ປິດໂຄງການຮ່ວມມືລະຫວ່າງລັດຖະບານ ແລະອົງການ ເຄືອຄ່າຍ ສປຊ

ກະຊວງແຮງງານ ແລະສະຫວັດດີການສັງຄົມຮ່ວມກັບອົງການເຄືອຄ່າຍສະຫະປະຊາຊາດຈັດກອງປະຊຸມສະຫລຸບ ແລະປິດໂຄງການຮ່ວມມືລະຫວ່າງລັດຖະບານ ແລະ ອົງການ ເຄືອຄ່າຍ ສປຊ “ບໍ່ປະຖິ້ມໃຜໄວ້ຂ້າງຫລັງ: ສ້າງພື້ນຖານໃຫ້ແກ່ລະບົບປົກປ້ອງສັງຄົມຂັ້ນພື້ນຖານ ໃນ ສປປ ລາວ” ໃນວັນທີ 21 ມິຖຸນາ 2022 ທີ່ນະຄອນຫລວງວຽງຈັນ, ພ້ອມທັງຮັບຟັງຄໍາຄິດຄໍາເຫັນ ຕໍ່ກັບຜົນສໍາເລັດການຈັດຕັ້ງປະຕິບັດກິດຈະກໍາຂອງໂຄງການ, ທາງດ້ານຜົນໄດ້ຮັບຂອງໂຄງການ, ບັນຫາສິ່ງທ້າທາຍຕ່າງໆ ແລະຂໍ້ສະເໜີເພື່ອປັບປຸງແກ້ໄຂໃນຕໍ່ໜ້າ.

ໂອກາດນີ້ທ່ານ ນາງ ໃບຄຳ ຂັດທິຍາ ລັດຖະມົນຕີ ກະຊວງແຮງງານ ແລະສະຫັວດີການສັງຄົມ ໄດ້ໃຫ້ຮູ້ວ່າ: ໂຄງການຮ່ວມມືລະຫວ່າງ ລັດຖະບານ ສປປ ລາວ ແລະ ອົງການເຄືອຂ່າຍ ສປຊ “ບໍ່ປະຖີ້ມໃຜໄວ້ຂ້າງຫລັງ: ສ້າງລະບົບປົກປ້ອງສັງຄົມຂັ້ນພື້ນຖານ ໃນ ສປປ ລາວ” ເປັນໂຄງການຊ່ວຍເຫລືອສຸດທີ່ມີຄວາມສໍາຄັນຫລາຍທີ່ປະກອບສ່ວນເຂົ້າໃນການພັດທະນາ ຢູ່ ສປປ ລາວ ໂດຍສະເພາະໃນການຈັດຕັ້ງປະຕິບັດຍຸດທະສາດແຫ່ງຊາດເພື່ອການປົກປ້ອງສັງຄົມເປັນຕົ້ນການພັດທະນາ ແລະ ສ້າງຄວາມເຂັ້ມແຂງໃຫ້ພາກລັດຖະບານໃນການວາງແຜນ, ການຄຸ້ມຄອງ ແລະການຈັດຕັ້ງປະຕິບັດວຽກງານປົກປ້ອງສັງຄົມລວມທັງການນຳພາ, ການປະສານງານໃນການຈັດຕັ້ງຜັນຂະຫຍາຍແຜນຍຸດທະສາດ; ທົດລອງການໃຫ້ເງິນອຸດໜູນແມ່ຍິງຖືພາ ແລະເດັກນ້ອຍຕໍ່າກວ່າ 12 ເດືອນ ເຊິ່ງໄດ້ປະຕິບັດຢູ່ແຂວງສະຫວັນນະເຂດ ແລະອັດຕະປື; ການສ້າງຄູ່ມືຝຶກອົບຮົມວຽກງານປົກປ້ອງສັງຄົມ ແລະຈັດກອງປະຊຸມຝຶກອົບຮົມໃຫ້ແກ່ພະນັກງານຂະແໜງການກ່ຽວຂ້ອງຂອງລັດ; ການສຶກສາຜົນກະທົບດ້ານການປົກປ້ອງສັງຄົມ ຕໍ່ເສດຖະກິດຂອງ ສປປ ລາວ; ການສຶກສາຄ່າໃຊ້ຈ່າຍກອງທຶນສະຫວັດດີການສັງຄົມ ພາຍໃຕ້ຍຸດທະສາດການປົກປ້ອງສັງຄົມແຫ່ງຊາດ; ຈັດກິດຈະກໍາການໂຄສະນາຜ່ານສື່ທາງວິທະຍຸດ້ວຍການຈັດລາຍການສຳພາດສົດ, ແລກປ່ຽນມູມມອງການມີສ່ວນຮ່ວມລະຫວ່າງການຈັດຕັ້ງພາກລັດຖະບານກັບອົງການເຄືອຄ່າຍ ສປຊ, ກິດຈະກຳແຂ່ງຂັນຖາມຕອບກັບຜູ້ຟັງ, ຜະລິດສື່ໂຄສະນາເປັນວິດີໂອກ່ຽວກັບການໃຫ້ຄວາມຮູ້ການປະກັນສັງຄົມ ແລະ ການປະກັນສຸຂະພາບ; ພັດທະນາເຄື່ອງມື ແລະຝືກອົບຮົມໃຫ້ພະນັກງານວິຊາການຜູ້ຮັບຜິດຊອບຕິດຕາມການຈັດຕັ້ງປະຕິບັດຍຸດທະສາດປົກປ້ອງສັງຄົມແຫ່ງຊາດ ແລະ ລາຍງານເປົ້າໝາຍ ການພັດທະນາແບບຍືນຍົງ(SDG 1.3.1) ດ້ວຍການກໍານົດຕົວຊີ້ບອກປົກປ້ອງສັງຄົມແຫ່ງຊາດເຂົ້າໃນຖານຂໍ້ມູນອອນລາຍຂອງກະຊວງ ຮສສ. ພ້ອມນີ້, ໄດ້ມີການທົບທວນ ແລະສ້າງຂໍ້ແນະນຳເພື່ອປັບປຸງສາລະບານງົບປະມານໃຫ້ມີການພິຈາລະນານຳໃຊ້ເພື່ອເປັນພື້ນຖານໃນການລະດົມທຶນທັງພາຍໃນ ແລະ ສາກົນ.

