ສ້າງຄວາມເຂັ້ມແຂງໃນການວິເຄາະ-ວິໄຈ ໃຫ້ພະນັກງານກະຊວງການຕ່າງປະເທດ

ສະຖາບັນການຕ່າງປະເທດ ຈັດສໍາມະນາວິທະຍາສາດ, ພາຍໃຕ້ຫົວຂໍ້: “ການສ້າງຄວາມເຂັ້ມແຂງໃຫ້ແກ່ວຽກງານຄົ້ນຄວ້າ-ວິໄຈບັນຫາພາກພື້ນ ແລະສາກົນ” ສໍາລັບ ພະນັກງານກະຊວງການຕ່າງປະເທດໃນຂອງວັນທີ 22 ມິຖຸນາ 2022 ໂດຍການເປັນປະທານຂອງ ທ່ານ ທຸດໄມ ໄຊຍະວົງສ໌ ຫົວໜ້າສະຖາບັນການຕ່າງປະເທດ ໂດຍໄດ້ເຊືນບັນດາທູດອາວຸໂສຈາກສະໂມສອນນັກການທູດລາວ ແລະບັນດາຄະນະກົມພາຍໃນກະຊວງມາເປັນຜູ້ບັນຍາຍ, ມີພະນັກງານຈາກກະຊວງການຕ່າງປະເທດ ເຂົ້າຮ່ວມ.

ການຈັດສຳມະນາຄັ້ງນີ້, ເພື່ອສ້າງຄວາມເຂັ້ມແຂງ ແລະສ້າງຂີດຄວາມສາມາດໃນການວິເຄາະ-ວິໄຈບັນຫາທີ່ພົ້ນເດັ່ນຂອງພາກພື້ນ ແລະ ສາກົນ, ທັງເປັນການແລກປ່ຽນປະສົບການທາງດ້ານວຽກງານຄົ້ນຄວ້າກ່ຽວກັບບັນຫາພາກພື້ນ ແລະສາກົນຈາກບັນດາທ່ານທູດອາວຸໂສ ແລະຄະນະກົມຂອງກະຊວງຕ່າງປະເທດທີ່ມີປະສົບການສູງ ຈາກການເຮັດວຽກຕົວຈິງໃນຂະແໜງການຕ່າງປະເທດເພື່ອຖ່າຍທອດຄວາມຮູ້ໃຫ້ແກ່ບັນດານັກການທູດຫລັກແຫລ່ງ ແລະ ໜຸ່ມນ້ອຍ ຂອງກະຊວງການຕ່າງປະເທດ ແນໃສ່ຍົກສູງປະ ສິດທິພາບ ໃນການເປັນເສນາທິການໃຫ້ແກ່ຄະນະນໍາກະຊວງໃນການຄົ້ນຄວ້າ, ວາງທັດສະນະ ຕໍ່ສະພາບການພາກພື້ນ ແລະ ສາກົນເພື່ອຍາດແຍ່ງເອົາຜົນປະໂຫຍດສູງສຸດມາສູ່ປະເທດຊາດບົນຫລັກການທີ່ຖືກຕ້ອງ ແລະສອດຄ່ອງຕາມແນວທາງນະໂຍບາຍການຕ່າງປະເທດຂອງພັກ-ລັດຖະບານວາງອອກ.

ການສໍາມະນາດັ່ງກ່າວ, ຜູ້ຂົ້າຮ່ວມໄດ້ຮັບຟັງການບັນຍາຍກ່ຽວກັບວິທີວິທະຍາໃນການເຮັດບົດຄົ້ນຄວ້າໃນຂົງເຂດການເມືອງ-ການທູດ; ເຕັກນິກໃນການວິເຄາະ-ວິໄຈບັນ ຫາພາກພື້ນ ແລະສາກົນທີ່ພົ້ນເດັ່ນ. ຈາກນັ້ນ ກໍໄດ້ຈັດຕັ້ງປະຕິບັດຕົວຈິງ ໂດຍໄດ້ແບ່ງຈຸຄົ້ນຄວ້າ ເພື່ອເຮັດບົດຄົ້ນຄວ້າໃດໜຶ່ງ, ພ້ອມທັງວາງທັດສະນະຕໍ່ບັນ ຫາທີ່ເຄັ່ງຮ້ອນຂອງພາກພື້ນ ແລະສາກົນ. ນອກຈາກນີ້, ຍັງໄດ້ຮ່ວມກັນແລກປ່ຽນ ແລະສະເໜີແນະວິທີທາງອອກຂອງບັນຫາຈາກຜົນກະທົບໄລຍະສັ້ນ ແລະຍາວຕໍ່ ສປປ ລາວ ກໍຄືພາກພື້ນ ແລະສາກົນເພື່ອນໍາໄປຜັນຂະຫຍາຍ ແລະຈັດຕັ້ງປະຕິບັດໃຫ້ສອດຄ່ອງກັບວຽກງານຕົວຈິງຂອງຕົນ.

ຜ່ານການຮັບຟັງການບັນຍາຍ ແລະການເຮັດບົດຄົ້ນຄວ້າຕົວຈິງໃນສະພາບການໃດໜຶ່ງທີ່ພົ້ນເດັ່ນຂອງພາກພື້ນ ແລະສາກົນເພື່ອນໍາມາວິເຄາະ-ວິໄຈເນື້ອແທ້ຂອງບັນຫາເຮັດໃຫ້ຜູ້ເຂົ້າຮ່ວມສາມາດເຂົ້າໃຈຄວາມໝາຍ ແລະຄວາມສໍາຄັນຂອງວຽກງານຄົ້ນຄວ້າ ແລະຮູ້ນໍາໄປປັບແກ້ ແລະໝູນໃຊ້ເຂົ້າໃນວຽກງານທີ່ຕົນຮັບຜິດຊອບໄດ້ຢ່າງມີປະສິດທິພາບ. ພ້ອມນີ້, ຍັງເປັນໂອກາດທີ່ດີ ທີ່ນັກການທູດອາວຸໂສ ແລະ ນັກການທູດຮຸ່ນສືບທອດ ໄດ້ຖອດຖອນ ແລະແລກປ່ຽນບົດຮຽນຢ່າງກົງໄປກົງມາເພື່ອເປັນຂໍ້ມູນອັນໜັກແໜ້ນໃນການພັດທະນາຄວາມຮູ້, ຄວາມສາມາດ ແລະສ້າງຄວາມເຂັ້ມແຂງໃນການຄົ້ນຄວ້າ-ວິໄຈ ບັນຫາໃຫ້ເລິກເຊິ່ງເຖິງຖອງກວ່າເກົ່າເພື່ອເປັນຖານໃນການສ້າງໃຫ້ຂະແໜງການຕ່າງປະເທດກໍຄືກະຊວງການຕ່າງປະເທດມີຄວາມເຂັ້ມແຂງຮອບດ້ານກວ່າເກົ່າ.

ຂ່າວ: ສຸກສະຫວັດ
ພາບ: ເກດສະໜາ

• 22/06/2022