ພູເບ້ຍມາຍນິງ ສ້າງໄວ້ໜຸ່ມລາວກ້າວສູ້ລະດັບມືອາຊີບ

ໂຄງການຝຶກຊ່າງສີມືແຮງງານຂອງບໍລິສັດ ພູເບ້ຍ ມາຍນິງ ເປັນການຮ່ວມມືກັບວິທະຍາໄລເຕັກນິກລາວເຢຍລະມັນເປົ້າໝາຍເພື່ອຊ່ວຍກໍ່ສ້າງ ແລະຝຶກອົບຮົມໃຫ້ຊາວໜຸ່ມລາວໃຫ້ມີວິຊາອາຊີບສະເພາະໃນຂະແໜງການຕ່າງໆ, ໂດຍສະເພາະແມ່ນຊາວໜຸ່ມທີ່ດ້ອຍໂອກາດ,ຊາວໜຸ່ມໃນຂົງເຂດທີ່ມີຜົນກະທົບຈາກສະພາບແວດລ້ອມ ໄດ້ມີໂອກາດຮຽນຮູ້ປະກອບອາຊີບພັດທະນາຕົນເອງໃຫ້ມີຄຸນນະພາບກ້າວສູ້ລະດັບມືອາຊີບ.

ທ່ານ ຄຳສະໄຫວ ຍອມມິລາວົງ ອຳນວຍການວິທະຍາໄລເຕັກນິກລາວເຢຍລະມັນໃຫ້ສຳພາດສືມ່ວນຊົນຮູ້ວ່າ: ກ່ຽວກັບວຽກງານອາຊີວະສຶກສາ, ລະບົບອາຊີວະສຶກສາ ແລະການຈັດຕັ້ງການຮຽນ-ການສອນ ອາຊີວະສຶກສາຂອງ ສປປ ລາວ ຮູບແບບໂດຍອີງໃສ່ກົດໝາຍອາຊີວະສຶກສາ (ສະບັບປັບປຸງ) ເລກທີ 63/ສພຊ, ລົງວັນທີ 12 ມິຖຸນາ 2019 ອາຊີວະສຶກສາແມ່ນການສຶກສາເຕັກນິກວິຊາຊີບ ແລະການຝຶກອົບຮົມວິຊາຊີບ, ພັດທະນາຜູ້ຮຽນໃຫ້ມີຄວາມຮູ້ຄວາມສາມາດ, ຄວາມສຳນານງານ, ວິໄນແຮງງານ, ມີອາຊີບ ແລະມີວຽກເຮັດງານທຳ, ລະບົບອາຊີວະສຶກສາປະກອບດ້ວຍ, ອາຊີວະສຶກສາໃນໂຮງຮຽນ, ອາຊີວະສຶກສານອກໂຮງຮຽນ, ຮູບແບບການຮຽນອາຊີວະສຶກສາປະກອບດ້ວຍ 3 ຮູບແບບຄື:1.) ຮູບແບບດັ່ງເດີມ: ຊຶ່ງແມ່ນການຈັດຕັ້ງການຮຽນ-ການສອນພາກທິດສະດີ ແລະພາກປະຕິບັດໃນສະຖານອາຊີວະສຶກສາເປັນຫຼັກ ແລະຝຶກງານໃນຫົວໜ່ວຍແຮງງານ. 2.) ຮູບແບບສະມັດຕະພາບ(CBT): ຊຶ່ງແມ່ນການຈັດຕັ້ງການຮຽນ-ການສອນທີ່ເອົາຜົນການຮຽນເປັນຫຼັກ ແລະ ທົດສອບຕາມມາດຕະຖານອາຊີບ.3.) ຮູບແບບຄວບຄູ່ (DCT): ຊຶ່ງແມ່ນການຈັດຕັ້ງການຮຽນ-ການສອນພາກທິດສະດີ ແລະພາກປະຕິບັດຂັ້ນພື້ນຖານໃນໂຮງຮຽນ ແລະຝຶກແອບພາກປະຕິບັດຕົວຈິງໃນຫົວໜ່ວຍແຮງງານເປັນຕົ້ນຕໍ.
ໂຄງການຝຶກຊ່າງສີມືແຮງງານຂອງບໍລິສັດ ພູເບ້ຍ ມາຍນິ້ງ ຮ່ວມກັບວິທະຍາໄລເຕັກນິກລາວ-ເຢຍລະມັນ ຈັດຕັ້ງຂຶ້ນຢູ່ວິທະຍາໄລເຕັກນິກລາວ-ເຢຍລະມັນຂອງພວກເຮົານີ້ຕັ້ງແຕ່ປີ 2012 ເປັນຕົ້ນມາຊຶ່ງມີຈຸດປະສົງໃນການກໍ່ສ້າງ ແລະພັດທະນາສີມືແຮງງານລາວໃຫ້ມີຄຸນນະພາບເລີ່ມແຕ່ເປີດໂຄງການຝຶກອົບຮົມນີ້ເປັນຕົ້ນມາແມ່ນໄດ້ປະກອບສ່ວນຕໍ່ຈຸດປະສົງຂອງການຝຶກອົບຮົມອາຊີວະສຶກສາໃນ ສປປ ລາວ ແທ້ເພາະໄດ້ຈັດຕັ້ງການຮຽນ-ການສອນ ໃນຮູບແບບ DCT ຢ່າງເຕັມສ່ວນຄື: ຮຽນທິດສະດີ ແລະຮຽນປະຕິບັດຢູ່ວິທະຍາໄລເຕັກນິກລາວ-ເຢຍລະມັນ 6 ອາທິດ ແລະ ໄປຮຽນພາກປະຕິບັດຢູ່ສະໜາມຕົວຈິງຂອງບໍລິສັດພູເບັ້ຍມາຍນິ້ງອີກ 2 ອາທິດ, ຕາຕະລາງນີ້ຈະດຳເນີນໝູນວຽນໄປຕາມໄລຍະເວລາຂອງ ໂຄງການທີ່ກໍານົດໄວ້ຈົນຈົບຫຼັກສູດການຮຽນ ຊຶ່ງມັນໄດ້ເຮັດໃຫ້ຜູ້ຮຽນໃດ້ຮຽນຮູ້ກັບຕົວຈິງທາງດ້ານວິຊາສະເພາະໃນຂະແໜງການຕ່າງໆ, ຮຽນຮູ້ທັນກັບການປ່ຽນແປງດ້ານເຕັກໂນໂລຊີຂອງເຄື່ອງຈັກ, ຮຽນຮູ້ດ້ານລະບຽບການ, ວິໄນແຮງງານອຸດສາຫະກຳເຮັດໃຫ້ແຮງງານທີ່ກໍ່ສ້າງອອກໄປມີຄຸນນະພາບ, ສອດຄ່ອງກັບຄວາມຕ້ອງການຂອງຕະຫຼາດແຮງງານ, ເປັນທີ່ຍອມຮັບຂອງສັງຄົມເວລາໄປຊອກຫາວຽກເຮັດງານທຳຕາມສະຖານປະກອບການທີ່ນໍາໃຊ້ແຮງງານທີ່ກ່ຽວຂ້ອງໃນອານາຄົດກໍງ່າຍຂຶ້ນ.