ໂຄງການດັ່ງກ່າວ, ສຳເລັດການລົງທະບຽນຜູ້ໄດ້ຮັບຜົນປະໂຫຍດ ທັງໝົດ 2.431 ຄົນ ໃນນີ້ ຢູ່ເມືອງສະໜາມໄຊ 1.089 ຄົນ, ເມືອງພູວົງ ແຂວງອັດຕະປື 350 ຄົນ ແລະເມືອງນອງ ແຂວງສະຫວັນນະເຂດ 992 ຄົນ, ມີເດັກ 467 ຄົນ. ມາຮອດປັດຈຸບັນການຮ່ວມມືພາຍໃຕ້ໂຄງການດັ່ງກ່າວກໍໄດ້ດຳເນີນມາເຖິງກຳນົດເວລາສິ້ນສຸດໂຄງການໃນທ້າຍເດືອນມິຖຸນາ 2022 ນີ້, ແຕ່ວຽກການປົກປ້ອງສັງຄົມຂອງພວກເຮົາກໍຈະໄດ້ສືບຕໍ່ຜັນຂະຫຍາຍຍຸດທະສາດປົກປ້ອງສັງຄົມແຫ່ງຊາດໃຫ້ບັນລຸວິໄສທັດໃນອີກ 5 ປີຕໍ່ໜ້າຄຽງຄູ່ກັບການພັດທະນາເສດຖະກິດ-ສັງຄົມແຫ່ງຊາດ ແລະການຮ່ວມມືກັບບັນດາຄູ່ຮ່ວມພັດທະນາໃຫ້ບັນລຸໄປພ້ອມໆກັນ.

แชร์