ຄາດ​ວ່ານັກ​ທ່ອງ​ທ່ຽວ​ຕ່າງ​ປະ​ເທດຈະ​ເດີນທາງ​ເຂົ້າ​ມາ​ທ່ອງ​ທ່ຽວ ສ​ປປ ລາວ ຫຼາຍ​ຂຶ້ນ

ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຂຶ້ນລາຍງານການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນຕອນບ່າຍຂອງວັນທີ 17 ມິຖຸນາ ນີ້, ພາຍໃຕ້ການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ.

ທ່ານ ລັດ​ຖະ​ມົນ​ຕີ​ກະ​ຊວງ ຖວ​ທ ກ່າວ​ວ່າ: ກະຊວງ ຖວທ ໄດ້ສ້າງແຜນຟື້ນຟູການທ່ອງທ່ຽວຈາກການແຜ່ລະບາດຂອງພະຍາດ ໂຄວິດ-19 ສໍາລັບປີ 2021-2025 ຊຶ່ງໄດ້ຮັບຮອງໃນວັນທີ 21 ກໍລະກົດ ປີ 2021 ທີ່ຜ່ານມາ, ການລະບາດຂອງ ພະຍາດໂຄວິດ-19 ໃນລະຫວ່າງເດືອນເມສາ ປີ 2020 ຈົນເຖິງທ້າຍປີ 2021 ໄດ້ສົ່ງຜົນກະທົບຢ່າງຫຼວງຫຼາຍຕໍ່ອຸດສາຫະກໍາການທ່ອງທ່ຽວຂອງລາວເຮັດໃຫ້ລະບົບຕ່ອງໂສ້ການທ່ອງທ່ຽວລາວຢຸດສະງັກເກືອບທັງໝົດ.

ໃນປີ 2020 ຈໍານວນນັກທ່ອງທ່ຽວສາກົນທີ່ມາທ່ຽວ ສປປ ລາວ ໄດ້ຫຼຸດລົງເຖິງ 91,5% ທຽບໃສ່ປີ 2019 ແລະ ຂາດລາຍຮັບຫຼາຍກວ່າ 86% ເມື່ອທຽບໃສ່ປີ 2019. ຍິ່ງໄປກວ່ານັ້ນ, ໃນປີ 2021 ສປປ ລາວ ແມ່ນບໍ່ມີໂຕເລກນັກທ່ອງທ່ຽວສາກົນເລີຍ (ຫຼື ເທົ່າກັບສູນຄົນ) ຍ້ອນການປິດດ່ານສາກົນ ແລະ ບໍ່ອະນຸຍາດໃຫ້ນັກທ່ອງທ່ຽວເດີນທາງເຂົ້າ-ອອກປະເທດ. ຜົນກະທົບດັ່ງກ່າວ, ເປັນສາເຫດຕົ້ນຕໍເຮັດໃຫ້ແຮງງານໃນຂະແໜງການທ່ອງທ່ຽວ (ແຮງງານທາງກົງ ແລະ ທາງອ້ອມ) ໄດ້ຮັບຜົນກະທົບເກືອບທັງໝົດ ເຊັ່ນ: ບໍ່ໄດ້ຮັບຄ່າແຮງງານ, ຖືກພັກວຽກຊົ່ວຄາວ ແລະ ຖາວອນ, ຖືກຕັດເງິນເດືອນ. ຜູ້ປະກອບການທຸລະກິດການທ່ອງທ່ຽວ ພົບກັບບັນຫາ​ໜີ້ສິນເພີ່ມຂຶ້ນ, ຄັງເງິນສົດ, ສໍາຮອງໝົດ ແລະ ໄດ້ແບກຫາບພາລະຄ່າໃຊ້ຈ່າຍບໍລິຫານຕ່າງໆເຊັ່ນ: ຄ່ານໍ້າາ, ຄ່າໄຟຟ້າ ແລະອື່ນໆ. ຜົນກະທົບດັ່ງກ່າວ, ເຮັດໃຫ້ທຸລະກິດທ່ອງທ່ຽວຂອງລາວ ປະມານ 30% ໄດ້ປິດກິດຈະການແບບຖາວອນຍ້ອນບໍ່ສາມາດປະຄອງທຸລະກິດໃຫ້ຢູ່ລອດໄດ້. ມາຮອດທ້າຍປີ 2021, ປະມານ 70% ຂອງທຸລະກິດການທ່ອງທ່ຽວລາວໄດ້ປັບປ່ຽນທຸລະກິດຫັນມາເນັ້ນໃສ່ຕະຫຼາດພາຍໃນປະເທດ ແລະຕັ້ງເປົ້າໝາຍການຕະຫຼາດໃໝ່, ຂະຫຍາຍການຂາຍທາງອອນລາຍ ແລະໂຄສະນາທາງອອນລາຍຫຼາຍຂຶ້ນ.

