ລັດຖະມົນຕີກະຊວງ ຍທຂ ຊີ້ນຳວຽກງານຢູ່ແຂວງບໍລິຄຳໄຊ

ໃນໂອກາດລົງເຄື່ອນໄຫວວຽກຢູ່ແຂວງບໍລິຄໍາໄຊໃນວັນທີ 21 ມິຖຸນາ ທີ່ຜ່ານມາທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົງ(ຍທຂ) ໄດ້ໃຫ້ທິດຊີ້ນຳບາງວຽກງານຂອງພະນັກງານ ຍທຂ ແຂວງ ເປັນຕົ້ນ ການປະຕິບັດ 2 ວາລະແຫ່ງຊາດ, ສືບຕໍ່ພັດທະນາພື້ນຖານໂຄງລ່າງ ເຊັ່ນ: ການປັບປຸງຖະໜົນຫົນທາງ, ທ່າເຮືອ ແລະ ອື່ນໆ, ຄົ້ນຄວ້າວາງແຜນຜັງເມືອງ ແລະຄຸ້ມຄອງການປຸກສ້າງຕາມພາລະບົດບາດຊຸກຍູ້ສົ່ງເສີມສັງຄົມໃຫ້ສາມາດກຸ້ມຕົນເອງໄດ້, ຈັດຕັ້ງຜັນຂະຫຍາຍວຽກງານ 3 ສ້າງ ໃຫ້ປະກົດຜົນເປັນຈິງ, ປັບປຸງແບບແຜນວິທີເຮັດວຽກນຳໃຊ້ເຕັກໂນໂລຊີທີ່ທັນສະໄໝເຂົ້າໃນການປະຕິບັດວຽກງານ, ມີຄວາມເດັດຂາດ, ໂປ່ງໃສ ແລະເປັນມືອາຊີບຕໍ່ໜ້າທີ່ວຽກງານທັງນີ້ ກໍເພື່ອຮັບປະກັນໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ໂອກາດນີ້ ທ່ານ ວິໄຊ ພູມີ ຫົວໜ້າພະແນກ ຍທຂ ແຂວງບໍລິຄຳໄຊ ກໍໄດ້ລາຍງານການປະຕິບັດວຽກງານໃນໄລຍະຜ່ານມາວ່າ: ໃນປີ 2022 ແຂວງບໍລິຄໍາໄຊ ມີໂຄງ ການກໍ່ສ້າງທັງໝົດ 24 ໂຄງການ ມູນຄ່າສະພາຮັບຮອງ 3.518 ຕື້ກວ່າກີບ ໂດຍອີງໃສ່ສະພາບຄວາມຫຍຸ້ງທາງດ້ານເສດຖະກິດຂອງປະເທດກໍຄືທ່າແຮງການຕອບສະໜອງການສຳລະພະແນກ ຍທຂ ໄດ້ຄົ້ນຄ້ວາປະເມີນຜົນຄືນຈຶ່ງໄດ້ໂຈະຈຳນວນ 7 ໂຄງການ ສາມາດຫລຸດມູນຄ່າລົງຈາກ 3.518 ຕື້ກີບ ລົງມາ 2.814 ຕື້ກີບ ສາມາກປະຍັດໄດ້ 701 ຕື້ກ່ວາກີບ. ອັນພົ້ນເດັ່ນແຂວງບໍລິຄໍາໄຊ ມີໂຄງການກໍ່ສ້າງຂົວມິດຕະພາບລາວ-ໄທ ຂ້າມນໍ້າຂອງ ແຫ່ງທີ 5 ບໍລິຄໍາໄຊ-ບຶງການ ເຊິ່ງໂຄງການໄດ້ສຸມໃສ່ມີຄວາມຄືບໜ້າລື່ນແຜນວາງໃນສັນຍາ.ຄຽງຄູ່ກັນນັ້ນ ແຂວງໄດ້ຄົ້ນຄ້ວາ ເພື່ອກຳນົດ ເຂດພັດທະນາເຂດຕິດພັນກັບສົ້ນຂົວແມ່ນໍ້າຂອງມີເນື້ອທັງໝົດ 1042 ເຮັກຕາ ລວມທັງເຂດພັດທະນາສາງຄ່ຽນຖ່າຍສິນຄ້າ ທີ່ອະນຸມັດໄປແລ້ວ, ການປັບປຸງ ແລະ ສ້ອມແປງທາງຫລວງແຫ່ງຊາດ 13 ໃຕ້ ກໍໄດ້ລົງມືປະຕິບັດເປັນປົກະຕິ.
ທົ່ວແຂວງບໍລິຄຳໄຊມີເສັ້ນທາງທັງໝົດ 255 ເສັ້ນ, ມີລວງຍາວ 2.439 ກິໂລແມັດ, ບ້ານທຽວໄດ້ຕະຫລອດປີ 259 ບ້ານ ເທົ່າ 91,5% ຂອງຈຳນວນ 284 ບ້ານ,ມີເສັ້ນທາງເຂົ້າຫາບ້ານທຽວໄດ້ແຕ່ລະດູແລ້ງ 24 ບ້ານ ເທົ່າກັບ 8,4%, ປີ 2022 ໄດ້ມີໂຄງການກໍ່ສ້າງປ້ອງກັນເຈື່ອນໄດ້ສັນຍາໄປແລ້ວທັງໝົດ 7 ໂຄງການ ລວງຍາວທັງໝົດ 5.183 ແມັດ ມູນຄ່າ 145 ຕື້ກວ່າກີບ ໃນນີ້, ກັນເຈື່ອນແມ່ນໍ້າຂອງ 5 ໂຄງການ ລວງຍາວ 4.583 ກິໂລແມັດ, ທົ່ວແຂວງໄດ້ມີນໍ້າປະປາໃຊ້ແລ້ວ 6 ຕົວເມືອງ,ຍັງເຫລືອ 1 ຕົວເມືອງຄື: ເມືອງໄຊຈຳພອນ (ກຳລັງກໍ່ສ້າງ,ປະຕິບັດໄດ້34,37%) ທົ່ວແຂວງໄດ້ຊົມໃຊ້ນໍ້າປະປາ 56 ບ້ານ ຄິດເປັນ 19,3%.

แชร์