ຄຳມ່ວນ ດຳເນີນກອງປະຊຸມວຽກງານກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ

ໃນວັນທີ 21 ມິຖຸນາ 2022 ແຂວງຄໍາມ່ວນ ຈັດກອງປະຊຸມວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍການເປັນປະທານຂອງທ່ານ ວົງເພັດ ຈິດປັນຍາ ຮອງເລຂາພັກແຂວງ, ຜູ້ຊີ້ນໍາຂົງ ເຂດວຽກງານພັກ-ພະນັກງານ ຂອງແຂວງ, ມີຄະນະປະຈໍາ, ກໍາມະການພັກແຂວງ, ເລຂາຄະນະພັກເມືອງ, ຄະນະພັກຮາກຖານພະແນກການ, ເລຂາໜ່ວຍພັກອ້ອມຂ້າງແຂວງເຂົ້າຮ່ວມ.
ໂອກາດນີ້ ທ່ານ ສົມໃຈ ພານີຈັນ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງໄດ້ຜ່ານບົດລາຍງານ ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ເຊິ່ງທົ່ວອົງ ຄະນະພັກແຂວງຄຳມ່ວນ ມີ 10 ອົງຄະນະພັກເມືອງ, ມີ 2 ຄະນະພັກ ປກຊ-ປກສ, ມີຄະນະພັກຮາກຖານ 103 ຮາກຖານ, ມີຮາກຖານພັກ 1.281 ຮາກຖານພັກ, ສະມາຊິກພັກທັງໝົດ 21.369 ສະຫາຍ, ຍິງ 5.637 ທ່ານ, ຄະນະພັກ, ສະມາຊິກພັກ, ໄດ້ຮັບການເຊື່ອມຊຶມ, ຮໍ່າຮຽນແນວທາງນະໂຍບາຍ, ມະຕິ, ຄຳສັ່ງ, ລະບຽບການຂອງພັກ, ມີຄວາມເຂົ້າໃຈຕໍ່ແນວທາງ, ອຸດົມການຂອງພັກ ສາມາດສ້າງໄດ້ທັດສະນະຫລັກໝັ້ນຊົນຊັ້ນ, ຄຸນທາດການເມືອງ, ຄຸນສົມບັດສິນທຳປະຕິວັດທີ່ຖືກຕ້ອງ, ມີຄວາມຈົງຮັກພັກດີຕໍ່ພັກ, ຕໍ່ລະບອບໃໝ່ ແລະ ປະເທດຊາດ, ເຊື່ອມຊຶມກຳແໜ້ນ ແລະ ເປັນເອກະພາບຕໍ່ແນວທາງ, ນະໂຍບາຍຂອງພັກ ແລະ ກົດໝາຍຂອງລັດ, ຮູ້ປົກປ້ອງແນວທາງ, ປົກປ້ອງລະບອບໃໝ່ ແລະອຸດົມການຂອງພັກເຮົາ, ຕອບຕ້ານປະກົດຫຍໍ້ທໍ້ທີ່ເກີດຂຶ້ນພາຍໃນພັກ ແລະ ສັງຄົມ, ການຈັດຕັ້ງພັກໄດ້ຮັບການກໍ່ສ້າງ,ປັບປຸງຕາມ 5 ຫລັກການ ແລະ3 ທິດນຳ,ບັນດາການຈັດຕັ້ງໃນລະບົບການເມືອງຢູ່ຂັ້ນຮາກຖານໄດ້ຮັບການປັບປຸງ ແລະ ເຄື່ອນໄຫວຢ່າງຖືກຕ້ອງຕາມພາລະບົດບາດ, ກຳແໜ້ນ ແລະປະຕິບັດໜ້າທີ່, ຄວາມຮັບຜິດຊອບຂອງຕົນ, ເຄົາລົບ ແລະ ປະຕິບັດຕາມກົດລະບຽບຂອງພັກ, ສິດເປັນເຈົ້າຂອງປະຊາຊົນບັນດາເຜົ່າໄດ້ຮັບການເຊີດຊູສູງຂຶ້ນ. ໃນປີ 2021 ສາມາດຕີລາຄາແບ່ງປະເພດ ໜ່ວຍພັກ ແລະສະມາຊິກພັກ ຄື: ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈຳນວນ 641 ໜ່ວຍພັກ, ໜ່ວຍພັກແຂງ ຈຳນວນ 62 ໜ່ວຍພັກ, ໜ່ວຍພັກກາງ 433 ໜ່ວຍພັກ, ໜ່ວຍພັກອ່ອນ ຈຳນວນ 5 ໜ່ວຍພັກ, ບໍ່ໄດ້ຈັດປະເພດ 37 ໜ່ວຍ.
ກອງປະຊຸມຄັ້ງນີ້, ບັນດາທ່ານທີ່ເຂົ້າຮ່ວມ ຍັງໄດ້ປະກອບຄໍາເຫັນໃສ່ບົດລາຍງານ ແລະ ເນື້ອໃນຂອງການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ, ວຽກງານສ້າງການຫັນປ່ຽນແນວຄິດພະນັກງານ ລວມເຖິງການປະກອບຄຳເຫັນໃນດ້ານການຕີລາຄາຂອງການຈັດຕັ້ງປະຕິບັດວຽກງານຂອງຄະນະພັກ ຕໍ່ຄວາມສຳຄັນໃນການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ບັນດາຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ເພື່ອຊອກຫາວິທີແກ້ໄຂ ແນໃສ່ເຮັດໃຫ້ວຽກງານການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ຮັບປະກັນໄດ້ທາງດ້ານຄຸນນະພາບ ແລະ ປະລິມານ ໃນຕໍ່ໜ້າ.
ຂ່າວ: ກອງຄຳ

แชร์