ການຕ້ອນຮັບນັກທ່ອງທ່ຽວໃນພື້ນທີ່ສີຂຽວໃນການຈັດຕັ້ງປະຕິບັດຕົວຈິງໃນໄລຍະທີ 1 ມີບັນດາຫົວໜ່ວຍບໍລິການໃນຂະແໜງການທ່ອງທ່ຽວ ເຊັ່ນ: ບໍລິສັດ ທ່ອງທ່ຽວ, ໂຮງແຮມ, ຮ້ານອາຫານ, ຮ້ານກິນດື່ມ ຈໍານວນຫຼາຍຕື່ນຕົວສະໝັກໃຈເຂົ້າຮ່ວມໂຄງການໂດຍການລົງທະບຽນນໍາສະພາການຄ້າ ແລະ ອຸດສາຫະກໍາແຫ່ງຊາດ ເປັນຕົ້ນແມ່ນ: ບໍລິສັດທ່ອງທ່ຽວ ຈໍານວນ 39 ຫົວໜ່ວຍ, ໂຮງແຮມ-ເຮືອນພັກ 22 ຫົວໜ່ວຍ, ຮ້ານອາຫານ 6 ຫົວໜ່ວຍ, ສະຖານທີ່ທ່ອງທ່ຽວມີ 2 ຫົວໜ່ວຍ; ເພື່ອຮັບປະກັນໃຫ້ ການກະກຽມຄວາມພ້ອມດ້ານການບໍລິການ ຂອງບັນດາຫົວໜ່ວຍທຸລະກິດທີ່ເຂົ້າຮ່ວມໂຄງການ ຄະນະຮັບຜິດຊອບໄດ້ຈັດຝຶກອົບຮົມ, ປະເມີນ ແລະຢັ້ງຢືນມາດຕະຖານສຸຂະນາໄມໃນຂະແໜງການທ່ອງທ່ຽວ (LaoSafe) ຊຶ່ງມີພະນັກງານ ແລະຫົວໜ່ວຍທຸລະກິດທີ່ຜ່ານການປະເມີນ ແລະ ຢັ້ງຢືນ ໃນເຂດພື້ນທີ່ສີຂຽວ ຄື: ພະນັກງານນໍາທ່ຽວ 99 ຄົນ, ພະນັກງານຂັບລົດ 57 ຄົນ, ຮ້ານອາຫານ ແລະ ເຄື່ອງດື່ມ 40 ຫົວໜ່ວຍ, ສະຖານທີ່ພັກແຮມ 12 ຫົວໜ່ວຍ, ບໍລິສັດການບິນ 2 ຫົວໜ່ວຍ.

