ສສຊ ມີຄຳເຫັນເພີ່ມເຕີມ ຕໍ່ທິດທາງຟື້ນຟູການທ່ອງທ່ຽວ ເພື່ອກະຕຸ້ນເສດຖະກິດແຫ່ງຊາດ

ໃນວາລະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 20 ມິຖຸນາ 2022 ທ່ານ ຄຳໃບ ດຳລັດ ຮອງປະທານສະພາແຫ່ງຊາດ ໄດ້ຖະແຫລງຂ່າວ ກ່ຽວກັບຜົນສຳເລັດການພິຈາລະນາ ບົດລາຍງານການທ່ອງທ່ຽວສີຂຽວ ແລະ ການເປີດປະເທດ, ຕິດພັນກັບການປ້ອງກັນ ແລະຮັບມືການແພ່ລະບາດຂອງພະຍາດໂຄວິດ-19 ເຊິ່ງສະມາຊິກສະພາແຫ່ງຊາດ (ສສຊ) ໄດ້ມີຄຳເຫັນເພີ່ມເຕີມຕໍ່ບົດລາຍງານດັ່ງກ່າວທີ່ຈະຕ້ອງໄດ້ສືບຕໍ່ນໍາໄປຄົ້ນຄວ້າພິຈາລະນາແກ້ໄຂ.

ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະເປີດປະເທດຕ້ອນຮັບນັກທ່ອງທ່ຽວເຕັມຮູບແບບ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ລັດຖະບານກໍໄດ້ກໍານົດທິດທາງ ແລະວາງແນວທາງຟື້ນຟູການທ່ອງທ່ຽວຂອງ ສປປ ລາວ ໄລຍະ 2021-2025 ເພື່ອກະຕຸ້ນເສດຖະກິດແຫ່ງຊາດ, ເປັນການວາງທິດທາງໃຫ້ສອດຄ່ອງກັບສະພາບ ແລະເງື່ອນໄຂຄວາມເປັນຈິງຂອງປະເທດເຮົາໃນປັດຈຸບັນທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະສະພາບຫັນປ່ຽນດ້ານເສດຖະກິດຂອງໂລກເຊິ່ງລັດຖະບານໄດ້ກໍານົດມີ 3 ທິດທາງ ຄື: ການພັດທະນາພື້ນຖານໂຄງລ່າງການທ່ອງທ່ຽວ, ການໂຄສະນາການທ່ອງທ່ຽວ ແລະການຄຸ້ມຄອງການສ້າງຄວາມເຂັ້ມແຂງບຸກຄະລາກອນທ່ອງທ່ຽວ.

