ປກສ ໃຊ້ຫຼາຍມາດຕະການໃນການຮັກສາຄວາມສະຫງົບ ປອດໄພ ໃຫ້ນັກທ່ອງທ່ຽວ

ການຮັກສາຄວາມສະຫງົບ ປອດໄພ ໃຫ້ນັກທ່ອງທ່ຽວ ຕິດພັນກັບການປ້ອງກັນ ແລະຮັບມືກັບການແຜ່ລະບາດຂອງພະຍາດໂຄວິດ-19 ເປັນວຽກໜຶ່ງທີ່ສຳຄັນໃນການສ້າງຄວາມສະດວກ ແລະ ດຶງດູດນັກທ່ອງທ່ຽວເຂົ້າມາ ສປປ ລາວ ຊຶ່ງນັບແຕ່ເປີດການທ່ອງທ່ຽວສີຂຽວ ແລະ ການເປີດປະເທດແບບເຕັມຮູບແບບ, ກະຊວງປ້ອງກັນຄວາມສະຫງົບ (ປກສ) ກໍໄດ້ມີຫຼາຍມາດຕະການເພື່ອຮັກສາຄວາມສະຫງົບ ປອດໄພ ໃຫ້ກັບນັກທ່ອງທ່ຽວທີ່ເດີນທາງເຂົ້າມາ ສປປ ລາວ.

ທ່ານ ພົນຕີ ຄຳກິ່ງ ຜຸ່ຍຫຼ້າມະນິວົງ ຫົວໜ້າກົມໃຫຍ່ຕໍາຫຼວດກະຊວງ ປກສ ໄດ້ຂຶ້ນຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ, ໃນວັນທີ 17 ມິຖຸນາ ຜ່ານມາທີ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX, ໂດຍການເປັນປະຂອງ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດໃນຫຼາຍຄຳຊັກຖາມ ໂດຍສະເພາະແມ່ນວຽກງານທີ່ຕິດພັນກັບການທ່ອງທ່ຽວກໍຄືການຮັກສາຄວາມສະຫງົບ ປອດໄພ ໃຫ້ນັກທ່ອງທ່ຽວ.

