ອອປສ ຈະສຸມໃສ່ ເພີ່ມທະວີແກ້ໄຂບັນຫາຄະດີຢາເສບຕິດ ໃຫ້ຖືກຕ້ອງ-ຮັດກຸມ

ໃນວາລະດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ຂອງສະພາແຫ່ງຊາດ ວັນທີ 22 ມິຖຸນາ 2022 ໂດຍການເປັນປະທານຂອງທ່ານ ສຸວອນ ເລືອງບຸນມີ ຮອງປະທານສະພາແຫ່ງຊາດ, ພາຍຫລັງທີ່ບັນດາສະມາຊິກສະພາແຫ່ງຊາດ (ສສຊ) ປະກອບຄຳເຫັນໃສ່ບົດລາຍງານຂອງອົງການໄອຍະການປະຊາຊົນສູງສຸດແລ້ວ,ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ (ອອປລ) ໄດ້ຂຶ້ນຊີ້ແຈງຕໍ່ຄຳຊັກຖາມຂອງ ສສຊ ໃນຫລາຍບັນຫາສຳຄັນໂດຍສະເພາະການແກ້ໄຂບັນຫາຄະດີຫາຢາເສບຕິດໃຫ້ຖືກຕ້ອງ, ສອດຄ່ອງ ແລະບັນຫາສຳຄັນອື່ນໆ.

ໂອກາດນີ້ ທ່ານ ໄຊຊະນະ ໂຄດພູທອນ ໄດ້ໃຫ້ຮູ້ວ່າ: ອົງການໄອຍະການປະຊາຊົນສູງສຸດໄດ້ອອກຄໍາສັ່ງເຖິງອົງການໄອຍະການໃນຂອບເຂດທົ່ວປະເທດໃຫ້ເພີ່ມທະວີດຳເນີນຂະດີຢາເສບຕິດໃຫ້ເຂັ້ມງວດກວ່າເກົ່າ, ຮ່ວມກັບກະຊວງປ້ອງກັນຄວາມສະຫງົບສ້າງກົນໄກປະສານງານ, ເຮັດວຽກຮ່ວມກັນໃນການແກ້ໄຂບັນຫາຢາເສບຕິດເຊິ່ງໄດ້ເຫັນດີໃຫ້ພະນັກງານໄອຍະການແຕ່ລະແຂວງ, ແຕ່ລະເຂດສາມາດເຂົ້າຮ່ວມຕິດຕາມກວດ ກາການດຳເນີນຄະດີຢາເສບຕິດແຕ່ຫົວທີເພື່ອຮັບປະກັນໃຫ້ການກຳເນີນຄະດີ ສອດ ຄ່ອງ ຕາມລະບຽບກົດໝາຍ ແລະວ່ອງໄວຂຶ້ນກວ່າເກົ່າ. ພ້ອມນັ້ນ,ອົງການໄອຍະການຍັງຈະສຸມໃສ່ອອກຄຳສັ່ງ, ຄຳເນາະນຳຂອງອົງການໄອຍະການເພື່ອໃຫ້ອົງການປະຊາຊົນແຂວງໃນຂອບເຂດທົ່ວປະເທດຫັນລົງສູ່ເມືອງ, ສູ່ເຂດເພື່ອສ້າງຄວາມຮັບຮູ້ເຂົ້າໃຈຕື່ມກ່ຽວກັບວ່າລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ. ປັດຈຸບັນອົງການໄອຍະການກຳລັງສຸມໃສ່ຕີລາຄາຄືນ ການແກ້ໄຂບັນຫາພະນັກງານໄອຍະການເຂດໃຫ້ໄປປະຈຳຢູ່ເມືອງ ຫລືຫັນໄປເປັນພະນັກງານໄອຍະການປະຈຳເມືອງແຕ່ເພີ່ມບຸກຄະລາກອນ, ເພີ່ມສິດອຳນາດໃຫ້ເຂົາເຈົ້າ ສາມາດອອກຄຳສັ່ງຈັບໂຕໄດ້, ປ່ອຍໂຕໄດ້, ຕິດຕາມກວດກາຄ້າຍຄຸມຂັງໄດ້, ຕິດຕາມການປະຕິບັດໜ້າທີ່ຂອງເຈົ້າໜ້າທີ່ໄດ້ຄືກັບອົງການໄອຍະການປະຊາຊົນເຂດ, ພ້ອມທັງ ປັບປຸງຄືນກົນໄກແບບແຜນວິທີເຮັດວຽກ ຂອງອົງການໄອຍະການປະຊາຊົນເຂດ, ພະນັກງານໄອຍະການປະຈຳແຕ່ລະເມືອງຄືນໃໝ່ເພື່ອໃຫ້ສອດຄ່ອງກັບສະພາບຕົວຈິງໃນປັດຈຸບັນ.