ທ່ານ ຄຳໃບ ດຳລັດ ໄດ້ໃຫ້ຮູ້ວ່າ: ຕໍ່ກັບວຽກງານດັ່ງກ່າວ, ບັນດາສະມາຊິກສະພາແຫ່ງຊາດໄດ້ມີຄຳເຫັນເພີ່ມຕື່ມເປັນຕົ້ນສະພາບການທ່ອງທ່ຽວຜ່ານການຈັດຕັ້ງປະຕິບັດທົດລອງເປີດເຂດທ່ອງທ່ຽວສີຂຽວເຫັນວ່າມາດຕະການຄວບຄຸມພະຍາດໂຄວິດ-19 ໄດ້ສ້າງຄວາມຫຍຸ້ງຍາກໃຫ້ແກ່ນັກທ່ອງທ່ຽວ ແລະມີຄ່າໃຊ້ຈ່າຍສູງເຮັດໃຫ້ນັກທ່ອງທ່ຽວບໍ່ຢາກເດີນທາງມາທ່ອງທ່ຽວຢູ່ ສປປ ລາວ; ແຫລ່ງທ່ອງທ່ຽວສີຂຽວມີຫລາຍແຕ່ການຄຸ້ມຄອງ, ການຂຶ້ນບັນຊີແຫລ່ງທ່ອງທ່ຽວ ແລະເມືອງທ່ອງທ່ຽວບໍ່ທັນຄົບຖ້ວນ, ການສຳປະທານບາງແຫລ່ງທ່ອງທ່ຽວຍັງບໍ່ທັນມີບົດວິພາກເພື່ອເປັນຂໍ້ມູນໃນການພັດທະນາ; ບາງໂຄງການພັດທະນາໃນບໍລິເວນແຫລ່ງທ່ອງທ່ຽວຍັງສົ່ງຜົນກະທົບທາງລົບຕໍ່ແຫລ່ງທ່ອງທ່ຽວທາງວັດທະນະທຳ, ປະຫວັດສາດ ແລະທຳມະຊາດ; ຄວນມີການຊຸກຍູ້, ສົ່ງເສີມການຜະລິດ ແລະຈຳໜ່າຍເຄື່ອງທີ່ລະນຶກຜະລິດຕະພັນທີ່ເປັນເອກະລັກຂອງແຕ່ລະແຫລ່ງທ່ອງທ່ຽວເພື່ອການສ້າງລາຍຮັບໃຫ້ແກ່ປະຊາຊົນຢູ່ພື້ນທີ່ດັ່ງກ່າວ. ເພື່ອເຮັດໃຫ້ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະເປີດປະເທດຕ້ອນຮັບນັກທ່ອງທ່ຽວແບບເຕັມຮູບແບບຄວນພິຈາລະນາການເພີ່ມກຳນົດເວລາວິຊາໃຫ້ນັກທ່ອງທ່ຽວເພື່ອດຶງດູດນັກທ່ອງທ່ຽວ ແລະ ນຳເງິນຕາຕ່າງປະເທດເຂົ້າ ສປປ ລາວ ໃຫ້ຫລາຍຂຶ້ນ. ພ້ອມນີ້, ສສຊ ຍັງສະເໜີຄົ້ນຄວ້າ, ປັບປຸງການເຂົ້າເຖິງແຫລ່ງທຶນດອກເບ້ຍຕໍ່າໃຫ້ແກ່ຜູ້ປະກອບການດ້ານການທ່ອງທ່ຽວໃຫ້ໄດ້ຫລາຍຂຶ້ນ; ປັບປຸງການບໍລິການການທ່ອງທ່ຽວ, ດ້ານຄວາມປອດໄພ, ສິ່ງອໍານວຍຄວາມສະດວກເປັນຕົ້ນການປະສານງານລະຫວ່າງພາກສ່ວນກ່ຽວຂ້ອງ, ເສັ້ນທາງເຂົ້າເຖິງແຫລ່ງທ່ອງທ່ຽວ, ຄ່າອາຫານ ແລະເຄື່ອງດື່ມຢູ່ສະຖານທີ່ທ່ອງທ່ຽວຕ່າງໆໃຫ້ມີລາຄາສົມເຫດສົມຜົນ ແລະອື່ນໆ ທີ່ພວກເຮົາຈະຕ້ອງໄດ້ສືບຕໍ່ນໍາໄປຄົ້ນຄວ້າພິຈາລະນາແກ້ໄຂ.

ທ່ານ ຄຳໃບ ດຳລັດ ຍັງໃຫ້ຮູ້ອີກວ່າ: ການປະກອບຄໍາຄິດຄໍາເຫັນຂອງສະມາຊິກສະພາແຫ່ງຊາດ ໃນວັນທີ 17 ມິຖຸນາຜ່ານມາ ມີບັນຍາກາດສ້າງສັນ ແລະຟົດຟື້ນ ເຊິ່ງໃນວັນທີ 8 ກໍລະກົດທີ່ຈະມາເຖິງນີ້, ກອງປະຊຸມສະພາແຫ່ງຊາດຈະໄດ້ພິຈາລະນາ ແລະລົງຄະແນນສຽງຮັບຮອງເອົາວຽກງານດັ່ງກ່າວເປັນມະຕິຂອງກອງປະຊຸມສະພາແຫ່ງຊາດເພື່ອມອບໃຫ້ລັດຖະບານນໍາໄປຈັດຕັ້ງປະຕິບັດ.

ຂ່າວ: ກິດຕາ
ພາບ: ເກດສະໜາ

แชร์