5 ເດືອນຕົ້ນປີ ລົດຂຶ້ນທະບຽນກວ່າ 21 ພັນຄັນ

ໃນໄລຍະ 5 ເດືອນຕົ້ນປີ 2022 ກອງຄຸ້ມຄອງພາຫະນະ ນະຄອນຫລວງວຽງຈັນ (ນວ) ສາມາດໃຫ້ບໍລິການຂຶ້ນທະບຽນລົດແກ່ປະຊາຊົນໄດ້ຈຳນວນ 21.294 ຄັນ ຖ້າທຽບໃສ່ປີຜ່ານມາເພີ່ມຂຶ້ນ 50%; ສາມາດໂອນຊື່, ປ່ຽນປ້າຍ, ປ່ຽນສີ, ປ່ຽນຈັກໄດ້ 23.272 ຄັນ ແລະກວດເຕັກນິກລົດໄດ້ 41.047 ຄັນ. ຂະນະດຽວກັນ ກໍມີຜູ້ນຳໃຊ້ລົດໄຟຟ້າມາຂຶ້ນທະບຽນແລ້ວຈຳນວນ 257 ຄັນ ແລະຄາດວ່າຈະເພີ່ມຂຶ້ນອີກເລື້ອຍໆ.

ທ່ານ ບຸນປອນ ບຸນສົມຫວັງ ຫົວໜ້າກອງຄຸ້ມຄອງພາຫະນະ ແລະການຂັບຂີ່ນະຄອນຫລວງວຽງຈັນ (ນວ) ໄດ້ໃຫ້ສຳພາດວ່າ: ໃນໄລຍະຜ່ານມາກອງຄຸ້ມຄອງພາຫະນະ ແລະ ການຂັບຂີ່ ນວ ໄດ້ສຸມໃສ່ປະຕິບັດຕາມທິດຊີ້ນຳຂອງນະຄອນຫລວງໃນການແກ້ໄຂບັນຫາຕາມທິດ 3 ຫລຸດ 3 ເພີ່ມ ໂດຍສະເພາະການຫລຸດຜ່ອນອຸບັດເຫດຕາມທ້ອງຖະໜົນ ແລະຮັບປະກັນການກວດກາເຕັກນິກຍານພາຫະນະໃຫ້ໄດ້ຕາມມາດຕະຖານ.

ສ່ວນໃນປີ 2021 ທີ່ຜ່ານມາ, ກອງຄຸ້ມຄອງພາຫະນະສາມາດໃຫ້ບໍລິການຂຶ້ນທະບຽນລົດໃໝ່ໄດ້ທັງໝົດ 42.015 ຄັນ; ໂອນຊື່, ປ່ຽນປ້າຍ, ປ່ຽນສີ, ປ່ຽນຈັກໄດ້ທັງໝົດ 41.578 ຄັນ ແລະກວດເຕັກນິກລົດ 74.381 ຄັນ.

ນອກຈາກນີ້,ພວກເຮົາກໍສາມາດຂະຫຍາຍຫ້ອງການໄດ້ 3 ສາຂາ ເພື່ອອຳນວຍຄວາມສະດວກໃຫ້ແກ່ປະຊາຊົນທີ່ຢູ່ເຂດໃກ້ຄຽງເຊິ່ງທັງສາມສາຂາແມ່ນສາມາດໃຫ້ບໍລິການຄືກັນກັບສຳນັກງານໃຫຍ່ຢູ່ທົ່ງປົ່ງ ເປັນຕົ້ນ ການຂື້ນທະບຽນໃໝ່, ຕໍ່ທະບຽນ, ໂອນກຳມະສິດ, ຕໍ່ໃບຂັບຂີ່ ແລະຕິດປ້າຍລົດ ປະກອບມີ: ສາຂາບ້ານສີວິໄລ (ໃກ້ກັບໂຮງຮຽນສອນຂັບລົດນ້ຳຊ່ວງ) ເມືອງນາຊາຍທອງ ໄດ້ເປີດບໍລິການມາແຕ່ວັນທີ 06/01/2020;

ສາຂາບ້ານໂພນຄຳ (ຫລັກ16) ເມືອງໄຊທານີ ໄດ້ເປີດບໍລິການແຕ່ວັນທີ 18/01/2021 ເປັນຕົ້ນມາ ແລະ ສາຂາບ້ານດົງໂພສີ (ຕໍ່ໜ້າສາງທ່າບົກ-ທ່ານາແລ້ງ) ເມືອງຫາດຊາຍຟອງ ໄດ້ເປີດໃຫ້ບໍລິການໃນວັນທີ 04/01/2022.

ທ່ານ ບຸນປອນ ບຸນສົມຫວັງ ໃຫ້ຮູ້ຕື່ມວ່າ: ໃນປັດຈຸບັນ ມີຫລາຍບໍລິສັດທີ່ນຳເຂົ້າລົດໄຟຟ້າເຊິ່ງມີຫລາຍລຸ້ນຫລາຍລາຄາເຮັດໃຫ້ຜູ້ຊົມໃຊ້ມີທາງເລືອກຫລາຍຂຶ້ນ ແລະ ຈະມີທ່າອ່ຽງໃນການຂະຫຍາຍຕົວຂອງລົດໄຟຟ້ານັບມື້ເພີ່ມຂຶ້ນຕາມຄວາມຮຽກຮ້ອງຕ້ອງການຕົວຈິງຂອງສັງຄົມ.

ແຕ່ເຖິງຢ່າງໃດກໍຕາມບັນຫາທີ່ສຳຄັນທີ່ສຸດກໍຄືຕ້ອງຮັບປະກັນໄດ້ຄຸນນະພາບ, ຄວາມປອດໄພ ແລະ ສະຖານທີ່ອຳນວຍຄວາມສະດວກໃນການສາກໄຟຢູ່ສະຖານທີ່ສາທາລະນະ ແລະຈຸດຕ່າງໆ ເພື່ອຮອງຮັບໃຫ້ແກ່ຜູ້ຂັບຂີ່ລົດໄຟຟ້າ.

แชร์