິ່ງຜົນການສອບເສັງເລື່ອນຂັ້ນ ແລະ ຈົບຊັ້ນອະນຸບານ 1 ມີ 46 ຄົນ, ອານຸບານ 2 ມີ 60 ຄົນ, ອານຸບານ 3 ມີ 90 ຄົນ, ປ1 ມີ 90 ຄົນ, ປ2 ມີ 107 ຄົນ, ປ3 ມີ 94 ຄົນ, ປ4 ມີ 84 ຄົນ, ປ5 ມີ 96 ຄົນ, ມ1 ມີ 72 ຄົນ, ມ2 ມີ 62 ຄົນ, ມ3 ມີ 71 ແລະ ມ4 ມີ 46 ຄົນ.

แชร์