ສໍາລັບການຕິດຕາມກວດກາສະຖານທີ່ຄຸມຂັງດັດສ້າງອົງການໄອຍະການປະຊາຊົນສູງສຸດດ້ຮ່ວມກັບກະຊວງປ້ອງກັນຄວາມສະຫງົບ, ກະຊວງຍຸຕິທຳເຊັນບົດບັນທຶກການຮ່ວມມືກັນ ໂດຍໄດ້ຕົກລົງເຫັນດີເປັນເອກະພາບ ໃຫ້ພະນັກງານໄອຍະການ ແລະພະນັກງານປະຕິບັດຄຳຕັດສິນຂອງສານລົງໄປປະຕິບັດໜ້າທີ່ຢູ່ສະຖານທີ່ດັດສ້າງ ເພື່ອເກັບກຳສະຖິຕິນັກໂທດ, ຜູ້ຕ້ອງຫາ, ເກັບກຳການປັບໃໝຄ່າເສຍຫາຍຕ່າງໆຢູ່ກັບທີ່, ຜ່ານການຈັດຕັ້ງປະຕິບັດເຮັດໃຫ້ໄອຍະການກຳໄດ້ສະພາບຂອງນັກໂທດ, ຂອງຜູ້ຕ້ອງຫາ, ຂອງຜູ້ຖືກກັກຂັງ, ເຫັນບັນຫາທີ່ເກີດຂຶ້ນ ແລະພ້ອມກັນປຶກສາຫາລືຮ່ວມກັບເຈົ້າໜ້າທີ່ສາມາດແກ້ໄຂບັນຫາຕ່າງໆທີ່ເກີດຂຶ້ນໄດ້ຢ່າງທັນການ.

ທ່ານ ໄຊຊະນະ ໂຄດພູທອນ ຍັງໃຫ້ຮູ້ອີກວ່າ: ໃນຕົ້ນເດືອນສິງຫາ 2022 ນີ້, ອົງການໄອຍະການຈະທົດລອງສ້າງອົງການໄອຍະການເຂດປະຈຳເມືອງປາກງື່ມເພື່ອແກ້ໄຂບັນຫາຕ່າງໆໂດຍສະເພາະການຈັບ, ການປັບໃໝບໍ່ຖືກຕ້ອງ, ການຕິດຕາມກວດກາ, ການປະຕິບັດໜ້າທີ່ຂອງເຈົ້າໜ້າທີ່ຂອງໄອຍະການບໍ່ຮອບດ້ານ, ບໍ່ຄົບຖ້ວນ ເພື່ອໃຫ້ຖືກຕ້ອງຕາມລະບຽບກົດໝາຍ. ສຳລັບ ບຸກຂະລາກອນໃນເບື້ອງຕົ້ນ ແມ່ນ 7 ຄົນ, ຈະປະກອບວັດຖຸ, ອຸປະກອນ, ພາຫະນະ ແລະ ງົບປະມານພ້ອມກັບ ປະກອບສິດອຳນາດໃຫ້ເຂົາເຈົ້າສາມາດອອກຄຳສັ່ງຈັບໂຕໄດ້, ກວດຄົ້ນໄດ້, ກັກຂັງໄດ້, ປ່ອຍໂຕໄດ້, ສາມາດຕິດຕາມກວດກາຄ້າຍຄຸມຂັງດັດສ້າງ, ຄ້າຍກັກຂັງຊົ່ວຄາວ ຂອງເມືອງ, ສາມາດຕິດຕາມກວດກາການປະຕິບັດໜ້າທີ່ຂອງອົງການສືບສວນສອບສວນຂອງເຈົ້າໜ້າທີ່ຕຳຫລວດໄດ້, ເຊິ່ງຈະທົດລອງຈັດຕັ້ງປະຕິບັດເປັນເວລາ 3 ເດືອນ, ຖ້າການຈັດຕັ້ງປະຕິບັດມີປະສິດທິຜົນ,ຮັບປະກັນການປະຕິບັດໜ້າທີ່ຖືກຕາມກົດໝາຍອົງການໄອຍະການຈະເສີມຂະຫຍາຍອອກໄປບັນດາເມືອງທີ່ມີພື້ນຖານ, ເງື່ອນໄຂຄົບຖ້ວນຕື່ມອີກ.

แชร์