ນັກສຶກສາທີ່ຈົບໄລຍະຜ່ານມາເປັນແຮງງານທີ່ສ້າງອອກໄປມີຄຸນນະພາບສູງເປັນທີ່ຮັບຮູ້ຂອງສັງຄົມທາງພາຍໃນ ແລະສາກົນ, ໄດ້ຮັບໃບປະກາດສະນິຍະບັດຈາກວິທະຍາໄລເຕັກນິກລາວ-ເຢຍລະມັນ ແລະ ໃບຢັ້ງຢືນຊ່າງສີມືລະດັບ3 ຂອງປະເທດໂອສະຕາລີ. ນັກຮຽນ ຫຼືແຮງງານທີ່ສ້າງອອກໄປແມ່ນໄດ້ມີວຽກເຮັດງານທຳໂດຍສະເພາະແມ່ນເຮັດກັບບໍລິສັດພູເບັ້ຍເລີຍນັກຮຽນນັກສຶກສາໄດ້ຮັບທຶນການສຶກສາຈາກບໍລິສັດພູເບັ້ຍ ມາຍນິ້ງເປັນການລຸດຜ່ອນງົບປະມານຂອງລັດ ຖະບານໃນການກໍ່ສ້າງກຳລັງແຮງງານໄດ້ຮັບການແລກປ່ຽນບົດຮຽນປະສົບການ,ສະໜອງການຝຶກອົບຮົມດ້ານເຕັກນິກວິຊາສະເພາະໃຫ້ແກ່ຄູອາຈານ ແລະ ນັກສຶກສາພາຍໃນວິທະຍາໄລ.

