ກອງປະຊຸມປຶກສາຫາລື ອາຊຽນ-ຍີ່ປຸ່ນ ຄັ້ງທີ 37 ແບບທາງໄກ

ໃນວັນທີ 20 ມິຖຸນາ 2022 ນີ້, ທ່ານ ທອງຜ່ານ ສະຫວັນເພັດ ຮອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະເຂົ້າຮ່ວມກອງປະຊຸມປຶກສາຫາລືອາຊຽນ-ຍີ່ປຸ່ນ ຄັ້ງທີ 37 ແບບທາງໄກ ທີ່ກະຊວງການຕ່າງປະເທດ ພາຍໃຕ້ການເປັນປະທານຮ່ວມຂອງ ໄທ ແລະຍີ່ປຸ່ນ.

ກອງປະຊຸມ ໄດ້ທົບທວນຄືນຄວາມຄືບໜ້າຂອງການຮ່ວມມື ອາຊຽນ-ຍີ່ປຸ່ນ ໃນໄລຍະ 1 ປີຜ່ານມາ ໂດຍສະເພາະການຈັດຕັ້ງປະຕິບັດ ແຜນປະຕິບັດງານອາຊຽນຍີ່ປຸ່ນ 2021-2025 ເຊິ່ງກວມເອົາ 4 ຂົງເຂດບູລິມະສິດຄື: ຄູ່ຮ່ວມມືເພື່ອສັນຕິພາບ ແລະ ຄວາມໝັ້ນຄົງ; ຄູ່ຮ່ວມມືເພື່ອຄວາມສົມບູນພູນສຸກ; ຄູ່ຮ່ວມມືເພື່ອຄຸນນະພາບຊີວິດ ແລະ ຄູ່ຮ່ວມມືໃຈເຖິງໃຈ. ພ້ອມນີ້, ກອງປະຊຸມຍັງໄດ້ປຶກສາຫາລືທິດທາງແຜນການຮ່ວມມືໃນຕໍ່ໜ້າ ກໍຄື ການສືບຕໍ່ຜັນຂະຫຍາຍຜົນກອງປະຊຸມສຸດຍອດ ອາຊຽນ-ຍີ່ປຸ່ນ ຄັ້ງທີ 24 ໃຫ້ເປັນຮູບປະທໍາ.

ໃນໂອກາດນີ້, ທ່ານ ທອງຜ່ານ ສະຫວັນເພັດ ກໍໄດ້ສະແດງຄວາມຂອບໃຈຍີ່ປຸ່ນທີ່ໄດ້ໃຫ້ການຊ່ວຍເຫລືອປະເທດສະມາຊິກອາຊຽນ ລວມທັງ ສປປ ລາວ ໃນການຮັບມືກັບພະຍາດໂຄວິດ-19 ເປັນຕົ້ນ ການຊ່ວຍເຫລືອຂອງຍີ່ປຸ່ນເຂົ້າໃນກອງທຶນຮັບມືກັບພະຍາດໂຄວິດ-19 ຂອງອາຊຽນ 1 ລ້ານໂດລາສະຫະລັດ ແລະ ອີກ 50 ລ້ານໂດລາສະຫະລັດ ສໍາລັບການສ້າງສູນຮັບມືສາທາລະນະສຸກສຸກເສີນ ຂອງອາຊຽນ. ພ້ອມນີ້, ຍີ່ປຸ່ນ ໄດ້ຢືນຢັນຄວາມໝາຍໝັ້ນທີ່ຈະຊ່ວຍເຫລືອອາຊຽນໃນການຟື້ນຟູຈາກໂຄວິດ-19 ແລະ ຈະຮັດແໜ້ນການຮ່ວມມືໃນຂົງເຂດຕ່າງໆທີ່ມີຄວາມສົນໃຈຮ່ວມກັນ ເຊັ່ນ: ດ້ານສາທາລະນະສຸກ, ດ້ານການຄ້າ, ການເຊື່ອມໂຍງພາກພື້ນ, ການຮັດແຄບຄວາມແຕກໂຕນທາງດ້ານການພັດທະນາ, ການເຊື່ອມຈອດ, ການຫັນເປັນດີຈິຕອນ, ການພັດທະນາຊັບພະຍາກອນມະນຸດ ແລະອື່ນໆ.

ໃນໂອກາດນີ້, ກອງປະຊຸມຍັງໄດ້ປຶກສາຫາລືກ່ຽວກັບການກະກຽມສະເຫລີມ ສະຫລອງ ຄົບຮອບ 50 ປີ ແຫ່ງມິດຕະພາບ ແລະການຮ່ວມມືລະຫວ່າງອາຊຽນ ແລະ ຍີ່ປຸ່ນໃນປີ 2023 ແລະການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ທີ່ຈະຈັດຂຶ້ນໃນເດືອນສິງຫາ 2022 ນີ້.

แชร์