ທ່ານຫົວໜ້າກົມໃຫຍ່ຕໍາຫຼວດ ໄດ້ຊີ້ແຈງວ່າ: ໃນດ້ານການຮັກສາຄວາມສະຫງົບ ປອດໄພ ໃຫ້ນັກທ່ອງທ່ຽວ, ກະຊວງ ປກສ ໄດ້ມອບໃຫ້ບັນດາຫ້ອງການສັນຕິບານ ກອງບັນຊາການ ປກສ ນະຄອນ ຫຼວງ, ປກສ ບັນດາແຂວງໃນທົ່ວປະເທດ ບັນຈຸສັບຊ້ອນກຳລັງຕໍາຫຼວດທ່ອງທ່ຽວລົງປະຈຳການຕາມຈຸດແຫຼ່ງທ່ອງທ່ຽວທີ່ຂະແໜງ ຖວທ ກຳນົດໄວ້, ເພື່ອປະສານສົມທົບກັບພາກສ່ວນກ່ຽວຂ້ອງໃນການຄຸ້ມຄອງ, ຕິດຕາມຮັກສາຄວາມສະຫງົບ ແລະຄວາມປອດໄພໃຫ້ແກ່ນັກທ່ອງທ່ຽວຕາມຫຼັກວິຊາສະເພາະ, ກົດ ໝາຍ-ລະບຽບການ ແລະນະໂຍບາຍການຕ່າງປະເທດ. ນອກນີ້, ກໍໄດ້ຊີ້ນຳໃຫ້ ກົມຕໍາຫຼວດທ່ອງທ່ຽວກະກຽມຄວາມພ້ອມໃນການເປີດປະເທດ, ຕ້ອນຮັບນັກທ່ອງທ່ຽວໃຫ້ມີປະສິດທິພາບ, ຄ່ອງຕົວ, ສະດວກ-ວ່ອງໄວ, ຮັບປະການດ້ານຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ, ສາມາດຄວບຄຸມໄດ້ການແຜ່ລະບາດຂອງພະຍາດໂຄວິດ-19; ໃນນັ້ນໄດ້ນຳໃຊ້ ແລະອອກແຈ້ງການລະອຽດຄື:
ກະຊວງ ປກສ ໄດ້ຊີ້ນຳຕໍາຫຼວດທ່ອງທ່ຽວເອົາໃຈໃສ່ໃນການກວດກາ, ຕິດຕາມ ແລະ ປະຕິບັດຕາມເອກະສານແຈ້ງການທີ່ລັດຖະບານວາງອອກໃນແຕ່ລະໄລຍະໃຫ້ເຂັ້ມງວດ ແລະ ເປັນເອກກະພາບໃນການຈັດຕັ້ງປະຕິບັດເອົາໃຈໃສ່ລົງເລິກ ແລະ ໃກ້ຊິດຕິດແທດກັບຜູ້ປະກອບການຄື: ບໍລິສັດນຳທ່ຽວ, ພະນັກງານນຳທ່ຽວ, ພະນັກງານຂັບລົດຂົນສົ່ງນັກທ່ອງທ່ຽວ, ພາຫະນະຂົນສົ່ງທ່ອງທ່ຽວ, ສະຖານທີ່ພັກໂຮງແຮມ, ແຫຼ່ງທ່ອງທ່ຽວຮ້ານອາຫານ, ຮ້ານບັນເທີງ ແລະອື່ນໆ; ຫຼຸດຂັ້ນຕອນໃນການປະກອບເອກະສານເພື່ອຄວາມສະດວກໃຫ້ແກ່ຜູ້ປະກອບການ ແລະບໍ່ສ້າງຄວາມສົບສົນໃຫ້ແກ່ພາກທຸລະກິດ, ເອົາໃຈໃສ່ປະສານສົມທົບກັບບັນດາຂະແໜງການທີ່ກ່ຽວຂ້ອງເພື່ອຄວາມປັນເອກະພາບໃນການຈັດຕັ້ງປະຕິບັດ, ອຳນວຍຄວາມສະດວກໃຫ້ແກ່ນັກທ່ອງທ່ຽວ ແລະ ເອົາໃຈໃສ່ກວດກາຕິດຕາມໃຫ້ຄວາມຮ່ວມມືສະດວກ, ວ່ອງໄວ ແລະ ຮັບປະກັນໃຫ້ແກ່ຄວາມສະຫງົບປອດໄພ ໃຫ້ແກ່ນັກທ່ອງທ່ຽວ.