ທ່ານ ນາງ ສວນ​ສະ​ຫວັນ ວິ​ຍະ​ເກດ ກ່າວ​ອີກວ່າ: ການເປີດປະເທດແບບເຕັມຮູບແບບ, ກະຊວງ ຖວທ ໄດ້ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນ ດັ່ງນີ້: 1) ໄດ້ອອກແຈ້ງການແນະນໍາໃຫ້ພະແນກ ຖວທ ທົ່ວປະເທດ ກ່ຽວກັບການຈັດຕັ້ງປະຕິບັດແຜນການເປີດຕ້ອນຮັບນັກທ່ອງທ່ຽວເຂົ້າມາທ່ອງທ່ຽວ ຢູ່ ສປປ ລາວ ເພື່ອແນະນໍາ ກ່ຽວກັບການກະກຽມຄວາມພ້ອມໃນການເປັນເຈົ້າພາບທີ່ດີ, ການອໍານວຍຄວາມສະດວກໃຫ້ແກ່ນັກທ່ອງທ່ຽວໃນການສະໜອງຂໍ້ມູນຂ່າວສານ, ການເດີນທາງພາຍໃນ, ການພັກເຊົາ, ການປັບປຸງສະຖານທີ່ທ່ອງທ່ຽວ ແລະ ການບໍລິການ ຕ່າງໆ; 2) ສືບຕໍ່ຊຸກຍູ້ ແລະ ສະໜອງງົບປະມານຈໍານວນໜຶ່ງໃຫ້ພະແນກ ຖວທ ບັນດາແຂວງເປົ້າໝາຍເພື່ອສົມທົບກັບ ຜູ້ຄຸ້ມຄອງສະຖານທີ່ທ່ອງທ່ຽວທີ່ໂດດເດັ່ນຂອງແຂວງ ເພື່ອສ້າງຂະບວນການອະນາໄມ ແລະ ປັບປຸງສິ່ງອໍານວຍຄວາມ ສະດວກຢູ່ສະຖານທີ່ທ່ອງທ່ຽວທີ່ໄດ້ຮັບຜົນກະທົບຈາກພະຍາດ ໂຄວິດ-19 ເພື່ອກະກຽມຄວາມພ້ອມຕ້ອນຮັບນັກທ່ອງທ່ຽວ ເຊັ່ນ: ຢູ່ນະຄອນຫຼວງວຽງຈັນ, ຫຼວງພະບາງ, ຈໍາປາສັກ, ຫຼວງນ້ໍາທາ, ຄໍາມ່ວນ, ເມືອງວັງວຽງ ແຂວງວຽງຈັນ ແລະ ແຂວງອື່ນໆ; 3) ໄດ້ອອກແບບປົດສະເຕີໂຄສະນາກ່ຽວກັບມາດຕະການເຂົ້າ-ອອກ ສປປ ລາວ ເປັນພາສາລາວ ແລະ ພາສາອັງກິດ ລົງໃນສື່ສັງຄົມອອນລາຍ ເພື່ອສື່ສານໃຫ້ນັກທ່ອງທ່ຽວ ແລະຜູ້ປະກອບການທ່ອງທ່ຽວໄດ້ໂຄສະນາ; 4) ນັບແຕ່ລັດຖະບານ ໄດ້ປະກາດເປີດປະເທດ ເລີ່ມແຕ່ວັນທີ 9 ພຶດສະພາ ເປັນຕົ້ນມາ, ຂໍ້ມູນຂ່າວສານຕ່າງໆ ກ່ຽວກັບນະໂຍບາຍການເປີດຕ້ອນຮັບນັກທ່ອງທ່ຽວຂອງ ສປປ ລາວ ແມ່ນໄດ້ຮັບການໂຄສະນາໂດຍຜ່ານສື່ສັງຄົມຕ່າງໆທັງພາຍໃນ ແລະຕ່າງປະເທດຢ່າງກວ້າງຂວາງພໍສົມຄວນ,ບັນດາຊ່ຽວຊານທ່ອງທ່ຽວທີ່ເຮັດວຽກ ແລະ ດໍາເນີນທຸ ລະກິດຢູ່ລາວ, ບັນດາບໍລິສັດທ່ອງທ່ຽວຢູ່ລາວ ໄດ້ແຈ້ງຂ່າວໃຫ້ກັບບໍລິສັດຄູ່ສັນຍາຢູ່ຕ່າງປະເທດ ແລະໄດ້ຕີພິມບົດຄວາມອອກຂ່າວໃນວາລະສານທ່ອງທ່ຽວສາກົນຫຼາຍສະບັບ; ບັນດາບໍລິສັດທ່ອງທ່ຽວຈາກພາກພື້ນ ແລະສາກົນທີ່ນໍາພານັກທ່ອງທ່ຽວເຂົ້າມາເປັນກຸ່ມ ແລະນັກທ່ອງທ່ຽວເດີນທາງເຂົ້າມາດ້ວຍຕົນເອງ ຕ່າງກໍໄດ້ຖ່າຍຮູບ ແລະຖ່າຍທອດສົດຜ່ານ Facebook ເພື່ອລົງຂ່າວກ່ຽວກັບສະພາບການເດີນທາງ, ຮູບພາບສະຖານທີ່ທ່ອງທ່ຽວຕ່າງໆ ແລະ ຂຽນຂໍ້ຄວາມອະທິບາຍກ່ຽວກັບການເດີນທາງທ່ອງທ່ຽວຢູ່ ສປປ ລາວ ຊຶ່ງເປັນການບອກເລົ່າປາກຕໍ່ປາກ ແລະ ໄດ້ລົງຮູບພາບການເດີນທາງຕາມເສັ້ນທາງລົດໄຟ ລາວ-ຈີນ ຊຶ່ງສ່ວນຫຼາຍແມ່ນມີຄວາມປະທັບໃຈຕໍ່ການເດີນທາງເຂົ້າມາທ່ອງທ່ຽວຢູ່ ສປປ ລາວ; ປັດຈຸບັນ ສາມາດຕີລາຄາໄດ້ວ່ານັກທ່ອງທ່ຽວຈາກພາກພື້ນ ແລະສາກົນໄດ້ຮັບຮູ້ກ່ຽວກັບການເປີດປະເທດຂອງ ສປປ ລາວ ຫຼາຍຂຶ້ນ ແລະບັນດາບໍລິສັດຄູ່ສັນຍາຢູ່ຕ່າງປະເທດແມ່ນໄດ້ຈອງລາຍການທ່ອງທ່ຽວກັບບັນດາບໍລິສັດຄູ່ສັນຍາຢູ່ພາຍໃນປະເທດຊຶ່ງຄາດວ່າໃນໄລຍະເດືອນ ມິຖຸນາ ປີ 2022 ເປັນຕົ້ນໄປນັກທ່ອງທ່ຽວຈາກ ພາກພື້ນ ແລະ ສາກົນ ຈະຄ່ອຍໆເຂົ້າມາທ່ອງທ່ຽວຢູ່ ສປປ ລາວ ຫຼາຍຂຶ້ນ; 5) ອີງຕາມຂໍ້ມູນເບື້ອງຕົ້ນ,ນັບຕັ້ງແຕ່ວັນທີ 9 ພຶດສະພາ ຫາວັນທີ 6 ມິຖຸນາ 2022 ມີຜູ້ເດີນທາງເຂົ້າ ສປປ ລາວ ຈໍານວນ 55.753 ຄົນ, ຜູ້ເດີນທາງອອກຈໍານວນ 56.325 ຄົນ, ນັກທ່ອງທ່ຽວພາຍໃນແຕ່ເດືອນມັງກອນ-ເມສາ 2022 ມີຈໍານວນ 463.907 ເທື່ອຄົນ (ຖ້າທຽບໃສ່ 4 ເດືອນຕົ້ນປີ 2021 ແມ່ນຫຼຸດລົງ 18,​9%), ສ້າງລາຍຮັບຈາກນັກທ່ອງທ່ຽວພາຍໃນ 617.135.482.100 ກີບ, ສະເລ່ຍໄລຍະພັກເຊົາ 2,5 ວັນ/ຄົນ, ລາຍຈ່າຍສະເລ່ຍ 530.000 ກີບ ຕໍ່ຄົນ/ມື້.

แชร์