ປັບປຸງຫຼັກສູດຮ່ວມກັນກັບຄູພາຍໃນວິທະຍາໄລສະໜອງເຄື່ອງຈັກ, ເຄື່ອງມື, ອຸປະກອນຈຳນວນນຶ່ງໃຫ້ວິທະຍາໄລເພື່ອເປັນສື່ການຮຽນ-ການສອນນັກຮຽນມີຄວາມເອົາໃຈໃສ່(ມີຄວາມກະຕືລືລົ້ນຕໍ່ການຮຽນ), ມີຫົວຄິດປະດິດສ້າງນະວະຕະກໍາຕ່າງໆທີ່ດ້ານວິຊາສະພາະທີ່ຕົນຮຽນມານັກຮຽນມີຄວາມມັກຮັກຕໍ່ວິຊາອາຊີບທີ່ຕົນຮຽນນັກຮຽນມີວິໄນອຸດສາຫະກໍາດີຂື້ນພວກເຮົາມີຄວາມຕ້ອງການຂະຫຍາຍຄູ່ຮ່ວມງານໃຫ້ຫຼາຍຂື້ນຢາກໃຫ້ມີຫຼາຍໆໂຄງການເຂົ້າມາມີສ່ວນຮ່ວມໃນການກໍ່ສ້າງກຳລັງແຮງງານໃນຮູບແບບການຮຽນ-ການສອນ ແບບຄວບຄູ່ໂດຍສະເພາະແມ່ນບັນດາສະຖານປະກອບການ ແລະຫົວໜ່ວຍຜູ້ໃຊ້ແຮງງານເພື່ອເຮັດໃຫ້ແຮງງານທີ່ສ້າງອອກໄປມີຄຸນນະພາບ ແລະສອດຄ່ອງກັບຄວາມຕ້ອງການຂອງຕົນ.

ປະຈຸບັນທາງວິທະຍາໄລພວກເຮົາກໍາລັງຈະດຳເນີນແຜນການກໍ່ສ້າງ ແລະຝຶກອົບຮົມກຳລັງແຮງງານຮ່ວມກັບວິທະຍາໄລ ອາຊີວະສຶກສາຢູ່ ສປ ຈີນ ດ້ານຂະແໜງການອາຊີວະສຶກສາຄື: ພວກເຮົາກັບວິທະຍາໄລອາຊີວະສຶກສາເມືອງຊົງຊິງຈະຕັ້ງສູນ Panda workshop ຢູ່ທີ່ນີ້ຊຶ່ງເປັນສູນຝຶກອົບຮົມດ້ານວິຊາສະເພາະໃຫ້ແກ່ຄູສອນອາຊີວະສຶກສາເພື່ອເປັນການຍົກລະດັບຄວາມຮູ້ຄວາມສໍານານງານຂອງຕົນໃຫ້ດີຂື້ນ ແລະ ພວກເຮົາໄດ້ເຊັນສັນຍາກັບບໍລິສັດອຸບໂຊປະເທດເຢຍລະມັນຈະຕັ້ງສູນຝຶກອົບຮົມ (ຝຶກເຂັ້ມ) ໃຫ້ແກ່ນັກສຶກສາທີ່ຮຽນຈົບໄໝ່ເພື່ອໃຫ້ມີຄວາມຄ່ອງແຄ້ວ ແລະມີຄວາມສຳນານໃນການນໍາໃຊ້ເຄື່ອງຈັກ, ເຄື່ອງມືກ່ອນຈະໄປສະມັກເຮັດວຽກຢູ່ສະຖານປະກອບການຕ່າງໆທີ່ກ່ຽວຂ້ອງແລະຈັດຝຶກອົບຮົມໃຫ້ພະນັກງານຢູ່ສະຖານປະກອບການຕ່າງທີ່ມີຄວາມຕ້ອງການຝຶກເຂັ້ມດ້ານວິຊາສະເພາະເພື່ອເປັນການຍົກລະດັບຄວາມຮູ້ຄວາມສຳນານງານຂອງຕົນໃຫ້ດີຂື້ນ.

ຂ່າວ ບຸນນິກ

แชร์