ທ່ານຊີ້ແຈງຕື່ມວ່າ: ກະຊວງ ປກສ ຍັງໄດ້ສ້າງຄວາມເປັນເອກກະພາບຂອດການປະສານງານກັບພາກສ່ວນກ່ຽວຂ້ອງໃຫ້ກົມກຽວ-ຄ່ອງຕົວ ທັງເຮັດໃຫ້ວຽກງານປ້ອງກັນຄວາມສະຫງົບທີ່ນອນຢູ່ໃນຂົງເຂດຫົວໜ່ວຍທຸລະກິດທ່ອງທ່ຽວມີປະສິດທິພາບສູງ, ແນໃສ່ປ້ອງກັນ ແລະ ສະກັດກັ້ນ, ຊອກຮູ້ກຸ່ມຄົນບໍ່ດີທີ່ສວຍໃຊ້ໂອກາດນຳໃຊ້ເສັ້ນທາງຢ້ຽມຢາມ, ທ່ອງທ່ຽວ ເປັນສາກອຳພາງ, ເພາະເບິ່ງໃນແງ່ວີຊາສະເພາະຂອງເຈົ້າໜ້າທີ່ຕໍາຫຼວດແລ້ວ ແຫຼ່ງທ່ອງທ່ຽວ, ສະຖານທີ່ບັນເທີງ, ຮ້ານຄາຣາໂອເກະ ຈຳນວນໜຶ່ງໄດ້ກາຍເປັນຈຸດນັດພົບ, ຈຸດພັກເຊົາເຕົ້າໂຮມວາງແຜນການເຄື່ອນໄຫວ, ມອບໝາຍໜ້າທີ່ຂອງກຸ່ມອາຊະຍາກຳປະເພດຕ່າງໆ ເປັນຕົ້ນ ກຸ່ມຄ້າຂາຍຢາເສບຕິດ, ຄ້າມະນຸດ, ຄ້າຂາຍເຖື່ອນ, ການພະນັນ; ເວົ້າອີກຢ່າງໜຶ່ງ, ເປັນສະຖານທີ່ເອື້ອອຳນວຍ ໃຫ້ແກ່ເປົ້າໝາຍອາຊະຍາກຳແຕ່ລະປະເພດ ຊຶ່ງເປັນສິ່ງທ້າທາຍໃນການຕິດຕາມກວດກາ, ແກ້ໄຂຂອງເຈົ້າໜ້າທີ່ລັດທີ່ກ່ຽວຂ້ອງລວມທັງເຈົ້າໜ້າທີ່ຕໍາຫຼວດ. ບັນດາຈຸດພື້ນທີ່ດັ່ງກ່າວມານັ້ນ, ເປັນໜຶ່ງໃນຕະຫຼາດຈຳໜ່າຍ, ຊື້-ຂາຍສິ່ງຜິດກົດໝາຍ (ຈຳໜ່າຍ, ມົ່ວສຸມຢາເສບຕິດລາຍຍ່ອຍ, ລາຍກາງ), ຄ້າປະເວນີ (ຄ້າມະນຸດ). ພ້ອມດຽວກັນນັ້ນ, ກໍເປັນສະຖານທີ່ຫຼິ້ນກິນຟຸ່ມເຟືອຍ, ເບື່ອເມົາ, ສ້າງໜີ້ສິນ, ມີຄວາມຕ້ອງການເງິນເພື່ອຕອບສະໜອງກໍໃຫ້ເກີດມີການປຸ້ນຈີ້-ຊີງຊັບ, ຂ້າເຈົ້າເອົາຂອງ, ຈຳນວນໜຶ່ງກໍມີການກູ້ຢືມເປັນໜີ້ນອກລະບົບເມື່ອບໍ່ມີຄວາມສາມາດຊຳລະກໍ່ເກີດມີການທະເລາະວິວາດກັນ,ໃຊ້ກຳລັງຂົ່ມຂູ່ທຳຮ້າຍຮ່າງກາຍທວງໜີ້ນອກລະບົບ,ກັກຂັງໜ່ວງໜ່ຽວຫຼືການຈັບຕົວຮຽກຄ່າໄຖ່ ແລະການຄາດຕະກຳອຳພາງຄະດີ, ສ້າງຄວາມຢ້ານກົວໃຫ້ແກ່ສັງຄົມ, ທ້າທາຍຕໍ່ອຳນາດລັດ, ກໍຄືຄວາມສາມາດຂອງເຈົ້າໜ້າທີ່ຊຶ່ງທັງໝົດນີ້ນອນໃນກົນອຸບາຍ, ລ່ຽມລາຍຂອງແກ້ງອັນຕະພານກຸ່ມອາຊະຍາກອນ. ເປົ້າໝາຍກໍ່ອາຊະຍາກຳປະເພດຕ່າງໆ, ຈະສວຍໃຊ້ໂອກາດໄລຍະການເປີດປະເທດເຂົ້າມາເຄື່ອນໄຫວກະທຳຜິດໄດ້ສະດວກຂຶ້ນ, ເປົ້າໝາຍຢູ່ພາຍໃນກໍຈະມີເງື່ອນໄຂພົວພັນ, ສົມທົບກັບເປົ້າໝາຍພາຍນອກເພື່ອວາງແຜນກໍ່ຄວາມບໍ່ສະຫງົບຄວາມບໍ່ເປັນລະບຽບປອດໄພໃນສັງຄົມ.

(ຂ່າວ-ພາບ: ບຸນອູ້ມ

แชร์