ປິດໂຄງການກອງທຶນຫຼຸດຜ່ອນຄວາມທຸກຍາກຂອງອົົງການເພື່ອການພັດທະນາ ແລະຮ່ວມມືຂອງປະເທດສະວິດ( SDC )

ກອງປະຊຸມສະຫຼບປິດການຊ່ວຍເຫຼືອໂຄງການກອງທຶນຫຼຸດຜ່ອນຄວາມທຸກຍາກ ຫຼື ທລຍ ຂອງອົງການເພື່ອການພັດທະນາ ແລະຮ່ວມມືຂອງປະເທດສະວິດ ຫຼື SDC ຈັດຂຶ້ນ ໃນວັນທີ 16 ມິຖຸນາ 2022 ທີ່ຫ້ອງການພັດທະນາຊົນນະບົດ, ກະຊວງກະສິກໍາ ແລະປ່າໄມ້ພາຍໃຕ້ການເປັນປະທານຮ່ວມລະຫວ່າງທ່ານ ສີປະໄພ ໄຊສົງຄາມ ຫົວໜ້າຫ້ອງການກະຊວງກະສິກໍາ ແລະ ປ່າໄມ້ ແລະ ທ່ານ ຄຣີສຕຽນ ເອງເລີ ( Christian Engler ) ຮອງຫົວໜ້າອົງການ SDC ປະຈໍາ ສປປ ລາວ. ພ້ອມດ້ວຍຜູ້ຊ່ຽວຊານອາວຸໂສດ້ານພັດທະນາສັງຄົມ ແລະຫົວໜ້າຄະນະທິມງານຈັດຕັ້ງປະຕິບັດໂຄງການຊ່ຽວຊານຈາກທະນາຄານໂລກ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ສີປະໄພ ໄຊສົງຄາມ ຫົວໜ້າຫ້ອງການ ກະຊວງກະສິກໍາ ແລະ ປ່າໄມ້ມີຄໍາເຫັນວ່າ: ອົງການເພື່ອການພັດທະນາ ແລະຮ່ວມມືຂອງປະເທດສະວິດ ຫຼື SDC ເປັນຄູ່ຮ່ວມງານດ້ານການພັດທະນາທີ່ໄດ້ໃຫ້ການສະໜັບສະໜູນແກ່ໂຄງການກອງທຶນຫຼຸດຜ່ອນຄວາມທຸກຍາກ ຫຼື ທລຍ ທັງທາງດ້ານການເງິນ ແລະ ດ້ານເຕັກນິກວິຊາການມາເປັນເວລາຫຼາຍກວ່າ 10 ປີ, ນັບແຕ່ປີ 2009 ເປັນຕົ້ນມາ, ອົງການ SDC ໄດ້ໃຫ້ການສະໜັບສະໜູນທຶນຊ່ວຍເຫຼືອລ້າຫຼາຍກວ່າ 40 ລ້ານ ໂດລາສະຫະລັດ ເພື່ອຈັດຕັ້ງປະຕິບັດໂຄງການ ກອງທຶນຫຼຸດຜ່ອນຄວາມທຸກຍາກ ໂດຍຜ່ານການສົ່ງເສີມ ການວາງແຜນການແບບມີສ່ວນຮ່ວມແຕ່ຂັ້ນລຸ່ມຫາຂັ້ນເທິງ,ການມີສ່ວນຮ່ວມຂອງຊຸມຊົນ ແລະ ການຄັດເລືອກບຸລິມະສິດ ຄວາມຕ້ອງການຂອງຊຸມຊົນ ໂດຍການມີສ່ວນຮ່ວມຂອງແມ່ຍິງ ແລະ ຊົນເຜົ່າ. ໂດຍສະເພາະແມ່ນການສະໜັບສະໜູນການພັດທະນາໂຄງລ່າງພື້ນຖານທັງໝົດ 1.544 ໂຄງການຍ່ອຍທີ່ນອນຢູ່ໃນຂະແໜງການຕ່າງໆ ເປັນຕົ້ນ: ຂະແໜງສາທາລະນະສຸກ, ສືກສາທິການ ແລະກິລາ, ໂຍທາທິການ ແລະ ຂົນສົ່ງ ແລະ ກະສີກຳ ແລະ ປ່າໄມ້. ນອກນີ້ຍັງໄດ້ສ້າງຄວາມ ເຂັ້ມແຂງໃຫ້ຊຸມຊົນ, ອໍານາດການປົກຄອງທ້ອງຖີ່ນ, ການປ້ອງກັນຜົນກະທົບທາງສັງຄົມ ແລະສີງແວດລ້ອມ, ການຄຸ້ມຄອງຄວາມສ່ຽງໄພພິບັດ. ທັງໝົດຂອງກິດຈະກຳທີ່ໄດ້ຈັດຕັ້ງປະຕິບັດນັ້ນແນໃສ່ຮັບປະກັນໃຫ້ຜູ້ທີ່ທຸກຍາກໄດ້ຮັບຜົນປະໂຫຍດສູງສຸດ.

ຫົວໜ້າຫ້ອງການກະຊວງກະສິກໍາ ແລະ ປ່າໄມ້ມີຄໍາເຫັນຕື່ມວ່າ: ໃນໄລຍະທີ່ປະເທດລາວເຮົາໄດ້ຮັບຜົນກະທົບຈາກການແພ່ລະບາດຂອງພະຍາດໂຄວິດ-19 ໃນທ້າຍປີ 2021 ອົງການເພື່ອການພັດທະນາ ແລະຮ່ວມມືຂອງປະເທດສະວິດຍັງໄດ້ໃຫ້ທຶນສະໜັບສະໜູນຈຳນວນ 500.000 ໂດລາສະຫະລັດ ເພື່ອສະໜັບສະໜູນລັດຖະບານລາວໃນການຫລຸດຜ່ອນຄວາມສ່ຽງການແຜ່ລະບາດ ຂອງພະຍາດໂຄວິດ-19 ລົງສູ້ເຂດຊົນນະບົດ ໂດຍໄດ້ຈັດຕັ້ງປະຕິບັດກິດຈະກຳຢູ່ 900 ບ້ານ, 35 ເມືອງຂອງ 10 ແຂວງໃນທົ່ວປະເທດເພື່ອສ້າງຈິດສໍານຶກໃຫ້ຊຸມຊົນຢູ່ບ້ານເປົ້າໝາຍກ່ຽວກັບການປ້ອງກັນຕົນເອງຈາກການແຜ່ລະບາດຂອງພະຍາດໂຄວິດ-19 ແລະ ການແຜ່ລະບາດຂອງພະຍາດຕິດຕໍ່ ອື່ນໆ. ພ້ອມທັງໃຫ້ທຶນສະໜັບສະໜູນຈຳນວນ 395.200 ໂດລາສະຫາລັດສຳລັບເປັນຄ່າບໍລິຫານ ແລະຕິດຕາມວຽກງານການກໍ່ສ້າງ 53 ໂຄງການຍ່ອຍ ຢູ່ 6 ແຂວງ ຄື: ຫຼວງນໍ້າທາ, ຫຼວງພະບາງ, ສະຫວັນນະເຂດ, ສາລະວັນ, ເຊກອງ ແລະແຂວງອັດຕະປືພາຍໃຕ້ທຶນສົມທົບຂອງລັດຖະບານຂອງໂຄງການກອງທຶນຫຼຸດຜ່ອນຄວາມທຸກຍາກ ຫລື ທລຍ 3 ຕື່ມອີກ.

ໂດຍ: ບຸນຍັງ ພຸດສະຫວັດ

แชร์